1, 2. (a) Nama dikerandauka Jesus enggau bala murid iya ba malam sebedau iya mati? (Peda gambar ba pun artikel.) (b) Nama kebuah patut ingatka tuju kitai nginjil? (c) Nama deka dipejuraika kitai?

MALAM sebedau Jesus mati, iya bisi randau ti panjai enggau bala rasul iya. Iya deka sida nemu iya rinduka sida. Iya mega madah ngagai sida sempama pasal pun anggur ke udah dikerandauka iya ba artikel sebedau tu. Jesus deka meransang bala murid iya “bebuah lebat.” Dalam jaku Gerika reti jaku nya Jesus meransang sida terus bebuah lebat, iya nya, liat ati sereta tan lebuh nusui pesan pasal Perintah Petara.—Jhn. 15:8.

² Taja pia, Jesus ukai semina madah pasal utai ti patut digaga bala murid iya, tang mega madahka kebuah sida patut ngereja nya. Iya meri sida kebuah patut terus nginjil. Kitai mega patut ingatka kebuah kitai patut terus nginjil. Berundingka utai tu deka meransang kitai liat ati sereta tan lebuh meri “saksi ngagai semua bansa.” (Mat. 24:13, 14) Ba artikel  tu, kitai deka bejuraika empat iti kebuah ari Bup Kudus ke nunjukka kitai nginjil. Kitai mega deka bejuraika empat iti utai manah ke diberi Jehovah kena nulung kitai terus bebuah.

3. (a) Nitih ku John 15:8, nama kebuah kesatu kitai nginjil? (b) Nama digambarka buah anggur ba sempama Jesus, lalu nama kebuah sempama nya engkeman?

³ Kebuah kesatu kitai nginjil laban kitai deka ngemuliaka Jehovah sereta nguduska nama Iya. (Bacha John 15:1, 8.) Lebuh Jesus nyebut sempama pasal pun anggur, iya nyemaka Jehovah nya enggau tukang kebun ke nanam anggur. Jesus madahka diri nya pun anggur, lalu bala murid nya dan. (Jhn. 15:5) Nya alai ba sempama nya, buah anggur ngambarka buah ti diasilka bala murid Jesus, tauka pengawa nginjil ke dikereja sida. Jesus madah ngagai bala rasul iya: ‘Apai aku dimuliaka, enti kita bebuah lebat.’ Lebuh pun anggur ngasilka buah anggur ti manah, nya ngenataika mulia ngagai tukang kebun. Pia mega, lebuh kitai enggau naka ulih nusui pesan pasal Perintah Petara, kitai ngenataika basa, tauka mulia ngagai Jehovah.—Mat. 25:20-23.

4. (a) Baka ni kitai ulih nguduska nama Petara? (b) Baka ni asai ati nuan ketegal bisi peluang nguduska nama Petara?

⁴ Nama Petara endang udah kudus. Nadai utai ulih digaga kitai ngambika nama nya kudus agi. Nya alai, baka ni kitai ulih nguduska nama Petara lebuh kitai nginjil? Peratika utai ti dipadah nabi Isaiah: ‘Ingat: Aku Jehovah ti Pemadu Bekuasa endang kudus.’ (Isa. 8:13) Kitai nguduska nama Petara, Jehovah, lebuh kitai ngumbai nama nya pemadu besai entara semua nama, sereta lebuh kitai nulung orang nemu nama nya endang kudus. (Mat. 6:9) Ambika chunto, lebuh kitai ngajar orang utai ti amat pasal kualiti Jehovah ti badas sereta tuju Iya ke deka mensia idup belama iya ba Paradais, kitai nulung sida nemu semua utai ti udah disebut Sitan pasal Jehovah nya bula magang. (P-kal. 3:1-5) Kitai mega nguduska nama Petara lebuh kitai nulung orang nemu Jehovah patut “nerima mulia, basa enggau kuasa.” (Pem. 4:11) Rune, ke udah 15 taun ngerintis, madahka: “Aku berasai beterima kasih laban nemu diri udah diberi peluang nyadi saksi ke Penempa dunya raya. Tu ngasuh aku keran agi deka terus nginjil.”

5. (a) Nitih ku John 15:9, 10, nama kebuah kitai nginjil? (b) Baka ni Jesus nulung bala murid iya nemu sida patut liat ati sereta tan?

