1, 2. (a) Baka ni orang ba dunya tu majak bepechah-belah? (b) Nama sekeda tanya ke deka disaut kitai ba artikel tu?

 “KENYAU ari mit, aku nadai meda utai ti lurus,” ku seiku menyadi Kristian indu ari Eropah lebuh ngenang pasal pengidup iya suba. “Nya alai aku enggai nerima sistem politik di menua aku, lalu nyukung orang ke deka mai ubah ti besai ba politik. Indah aku betaun nyadi sulu ati seiku penganas.” Seiku menyadi Kristian lelaki ari Afrika nerangka kebuah iya orang ti kasar suba: “Aku ngumbai raban bansa kami manah agi ari semua raban bansa ke bukai, lalu aku bisi enggau parti politik. Kami diajar munuh bala penyakal ngena sangkuh—indah orang ari raban bansa kami empu ke nyukung parti politik bukai.” Seiku menyadi Kristian indu ke diau ba Eropah ngaku: “Aku bisi ulah ti berat sepiak, lalu aku begedika orang ke enda sama menua tauka jalai pengarap enggau aku.”

² Kemayaharitu, majak mayuh orang ngembuan ulah ke kala dikembuan sida tiga nya. Mayuh raban politik ngena  pengawa ti tau ngemedis ngambika ulih merintah diri empu. Orang selalu belaya pasal politik. Lalu ba mayuh menua, orang majak jai enggau orang ke datai ari menua bukai. Baka ke dipadah Bup Kudus, orang “enggai sepenemu” ba hari ti penudi tu. (2 Tim. 3:1, 3, NW) Baka ni orang Kristian ulih mengkang beserakup taja pan orang ba dunya majak bepechah-belah? Kitai ulih belajar ari teladan Jesus. Orang maya jeman Jesus mega bepechah-belah ketegal balat enda sepenemu ba politik. Ba artikel tu, kitai deka nemu saut ngagai tiga iti tanya tu: Nama kebuah Jesus enggai enggau semua raban politik? Baka ni Jesus nunjukka nembiak Petara enda tau masuk champur ba isu politik? Lalu baka ni Jesus nunjukka kitai enda patut ngena pengawa ti tau ngemedis?

3, 4. (a) Maya jeman Jesus, nama utai ti dikinginka orang Judah? (b) Baka ni pengingin tu bisi kaul enggau bala murid Jesus?

³ Mayuh orang Judah ke alai Jesus nginjil keran deka dilepaska ari orang Rome. Orang Judah ke enggau raban Zealots, siti raban politik ti fanatik, bebendar nyungkak orang ngambika deka agi dilepaska. Mayuh orang ari raban Zealots nitihka seiku lelaki ke benama Judas ari Galili, ke idup maya jeman Jesus. Judas nya messiah ti pelesu ke nesatka mayuh orang. Josephus, seiku pakar sejarah orang Judah, madahka Judas nyungkak orang Judah ngelaban perintah Rome lalu ngumbai orang ke besetuju mayar chukai ngagai orang Rome nya “orang ke penakut.” Pengujung iya orang Rome munuh Judas. (SKR. 5:37) Sekeda ari raban Zealots ngena pengawa ti tau ngemedis ngambika ulih nyapai tuju sida.

⁴ Mayuh ari orang Judah nganti Messiah datai. Sida ngumbai Messiah deka ngelepaska sida ari orang Rome, lalu ngaga orang Israel nyadi siti bansa ti besai baru. (Luk. 2:38; 3:15) Mayuh orang pechaya Messiah deka numbuhka sebuah perintah di menua Israel. Enti nya amat nyadi, semua orang Judah ke diau ngachir di serata dunya deka pulai baru ngagai menua Israel. Indah John Pemaptisa kala nanya Jesus: ‘Kati nuan tu orang ke deka datai, tauka kami nganti orang bukai?’ (Mat. 11:2, 3) John engka deka nemu sekalika bisi orang bukai ke deka datai ngelepaska orang Judah. Udah nya, dua iku murid betemu enggau Jesus lebuh benung ba rantau jalai nuju ngagai Emaus pengudah Jesus diangkatka idup baru. Sida madahka diri andalka Jesus nya pengelepas orang Israel. (Bacha Luke 24:21.) Enda lama udah nya, bala rasul nanya Jesus: ‘Tuan, kati tu maya nuan deka mulaika Perintah ngagai orang Israel?’—SKR. 1:6.

 5. (a) Nama kebuah orang ba Galili deka Jesus nyadi raja sida? (b) Baka ni Jesus ngemetulka runding sida?

