1. Nama utai ke ngasuh kitai tinggi agi ari jelu?

 JEHOVAH meri mensia siti utai ti lain ari ke bukai. Utai nya pengasai ati kitai. Tu ngasuh kitai tinggi agi ari jelu. Baka ni kitai nemu Adam seduai Hawa ngembuan pengasai ati? Pengudah seduai iya enda ngasika Petara, seduai iya belalai ari Iya. Pengasai ati udah ngachau seduai iya.

 2. Nama kebuah pengasai ati kitai nya baka kompas? (Peda gambar ba pun artikel.)

² Pengasai ati nya asai ba ati ti madah pasal utai betul enggau salah ke ulih ngiring kitai ba pengidup. Pengasai ati ke enda dilatih enggau manah nya baka kapal ke udah jai kompas. Angin enggau arus tasik ulih nguingka kapal nya ari endur ke dituju iya. Tang kompas ke ulih dikena deka nulung kepten tetap ba pejalai iya. Pia mega, enti pengasai ati kitai dilatih enggau betul, iya ulih ngiring kitai.

 3. Nama nyadi enti kitai enda ngelatih pengasai ati enggau manah?

³ Enti pengasai ati enda dilatih enggau betul, iya enda ulih nangkan kitai ari ngereja utai ti salah. (1 Tim. 4:1, 2) Iya indah ngasuh kitai pechayaka “utai ti jai manah.” (Isa. 5:20)  Jesus madah ngagai bala murid: ‘Maya deka datai alai orang ke munuh kita deka ngumbai diri ngereja nya ke Petara.’ (Jhn. 16:2) Nya meh utai ti dipechaya orang ke munuh murid ke benama Stepen. (SKR. 6:8, 12; 7:54-60) Sepemanjai sejarah, mayuh orang ke ngembuan jalai pengarap ngereja jenayah baka munuh orang, tang sida ngumbai diri ngereja nya ke Petara. Tang kebendar, utai ke udah dikereja sida nya ngelanggar adat Petara. (P-sut. 20:13) Pengasai ati sida berupai amat enda ngiring sida enggau betul!

 4. Baka ni kitai ulih nentuka pengasai ati kitai ulih dikena?

⁴ Nya alai, baka ni kitai ulih nentuka pengasai ati kitai ulih dikena? Adat enggau prinsip ari Bup Kudus “beguna kena ngajar, kena ngerara, kena ngaduka utai ti salah, enggau kena matihka orang diau lurus.” (2 Tim. 3:16) Kitai enda tau enda belajarka Bup Kudus enggau tetap, belematika utai ti dipadah dalam Bup Kudus, lalu nitihka utai ti dipelajar ba pengidup. Enggau tu, kitai ulih belajar berunding baka Jehovah enggau mayuh agi. Lalu kitai pechaya pengasai ati ulih ngiring kitai enggau manah. Aram kitai berandauka chara kitai ulih ngena adat enggau prinsip Jehovah ngelatih pengasai ati kitai.

5, 6. Baka ni adat Petara nulung kitai?

⁵ Enti kitai deka adat Petara nulung kitai, semina macha tauka nemu nama bansa adat nya enda chukup. Kitai patut rindu sereta bebasaka adat nya. Bup Kudus ngasuh kitai: “Begedika utai ti jai, rinduka utai ti ngena.” (Amo. 5:15) Tang baka ni kitai ulih ngereja nya? Kitai patut belajar berundingka siti-siti utai nitihka chara Jehovah berunding. Pikirka tu. Uji gambarka nuan tusah deka tinduk, lalu lutur ngasuh nuan makai pemakai ti manah ke pengerai, suah agi besenam, sereta ngubah sekeda chara pengidup. Nuan nitihka jaku ajar iya, lalu ulih tinduk! Baka ni asai ati nuan pasal ajar ke dipadah lutur nya?

⁶ Pia mega, Penempa kitai udah meri adat kena ngelindung kitai ari penusah ketegal ngereja dosa lalu ngemanahka pengidup kitai. Ambika chunto, Bup Kudus enda ngasuh kitai bula, nipu, ngenchuri, ngereja ulah ti kamah, kasar, tauka bisi kaul enggau bala antu sereta bemanang. (Bacha Jaku Dalam 6:16-19; Pem. 21:8) Lebuh bulih asil ti manah ketegal ngasika Jehovah, pengerindu kitai ke Iya enggau adat Iya deka nambah.

7. Baka ni cherita Bup Kudus ulih nulung kitai?

⁷ Ngelanggar adat Petara tentu ngenataika penusah. Nya alai, anang ngelanggar adat Petara enti deka nemu utai ti ngena enggau utai ti salah. Kitai ulih belajar ari penyalah ke dikereja orang kelia. Chunto nya bisi ditulis ba Bup Kudus. Jaku Dalam 1:5 madahka: “Jaku-dalam tu tau nambahka penemu orang ke endang bepenemu-dalam.” Iring tu datai ari Petara lalu ti pemadu manah! Ambika chunto, pikirka penusah ke ditapi David pengudah iya enda ngasika Jehovah sereta beleman enggau Batseba. (2 Sam. 12:7-14) Lebuh nuan macha cherita nya, tanya diri empu: ‘Baka ni David ulih nyeliahka penanggul tu? Nama patut digaga aku enti sema napi utai ti sama? Enti sema aku bisi pengingin deka ngereja ulah ti kamah, kati aku deka baka David  tauka baka Josep?’ (P-kal. 39:11-15) Enti kitai belematika penusah ti deka ninggang kitai ketegal pengawa ti bedosa, nya ulih nulung kitai majak “begedika utai ti jai.”