⁵ Bacha John 15:9, 10. Kebuah kedua kitai nusui pesan pasal Perintah Petara nya laban kitai rinduka Jehovah enggau Jesus. (Mrk. 12:30; Jhn. 14:15) Jesus ngasuh bala murid iya ‘meruan dalam pengerindu iya.’ Nama kebuah? Laban iya nemu sida begunaka ati ti liat  sereta tan enti deka nyadi orang Kristian ti bendar. Indah ba John 15:4-10, kitai beratika Jesus suah ngena leka jaku “meruan” kena nulung bala murid iya nemu sida patut liat ati sereta tan.

6. Baka ni kitai nunjukka diri deka meruan dalam pengerindu Kristus?

⁶ Baka ni kitai nunjukka diri deka meruan dalam pengerindu Kristus sereta diterima iya? Kitai ngasika iya. Jesus semina ngasuh kitai ngereja utai ti bisi dikereja iya. Ku iya madahka: ‘Aku ke udah ngasika pesan Apai, lalu meruan dalam pengerindu Iya.’ Jesus netapka teladan ke kitai.—Jhn. 13:15.

7. Baka ni ulah ti ngasi bekaul enggau pengerindu?

⁷ Jesus enggau terang madahka ulah ti ngasi nya bekaul enggau pengerindu lebuh iya nyebut: ‘Orang ke nerima lalu ngasika pesan aku, nya meh orang ke rinduka aku.’ (Jhn. 14:21) Pesan Jesus datai ari Apai iya, nya alai lebuh kitai ngasika pesan iya ti ngasuh nginjil, kitai mega nunjukka diri rinduka Jehovah. (Mat. 17:5; Jhn. 8:28) Lalu lebuh kitai nunjukka diri rinduka Jehovah enggau Jesus, seduai iya deka meruan rinduka kitai.

8, 9. (a) Nama siti agi kebuah kitai nginjil? (b) Baka ni jaku Jehovah ba Esekiel 3:18, 19 enggau 18:23 meransang kitai terus nginjil?

⁸ Kebuah ketiga kitai nginjil laban kitai deka nangkan orang pasal penatai hari Jehovah. Bup Kudus madahka, Noah bisi “ngajar.” (Bacha 2 Peter 2:5.) Sebedau Bah Besai datai, pesan Noah ngagai orang nya nyengkaum jaku tangkan pasal pengerusak ti deka datai. Nama kebuah kitai ngumbai baka nya? Laban Jesus madahka: “Laban berapa hari sebedau bah besai nyadi, orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia.” (Mat. 24:38, 39) Taja pan mayuh orang enda bedulika Noah, tang iya enggau tetap ati nusui jaku tangkan ke diberi Jehovah ngagai iya.

⁹ Kemayaharitu, kitai nusui pesan pasal Perintah Petara ngambika orang bisi peluang nemu utai ti deka digaga Petara ke mensia jemah ila. Baka Jehovah, kitai deka orang beratika pesan nya lalu  “idup” belama iya. (Esk. 18:23) Lebuh nginjil ari rumah ke rumah sereta ba endur orang mayuh, kitai enggau naka ulih nangkan orang pasal Perintah Petara ti deka datai lalu ngerusak dunya ti jai tu.—Esk. 3:18, 19; Dan. 2:44; Pem. 14:6, 7.

10. (a) Nitih ku Matthew 22:39, nama kebuah kitai nginjil? (b) Baka ni Paul seduai Silas nulung seiku jejaga rumah jil di Pilipi?

¹⁰ Kebuah keempat kitai terus nginjil laban kitai rinduka orang. (Mat. 22:39) Pengerindu tu nulung kitai terus nginjil laban ulah enggau runding orang ulih berubah lebuh bisi utai ti berubah ba sida. Ambika chunto, orang ke ngelaban nutup Paul seduai Silas dalam rumah jil di nengeri Pilipi. Tang kira ba urung tengah malam, tanah lalu ngenyit berenyang ngusak rumah jil nya lalu semua pintu ba rumah jil tebuka. Jejaga rumah jil deka munuh diri laban iya ngumbai orang jil udah rari. Tang Paul nagang iya enggau nyawa ti inggar: “Anang ngemediska diri!” Jejaga nya nanya: “Nama utai ti enda tau enda dikereja aku, ngambika aku diselamatka?” Ku Paul seduai Silas nyaut iya: ‘Arapka Tuan Jesus, lalu nuan deka diselamatka.’—SKR. 16:25-34.