⁵ Orang Judah ngarapka Messiah deka mutarka penanggul sida. Engka ketegal nya orang ba Galili dekaka Jesus nyadi raja sida. Sida tentu ngumbai Jesus deka nyadi pemerintah ti badas. Iya landik bejaku, ulih ngeraika orang ti sakit, sereta ulih nyediaka pemakai ke orang ti lapar. Pengudah Jesus meri kira 5,000 iku lelaki makai, tu ngasuh orang ke dia alit ati. Jesus nemu utai ke deka digaga sida. Bup Kudus madahka: ‘Lebuh Jesus nemu sida baru deka datai lalu mejalka iya nyadi  raja, iya niki ngagai bukit baru, kediri iya aja.’ (Jhn. 6:10-15) Hari siti, bala orang nya udah diau jenuh. Jesus udah nya nerangka, iya ukai datai nyediaka utai ti diguna sida besehari-hari tang ngajar sida pasal Perintah Petara. Ku iya madah ngagai sida: “Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya.”—Jhn. 6:25-27.

 6. Baka ni Jesus enggau terang nunjukka iya enggai merintah ba dunya tu? (Peda gambar kesatu ba pun artikel.)

⁶ Enda lama sebedau Jesus mati, Jesus nemu sekeda ari bala murid iya pechaya iya deka berengkah merintah nyadi raja di Jerusalem. Jesus madahka siti sempama pasal duit emas kena nulung sida nemu iya enda nyadi raja di Jerusalem. Sempama nya pasal “siku orang ke tinggi pangkat,” iya nya Jesus, ke deka lama ninggalka menua diri. (Luk. 19:11-13, 15) Jesus mega enggau terang madahka diri enda ngarika siti-siti politik ba dunya tu ngagai pegawai Rome Pontius Pilate. Ku Pilate nanya Jesus: ‘Kati nuan Raja orang Judah?’ (Jhn. 18:33) Pilate engka nangi enggaika Jesus nyungkak orang angkat ngelaban orang Rome. Tang ku Jesus nyaut: ‘Perintah aku ukai ari dunya tu.’ (Jhn. 18:36) Jesus enggai enggau politik ba dunya, laban Perintah iya ba serega. Iya madahka pengawa iya ba dunya nya “besaksika pasal pemendar.”—Bacha John 18:37.

 7. Nama kebuah nya tusah deka nyeliah ari nyukung raban politik indah dalam ati kitai?

⁷ Jesus nemu pengawa ke patut digaga iya. Enti kitai nemu pengawa ke patut digaga kitai, kitai deka nyeliah ari nyukung semua raban politik, indah dalam ati kitai. Tu enda seruran senang. Seiku tuai ti ngabas madahka orang di menua iya majak ngelaban perintah. Sida temegah amat enggau bansa diri lalu ngumbai pengidup sida deka manah agi enti sida  diperintah bansa diri. Ku iya agi: “Tang baik ga, bala menyadi Kristian nyaga penyerakup enggau beberatka pengawa nusui berita manah pasal Perintah Petara. Sida ngarapka Petara mutarka pengawa ti enda lurus sereta penanggul bukai ke ditapi kitai.”

 8. Nama pengawa enda lurus ke ditapi orang Judah maya jeman Jesus?

⁸ Lebuh orang meda utai ti enda lurus nyadi ngelingi sida, tu ngasuh sida deka agi enggau politik. Maya jeman Jesus, pengawa mayar chukai ngasuh mayuh orang nyukung siti-siti politik. Indah, Judas ari Galili angkat ngelaban perintah Rome ketegal orang Rome ngitung tubuh kena nentuka orang mayar chukai. Lalu bisi mayuh chukai ke patut dibayar, baka chukai reta, tanah, enggau rumah. Pia mega, bala pengumpul chukai nya balat enda lurus, lalu tu ngasuh penanggul nya majak besai. Sida kadang-kadang mayar pegawai perintah ngambika bulih hak ngumpul chukai lalu udah nya ngena kuasa sida ngulihka mayuh duit. Sakius, kepala pengumpul chukai di Jeriko, nyadi kaya ketegal iya ngakal orang ngambika orang mayar lebih.—Luk. 19:2, 8.

9, 10. (a) Baka ni bala munsuh Jesus nguji deka manjuk iya ngambika kena parit isu politik? (b) Nama dipelajarka kitai ari saut Jesus? (Peda gambar kedua ba pun artikel.)