8, 9. (a) Pengasai ati nulung kitai ngereja nama? (b) Baka ni pengasai ati kitai ulih sejalai enggau prinsip Jehovah?

⁸ Kitai enggau naka ulih deka ngerarika diri ari utai ti dipegedika Petara. Tang nama patut digaga kitai enti sema napi siti-siti utai ke nadai adat ti nyengala ba Bup Kudus? Baka ni kitai ulih nemu utai ti diasuh Petara kereja kitai? Enti kitai ngawakka Bup Kudus ngelatih pengasai ati kitai, kitai ulih ngaga pemutus enggau manah.

⁹ Ketegal Jehovah rinduka kitai, Iya udah nyediaka prinsip ke ulih ngiring pengasai ati kitai. Ku Iya nerangka: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’ (Isa. 48:17, 18) Lebuh belematika prinsip Bup Kudus, lalu ngawakka prinsip nya negu ati kitai, kitai ulih ngadu sereta ngemetulka pengasai ati kitai. Tu ulih nulung kitai ngaga pemutus enggau manah.

10. Nama utai ti dikumbai prinsip, lalu baka ni Jesus ngena prinsip ba utai ke diajar iya?

¹⁰ Prinsip nya batang pemendar ke ngiring runding kitai ngambika nulung  kitai ngaga pemutus enggau manah. Nemu prinsip Jehovah deka nulung kitai meretika chara Jehovah berunding sereta kebuah Iya meri kitai siti-siti adat. Jesus ngena prinsip ngajar bala murid iya pasal ulah enggau pengawa ke ulih ngenusahka kitai. Ambika chunto, Jesus madahka pengeringat tau ngujungka ulah ti tau ngemedis, lalu runding ti kamah ulih ngujungka orang butang. (Mat. 5:21, 22, 27, 28) Enti kitai ngawakka prinsip Jehovah ngiring kitai, pengasai ati kitai ulih dilatih enggau manah, lalu kitai ulih ngaga pemutus ti ngemuliaka Petara.—1 Kor. 10:31.

11. Baka ni pengasai ati tiap iku orang bebida ari pangan diri?

¹¹ Indah lebuh orang Kristian ngelatih pengasai ati sida ngena Bup Kudus, sida agi bisi pemutus bukai ke ulih dipilih ba sekeda pekara. Chunto iya, sekalika tau ngirup ai bisa tauka enda. Bup Kudus nadai madahka ngirup ai bisa nya salah, tang iya enda ngasuh kitai ngirup kelalu mayuh tauka mabuk. (J-lam. 20:1; 1 Tim. 3:8) Kati reti nya seagi-agi orang Kristian enda ngirup kelalu mayuh, iya tau enda ibuh berundingka utai bukai lebuh ngaga pemutus? Enda. Taja pan pengasai ati iya ngemendarka iya ngirup ai bisa, iya patut berundingka pengasai ati orang bukai.

12. Baka ni jaku ba Rome 14:21 ulih nulung kitai bebasaka pengasai ati orang bukai?

¹² Paul madahka kitai patut bebasaka pengasai ati orang bukai lebuh iya nulis: “Kitai ngereja utai ti ngena enti kitai enda makai dagin, tauka enda ngirup wain, tauka enda ngereja utai ti tau ngasuh menyadi kita bedosa.” (Rom. 14:21) Nya alai, taja pan kitai tau ngirup ai bisa, kitai enda ngirup iya enti kitai nemu iya tau ngachau pengasai ati menyadi Kristian ke bukai. Seiku menyadi Kristian lelaki engka gian ngirup ai bisa sebedau iya nemu pemendar, lalu mutuska runding enggai agi ngirup ai bisa. Kitai tentu enggai ngereja sebarang utai ke tau ngujungka iya ngereja baru tebiat ti lama nya. (1 Kor. 6:9, 10) Enti sema menyadi Kristian lelaki nya temuai kitai, kati kitai deka ngansak iya ngirup ai bisa, taja pan iya enggai? Tentu enda!

13. Baka ni Timoti bebasaka pengasai ati orang bukai ngambika ulih nulung sida nerima berita manah?

¹³ Lebuh Timoti agi biak, iya besetuju deka ditutus taja pan tu utai ti pedis. Iya nemu betutus nya utai ti beguna ba orang Judah ke alai iya deka nginjil. Baka Paul, Timoti enggai ngasuh orang bukai enda nyamai ati. (SKR. 16:3; 1 Kor. 9:19-23) Kati nuan mega sanggup ngelengkaka siti-siti utai ngambika ulih nulung orang bukai?