11, 12. (a) Nama dipelajarka kitai ari cherita pasal jejaga rumah jil bekaul enggau pengawa nginjil? (b) Nama kebuah kitai deka terus nginjil?

¹¹ Nama dipelajarka kitai ari cherita pasal jejaga rumah jil bekaul enggau pengawa nginjil? Peratika, pengudah tanah berenyang nyadi, nya baru jejaga rumah jil ngubah runding lalu minta bantu. Pia mega, sekeda orang ke enggai ningaka pesan Bup Kudus engka ngubah runding sida lalu minta bantu pengudah penusah ti besai ninggang sida. Ambika chunto, sekeda orang engka tekenyit ketegal sida lenyau kereja tauka sarak. Sekeda nya engka balat tusah ati ketegal nemu diri kena penyakit ti raya tauka ketegal orang ti rapat enggau sida udah nadai agi. Lebuh utai nya nyadi, orang engka berengkah bisi tanya ti bekaul enggau pengidup ke enda kala mansa runding sida ngelama tu. Sida engka deka nemu, ‘Nama utai ti enda tau enda dikereja aku, ngambika ulih diselamatka?’ Ari nya, sida engka berengkah deka ningaka pesan ke dibai kitai pasal utai manah ke deka nyadi jemah ila.

¹² Nya alai, enti kitai terus nginjil enggau tetap ati, kitai ulih nulung lebuh orang udah sedia nerima pengelantang ke dibai kitai. (Isa. 61:1) Charlotte, ke udah 38 taun ngerintis, madahka: “Orang kemayaharitu enda nemu tuju pengidup sida. Sida patut diberi peluang ninga berita manah.” Ejvor, ke udah 34 taun ngerintis, madahka: “Kemayaharitu, majak mayuh orang ke lemi ba emosi. Aku keran deka nulung sida. Nya meransang aku nginjil.” Amat, pengerindu ke orang nya kebuah ti badas deka terus nginjil!

13, 14. (a) Nama utai manah ti dipadah ba John 15:11? (b) Baka ni kitai tau bulih pengaga ke dikembuan Jesus? (c) Baka ni pengaga ulih nulung kitai ba pengawa nginjil?

¹³ Maya malam sebedau Jesus mati, iya mega nyebut pasal utai manah ke ulih nulung bala rasul iya terus bebuah. Nama sekeda utai nya, lalu baka ni utai nya ulih nulung kitai kemayaharitu?

¹⁴ Pengaga ati. Kati pengawa nginjil nya utai ti nating kitai? Enda. Pengudah  Jesus nyebut sempama pasal pun anggur, iya madahka kitai deka ngembuan pengaga iya lebuh kitai nginjil. (Bacha John 15:11.) Kati nya amat ulih? Kingatka, dalam sempama Jesus, iya nyemaka diri enggau pun anggur, lalu bala murid nya dan. Dan pun anggur bulih ai enggau nutrien enti dan nya mengkang bejantil enggau pun anggur. Pia mega, kitai ulih gaga baka Jesus enti kitai meruan beserakup lalu enggau naka ulih nitihka singkang iya. Udah nya, kitai deka bisi pengaga ke dikembuan iya, pengaga ti datai ari ngereja peneka Petara. (Jhn. 4:34; 17:13; 1 Pet. 2:21) Hanne, ke udah lebih 40 taun ngerintis, madahka, “Pengaga ke seruran diasaika aku pengudah enggau pengawa nginjil meransang aku terus gawa ke Jehovah.” Pengaga deka meri kitai pengering ngambika terus nginjil indah lebuh mayuh orang enggai ninga.—Mat. 5:10-12.

15. (a) Nama utai manah ke dipadah ba John 14:27? (b) Baka ni pemaik nulung kitai terus bebuah?