⁹ Bala munsuh Jesus nguji manjuk iya ngambika kena parit isu ke bekaul enggau mayar chukai. Sida nanya iya pasal “chukai” pala. Chukai nya sesingkap duit pirak, lalu patut dibayar tiap iku orang Judah. (Bacha Matthew 22:16-18.) Orang Judah begedika chukai tu laban nya ngingatka sida dipegai perintah Rome. “Bala nembiak Herod,” iya nya bala orang ke nyukung penemu politik Herod, ngarapka Jesus deka madahka sida enda patut mayar chukai. Enggau tu sida ulih nuduh iya nyadi munsuh Perintah Rome. Tang enti Jesus madahka sida patut mayar chukai, orang tentu enggai agi nitihka iya. Nya alai nama digaga Jesus?

¹⁰ Jesus nunjukka diri mengkang neutral ba pekara tu. Ku iya madah: ‘Utai Raja Besai, beri ngagai Raja Besai, utai Petara, beri ngagai Petara.’ (Mat. 22:21) Jesus nemu mayuh ari bala pengumpul chukai nya enda lurus, tang iya enda kiruhka pekara nya. Iya beberatka utai ti ulih mutarka penusah mensia, iya nya Perintah Petara. Jesus netapka teladan ke kitai. Kitai enda patut masuk champur ba isu politik, taja pan raban politik nya baka ke betul sereta lurus, lalu siti agi raban nya baka ke salah sereta enda lurus. Orang Kristian patut ngenuluka Perintah Petara sereta utai ti dikumbai Petara ngena. Ketegal tu, kitai nadai ngembuan runding ti enda manah pasal pengawa ti enda lurus tauka mantah pengawa nya.—Mat. 6:33.

11. Baka ni kitai ulih nulung orang bulih pengelurus ti bendar?

¹¹ Mayuh ari Saksi-Saksi Jehovah udah mujur muai runding ti enda manah pasal politik ke kala dikembuan sida. Ambika chunto, sebedau belajarka pemendar, seiku menyadi Kristian indu di Britain belajar pasal sosialogi ba universiti lalu ngemansangka penemu ti enda manah pasal politik. Iya madahka: “Aku deka ngetanka hak orang ke bekulit chelum, laban kami udah balat merinsa ketegal  pengawa ti enda lurus. Taja pan aku selalu menang lebuh bekelikuh pasal utai ke enda lurus ke nyadi ba orang ke bekulit chelum, tang pengujung iya aku agi enda lantang ati. Aku enda sedarka utai ke ngasuh pengawa enda lurus ke ninggang siti-siti bansa nya patut dibuai ari ati orang. Tang pengudah berengkah belajarka Bup Kudus, aku nyau sedar aku patut muai utai nya dulu ari ati aku.” Lalu seiku menyadi Kristian indu ke bekulit burak udah nulung iya ngubah utai ti diasai ba ati iya. Ku iya nambah: “Diatu aku nyadi pengerintis biasa enggau eklisia ke ngena jaku bengal-bisu, lalu aku belajar nulung semua bansa orang.”

12. Nama bansa “ragi” ke diasuh Jesus seliahka bala murid iya?

¹² Maya jeman Jesus, bala tuai pengarap suah nyukung raban politik. Ambika chunto, bup Daily Life in Palestine at the Time of Christ madahka orang Judah bepechah nyadi beberapa buah raban pengarap ke baka parti politik. Nya alai Jesus nangkan bala murid iya: “Bejimat kita, sereta bejaga ari ragi orang Parisi, enggau ragi Herod.” (Mrk. 8:15) Lebuh Jesus nyebut pasal Herod, iya engka nyebut pasal raban ke nitihka Herod. Seraban agi, iya nya orang Parisi, dekaka orang Judah bibas ari dipegai Perintah Rome. Nitih ku bup Matthew, Jesus mega nangkan bala murid iya ngambika bejaga ari orang Saduki. Orang Saduki dekaka perintah Rome terus merintah laban nya nulung sida ngembuan penuduk ti tinggi. Jesus ngasuh bala murid iya bejaga ari “ragi” tauka ajar, ari tiga buah raban tu. (Mat. 16:6, 12) Lalu jaku tangkan tu diberi Jesus enda lama pengudah orang dekaka iya nyadi raja.

13, 14. (a) Baka ni isu politik enggau jalai pengarap ulih ngujungka pengawa ti tau ngemedis sereta enda lurus? (b) Nama kebuah enda tau kasar, indah lebuh kitai napi utai ke enda lurus? (Peda gambar ketiga ba pun artikel.)