14, 15. (a) Baka ni kitai ulih nyadi orang ke tegap ba pengarap? (b) Baka ni orang Kristian ke tegap ba pengarap begulai enggau orang bukai?

¹⁴ Semua kitai patut ngelui ari “pun pelajar pasal Kristus” lalu “mansang ngagai  ajar ke orang ti besai tuai.” (Heb. 6:1) Pengelama dalam pemendar enda ulih nentuka kitai nya orang ti tegap ba pengarap. Nya alai kitai patut bebendar nyadi orang ke tegap ba pengarap. Penalam penemu enggau pemereti ati kitai patut terus nambah. Nya alai kitai patut macha Bup Kudus ninting hari. (Mas. 1:1-3) Tu ulih nulung kitai meretika adat sereta prinsip Jehovah enggau manah agi.

¹⁵ Ni bagi adat ti pemadu besai ba orang Kristian? Nya adat pengerindu. Jesus madah ngagai bala murid iya: ‘Enti kita rinduka pangan diri, nya baru semua orang deka nemu kita murid aku.’ (Jhn. 13:35) Adat pengerindu nya adat ti pemadu besai ba orang Kristian. (Jas. 2:8; Rom. 13:10) Nya alai kitai enda tekenyit enti sema pengerindu nya utai ti beguna, laban Bup Kudus madahka ‘Petara endang pengerindu.’ (1 Jhn. 4:8) Ba Petara, pengerindu ukai semina asai ba ati aja. Iya nunjukka pengerindu Iya ngena pengawa. Ku John nulis: ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal Iya ngagai dunya, ngambika kitai tau idup ulih iya.’ (1 Jhn. 4:9) Lebuh kitai ngayanka pengerindu ngagai Jehovah, Jesus, bala menyadi Kristian, sereta orang bukai, kitai nunjukka diri orang Kristian ke tegap ba pengarap.—Mat. 22:37-39.

16. Seraya kitai nyadi orang Kristian ke tegap ba pengarap, nama kebuah kitai deka ngumbai prinsip ari Jehovah nya berega agi?

¹⁶ Selalu iya, adat dikena ba pekara ti nyemetak, tang prinsip dikena ba mayuh pekara ti bebida. Nya alai seraya kitai nyadi orang Kristian ke tegap ba pengarap, kitai deka agi ngumbai prinsip ari Jehovah nya berega. Ambika chunto,  seiku anak mit enda tentu meretika kebuah begulai enggau orang ke jai nya tau ngenusahka. Nya alai apai indai iya patut netapka atur kena nyaga iya. (1 Kor. 15:33) Tang seraya anak mit nya mansang besai, iya belajar berunding ngena prinsip Bup Kudus. Prinsip tu ulih nulung iya milih bakih ti menyana kediri empu. (Bacha 1 Korint 13:11; 14:20.) Bendar agi kitai berundingka prinsip Bup Kudus, andal agi kitai ke pengasai ati kitai. Kitai ulih mereti agi ke utai ti diasuh Jehovah kereja kitai ba sebarang pekara.

17. Nama kebuah kitai ngumbai diri bisi semua utai ti diguna kena ngaga pemutus enggau manah?

¹⁷ Kitai bisi semua utai ti diguna kena ngaga pemutus ke ulih ngelantangka ati Jehovah. Ba Bup Kudus, kitai bisi adat enggau prinsip ke ulih nulung kitai ngambika “chukup disikap ngereja genap macham pengawa ti badas.” (2 Tim. 3:16, 17) Prinsip Bup Kudus ulih nulung kitai meretika chara Jehovah berunding. Tang kitai patut bebendar ngiga prinsip nya. (Eps. 5:17) Kitai bisi Watch Tower Publications Index, Bup Dikena Saksi-Saksi Jehovah Ngiga Pansik, Watchtower Library, Watchtower ONLINE LIBRARY, enggau aplikasi JW Library ke ulih nulung kitai ngiga prinsip nya. Kitai deka bulih penguntung lebuh ngena semua perengka tu belajarka Bup Kudus kediri empu tauka ba diri sebilik.

18. Nama nyadi lebuh kitai nitihka adat enggau prinsip Jehovah ba pengidup?

¹⁸ Pengidup kitai deka manah agi enti nitihka adat enggau prinsip Jehovah! Masmur 119:97-100 madahka: “Aku rinduka adat Nuan! Aku belematika iya sepemanjai hari. Pesan Nuan ngasuh aku pintar agi ari bala munsuh aku, laban pesan Nuan endang seruran enggau aku. Aku mereti agi ke utai ari semua pengajar aku, laban aku belematika ajar Nuan. Aku meretika mayuh agi utai ari sida ke tuai umur, laban aku ngasika ajar Nuan.” Lebuh kitai ngena jam belematika adat enggau prinsip Petara, kitai deka ngena mayuh agi penemu enggau pemereti ati lebuh ngereja siti-siti utai. Lalu lebuh kitai ngena adat enggau prinsip Iya ngelatih pengasai ati kitai, kitai deka “sebaka enggau Kristus.”—Eps. 4:13.