¹⁵ Pemaik. (Bacha John 14:27.) Sebedau Jesus mati lemai nya, iya madah ngagai bala rasul iya: ‘Pemaik aku diberi aku ngagai kita.’ Baka ni pemaik ke diberi Jesus ulih nulung kitai terus nginjil? Enti kitai terus nginjil, kitai ngasaika pemaik laban nemu diri ngelantangka ati Jehovah enggau Jesus. (Mas. 149:4; Rom. 5:3, 4; Kol. 3:15) Ulf, ke udah 45 taun ngerintis, madahka, “Taja pan berasai lelak lebuh enggau pengawa nginjil, tang nya ngasuh ati aku berasai puas sereta bisi tuju ba pengidup.” Kitai berasai beterima kasih laban pengujung iya kitai bulih pemaik ti meruan!

16. (a) Nama utai manah ke dipadah ba John 15:15? (b) Baka ni bala rasul ulih meruan nyadi pangan Jesus?

¹⁶ Bisi kaul enggau Jesus. Pengudah Jesus madahka iya deka bala rasul iya gaga ati, iya nerangka kebuah sida patut mandangka pengerindu ti enda berundingka diri empu. (Jhn. 15:11-13) Udah nya iya madahka: ‘Aku udah ngumbai kita pangan.’ Ulih nyadi pangan Jesus nya endang utai ti berega! Tang baka ni bala rasul ulih meruan nyadi pangan iya? Jesus nerangka: “Bejalai lalu bebuah lebat.” (Bacha John 15:14-16.) Reti nya, terus nginjil. Kira-kira dua taun sebedau nya, Jesus ngasuh bala rasul iya: “Lebuh kita bejalai,  padahka Berita Manah tu: ‘Perintah serega nyau semak!’” (Mat. 10:7) Nya kebuah ba malam sebedau Jesus mati, iya ngasuh bala murid iya tan ba pengawa nginjil. (Mat. 24:13; Mrk. 3:14) Jesus tentu nemu nitihka pesan iya enda senang. Tang sida ulih ngereja nya sereta meruan nyadi pangan iya. Baka ni? Enggau bantu ari siti agi utai manah.

17, 18. (a) Nama utai manah ke dipadah ba John 15:7? (b) Baka ni utai manah nya ulih nulung bala murid Jesus? (c) Nama sekeda utai manah ke ulih nulung kitai kemayaharitu?

¹⁷ Sampi kitai disaut. Jesus madahka: “Pinta sebarang utai ti dikedekaka kita, lalu utai nya deka dikereja ke kita.” (Jhn. 15:7, 16) Semaya ari Jesus tentu udah ngeringka bala rasul iya! * (Peda nota kaki.) Bala rasul enda tentu nemu pasal Jesus ke enda lama da agi deka mati. Tang pemati iya ukai reti sida nadai agi bulih bantu. Jehovah deka nyaut sampi sida sereta nyaup sida ba pengawa nginjil. Lalu nya meh utai ti digaga Jehovah. Enda lama pengudah Jesus mati, bala rasul minta Jehovah meri sida pemerani, lalu Jehovah nyaut sampi sida.—SKR. 4:29, 31.

¹⁸ Sama mega kemayaharitu. Lebuh kitai liat ati sereta tan ba pengawa nginjil, kitai meruan nyadi pangan Jesus. Lalu kitai andalka Jehovah deka nyaut sampi kitai ke minta bantu lebuh kitai ngasaika diri tusah nginjil. (Plp. 4:13) Kitai amat beterima kasih laban Jehovah nyaut sampi kitai, lalu bisi Jesus nyadika pangan. Semua utai manah ari Jehovah nya ngeringka kitai ngambika ulih terus bebuah.—Jas. 1:17.

19. (a) Nama kebuah kitai terus nginjil? (b) Nama nulung kitai nembuka pengawa ti udah diberi Jehovah?

¹⁹ Ba artikel tu, kitai udah belajarka empat iti kebuah kitai patut terus nginjil: ngemuliaka Jehovah sereta nguduska nama Iya, mandangka pengerindu kitai ngagai Jehovah enggau Jesus, nangkan orang, sereta mandangka diri rinduka orang. Kitai mega udah belajar pasal empat iti utai manah: pengaga, pemaik, kaul enggau Jesus, sereta sampi kitai disaut. Semua utai manah tu ngeringka kitai ngambika ulih nembuka pengawa ti udah diberi sereta diasuh Jehovah kereja kitai. Jehovah gaga ati lebuh Iya meda kitai bebendar deka “bebuah lebat”!