KITAI idup ba dunya ti charut, nya alai tusah deka ngulihka pemaik. Taja pan kitai bisi pemaik, tang pemaik ulih lenyau. Kati utai ke dipadah Bup Kudus ulih nulung kitai ngulih pemaik ti bendar sereta meruan belama iya? Baka ni kitai ulih nulung orang ngulihka pemaik?

Ngambika bulih pemaik ti bendar, kitai patut ngasaika diri likun sereta dijaga. Kitai patut bisi bala pangan ti manah, lalu kelebih agi, kitai patut semak agi enggau Petara. Baka ni kitai ulih ngereja nya?

Pesan sereta prinsip ari Jehovah endang seruran manah ke kitai. Enti kitai ngasika dua iti utai nya, kitai nunjukka diri andalka Jehovah sereta deka ngembuan kaul ti manah enggau Iya. (Jeremiah 17:7, 8; James 2:22, 23) Udah nya Jehovah deka semak enggau kitai sereta meri kitai pengelantang ba ati. Isaiah 32:17 madahka: “Menua deka ngasaika pemaik enggau pengelikun belama iya laban genap iku orang deka ngereja utai ti ngena.” Kitai tau bulih pemaik ti bendar enti kitai sanggup ngasika Jehovah.—Isaiah 48:18, 19.

Jehovah mega udah meri kitai pemeri ti berega ke ulih nulung kitai ngemansangka pemaik ti meruan belama iya. Pemeri nya roh kudus Iya.—Kereja Rasul 9:31.

Rasul Paul madahka pemaik nya sebagi ari ‘buah roh kudus.’ (Galatia 5:22, 23) Taja pan roh kudus Petara ngasilka pemaik, kitai patut ngemendarka roh kudus ngiring kitai enti dekaka pemaik. Baka ni kitai ulih ngereja nya?

Kesatu, kitai patut macha Bup Kudus enggau tetap. (Masmur 1:2, 3) Enti kitai belematika utai ke dibacha kitai, roh kudus ulih nulung kitai nemu runding Jehovah bekaul enggau mayuh macham pekara. Ngambika chunto, kitai ulih nemu kebuah Iya bebendar ngetanka  pemaik sereta kebuah pemaik nya besai reti ba Iya. Lebuh kitai ngena utai ti dipelajarka ari Bup Kudus, kitai deka ngembuan mayuh agi pemaik ba pengidup kitai.—Jaku Dalam 3:1, 2.

Kedua, kitai patut besampi minta roh kudus Petara. (Luke 11:13) Jehovah besemaya ngagai orang ke minta tulung ari Iya: ‘Pemaik Petara ti ngelui peragam mensia, deka nyaga ati enggau runding kita dalam Jesus Kristus.’ (Pilipi 4:6, 7) Lebuh kitai rapat enggau Jehovah sereta bepanggai ba roh kudus Iya, Iya deka meri kitai pengelantang ba ati.—Rome 15:13.

Bup Kudus udah nulung mayuh orang ngaga ubah ba pengidup, lalu diatu sida bisi kaul ti manah enggau Jehovah, pengelantang ba ati, sereta ulih bebaik enggau orang bukai. Baka ni sida udah ngaga sekeda ubah tu?

Sebedau nerima pemendar, sekeda ari bala menyadi Kristian kitai nya orang ke mangah sereta ngereja utai ti jai. Tang sida bebendar berubah, lalu diatu sida siru agi, sabar agi, sereta ulih bebaik enggau orang bukai. * (Peda nota kaki.) (Jaku Dalam 29:22) Peratika baka ni seiku menyadi Kristian lelaki ke benama David sereta seiku menyadi Kristian indu ke benama Rachel ngaga ubah ba personaliti seduai iya.

Sebedau David nerima pemendar, iya suah bisi runding ti negatif ngagai orang sereta bejaku kasar enggau diri sebilik. Tang udah nya iya nyau sedarka diri patut ngaga ubah. Baka ni iya bulih pemaik? Ku David madahka, “Aku berengkah ngena prinsip Bup Kudus ba pengidup aku. Ketegal nya, kami sebilik bebasa agi ke pangan diri.”

Pengidup Rachel bisi kaul enggau chara iya dibesaika. Ku iya nerangka, “Indah diatu, aku agi pedis deka nagang pemangah laban ari mit aku begulai enggau diri sebilik ke mangah.”  Nama nulung Rachel bulih pemaik? Ku iya madahka, “Bepanggai ba Jehovah nengah sampi.”