¹³ Lebuh jalai pengarap masuk champur ba isu politik, nya suah ngujungka pengawa ti tau ngemedis. Jesus ngasuh bala murid iya meruan neutral. Nya kebuah bala tuai pengarap enggau orang Parisi deka munuh Jesus. Sida nangi enggaika orang mendingka Jesus lalu badu agi nitihka sida. Enti tu amat nyadi, sida deka lenyau kuasa ba jalai pengarap enggau politik. Ku sida: ‘Enti kitai nejuka iya majak ngereja nya, semua orang deka arapka iya, lalu orang Rome deka datai lalu ngerusak Rumah Sembiang enggau bansa kitai.’ (Jhn. 11:48) Nya alai, Imam Besai Kaiapas merambu deka munuh Jesus.—Jhn. 11:49-53; 18:14.

¹⁴ Kaiapas nganti hari nyau malam, nya baru iya nganjung bala soldadu nangkap Jesus. Tang Jesus nemu pasal sida ke deka munuh iya. Nya alai lebuh kepenudi Jesus makai enggau bala rasul iya, iya ngasuh sida mai dua bilah pedang, lalu nya chukup kena ngajar sida pasal siti utai ti beguna bendar. (Luk. 22:36-38) Malam nya mega, seraban orang mayuh  datai nangkap Jesus. Peter balat pedis ati enggau utai ke enda lurus nya. Nya alai iya nyintak pedang lalu nyerang seiku ari bala orang nya. (Jhn. 18:10) Tang ku Jesus madah ngagai Peter: “Selitka pedang nuan. Semua orang ke ngena pedang deka mati laban pedang.” (Mat. 26:52, 53) Nama utai beguna ke diajar Jesus ngagai bala murid iya? Sida patut nunjukka diri ukai enggi dunya. Tu meh utai ti disampika Jesus sebedau iya ditangkap. (Bacha John 17:16.) Semina Petara aja ke bisi hak mutarka utai ke enda lurus.

15, 16. (a) Baka ni Jaku Petara nulung orang Kristian nyeliahka laya? (b) Nama utai ke enda sama ti diperatika Jehovah ba dunya diatu?

¹⁵ Menyadi Kristian indu ari Eropah ke disebut ba pun artikel tadi belajarka utai ti sama. Ku iya madahka: “Aku beratika pengawa ti tau ngemedis nadai mai pengelurus. Orang ke ngena pengawa nya suah lenyau nyawa. Lalu mayuh ari sida ke bukai nya balat amat pedis ati. Aku berasai gaga lebuh nemu Bup Kudus madahka semina Perintah Petara aja ke ulih mai pengelurus ti bendar ngagai dunya. Kenyau ari 25 taun ti udah, nya pesan ti ditusui aku lebuh nginjil.” Menyadi Kristian lelaki ari Afrika nganti sangkuh iya ngena “pedang ti diberi roh kudus Petara,” iya nya Jaku Petara. (Eps. 6:17, NW) Diatu iya nusui pesan pasal pemaik ngagai semua bansa orang, enda ngira nama raban bansa sida. Lalu pengudah menyadi Kristian indu ari Eropah nyadi Saksi Jehovah, iya jadi enggau menyadi Kristian lelaki ari raban etnik ke kala dipegedika iya suba. Sida tiga ngaga ubah ketegal deka neladan Jesus.

¹⁶ Endang beguna ngaga ubah tu! Bup Kudus madahka mensia baka tasik ti enda ngetu begelumbang, ti enda nemu badu ngalun ngagai tebing. (Isa. 17:12; 57:20, 21; Pem. 13:1) Isu politik ulih ngachau sereta mechah-belahka orang, lalu ngujungka pengawa ti tau ngemedis. Tang kitai bisi pemaik enggau penyerakup. Jehovah tentu gaga ati meda bala nembiak Iya beserakup enti dibandingka enggau orang ba dunya ke balat bepechah-belah.—Bacha Sepaniah 3:17.

17. (a) Nama tiga iti chara kitai ulih ngemansangka penyerakup? (b) Nama deka dikerandauka kitai ba artikel pengudah tu?

¹⁷ Ba artikel tu, kitai nemu kitai ulih ngemansangka penyerakup ngena tiga iti chara: (1) Kitai andalka Perintah Petara deka ngaduka semua utai ti enda lurus, (2) kitai enda masuk champur ba isu politik, lalu (3) kitai nulak pengawa ti tau ngemedis. Tang bisi utai bukai ke ngachau penyerakup kitai iya nya ulah ti bepilih mata. Ba artikel pengudah tu, kitai deka belajarka chara kitai ulih mutarka ulah ti bepilih mata, baka orang Kristian ba abad keterubah.