David enggau Rachel nya dua iti chunto orang ke udah bulih pemaik ketegal ngena prinsip Bup Kudus sereta bepanggai ba roh kudus Petara. Taja pan kitai dikelingi orang ke mangah, kitai agi ulih ngembuan pengelantang ba ati. Tu ngasuh kitai senang agi begulai enggau diri sebilik sereta bala menyadi Kristian kitai. Tang Jehovah ngasuh kitai “diau bebaik enggau semua orang.” (Rome 12:18) Kati tu ulih? Lalu nama kebuah kitai patut bebaik enggau orang bukai?

Enggau nusui pasal Perintah Petara, kitai nulung orang ngulihka pemaik. (Isaiah 9:6, 7; Matthew 24:14) Mayuh orang rinduka pesan nya sereta nerima iya. Ketegal nya, sida berasai diperansang sereta nadai agi pedis ati enggau utai ti nyadi ba dunya tu. Diatu sida bisi peluang bulih pengidup ti manah ke jemah ila, lalu tu ngasuh sida deka ‘ngiga pemaik.’—Masmur 34:14.

Taja pia, ukai semua orang deka ninga pesan kitai. (John 3:19) Enda ngira baka ni gaya orang nerima, Petara meri kitai roh kudus Iya. Roh kudus nulung kitai ngetanka pemaik sereta basa lebuh kitai nginjil. Enggau chara nya, kitai nitihka jaku lalau Jesus: “Enti orang dalam rumah nya nerima kita, awakka jaku tabi kita mengkang dia. Tang enti sida enggai nerima kita, ambi pulai baru jaku tabi kita nya.” (Matthew 10:11-13) Enti kitai ngembuan runding ke baka nya, kitai ulih ngetanka pemaik enda ngira nama utai ti disebut tauka dikereja orang. Lalu kitai nemu, kitai agi bisi peluang nulung sida dudi hari.

Kitai mega ngemansangka pemaik enti kitai ngayanka basa lebuh bejaku enggau bala pegawai perintah, taja pan sida nyakal kereja kitai. Ambika chunto, ba siti nengeri di menua Afrika, perintah enda ngemendarka kitai nirika Palan Gempuru. Bala menyadi Kristian kitai nemu, sida patut mutarka penanggul tu enggau manah. Sida nganjung seiku menyadi Kristian ke kala nyadi pengerintis di menua nya betemu enggau Pegawai ti Bepangkat Tinggi ba London, England, lalu madah ngagai pegawai nya pasal pengawa manah ke digaga Saksi-Saksi Jehovah di Afrika.

Ku menyadi Kristian lelaki nya madah: “Lebuh aku datai ba kaunter nyambut temuai, ari gari ke dikena penyambut temuai nya aku ulih nemu bansa iya, lalu aku kala belajarka bansa jaku nya. Nya alai aku bejaku ngena bansa jaku iya empu. Iya tekenyit lalu nanya, ‘Nama pejalai nuan?’ Aku madahka diri deka betemu enggau Pegawai ti Bepangkat Tinggi. Iya betelefon ngagai pegawai nya, lalu pegawai nya betemu enggau aku sereta bejaku enggau aku ngena bansa jaku iya. Udah nya, iya mending enggau manah seraya aku nerangka ngagai iya pasal pengawa manah ke digaga bala Saksi.”

Pengudah pegawai nya mendingka utai ku menyadi nya, pegawai nya nemu agi pasal pengawa kitai sereta nadai agi runding ti enda manah baka ke sebedau nya. Enda lama udah nya, perintah di Afrika ngubah pemutus sereta ngemendarka Saksi-Saksi Jehovah nirika Palan Gempuru. Bala menyadi gaga amat ati! Endang amat, lebuh kitai bebasaka orang bukai, kitai ngemansangka pemaik.

Kemayaharitu, nembiak Jehovah bisi kaul ti manah enggau Iya, seraya sida nyembah Iya dalam pemaik. Tiap iku kitai ulih nambahka pemaik tu enggau chara ngemansangka pemaik ba pengidup kitai empu. Udah nya kitai ulih pechaya Jehovah lantang ati enggau kitai. Lalu ba dunya baru, Jehovah deka meri kitai pemaik ti meruan belama iya.—2 Peter 3:13, 14.