Rose madahka: “Aku bisi penyakit genetik ti semampai ngasuh aku balat pedis. Pengidup aku majak merinsa.” Siti ari pengirau Rose iya nya kekadang iya enda ulih betumpu lebuh belajarka Bup Kudus tauka berunding pasal sembah iya ngagai Petara. Tang iya bulih tulung ari jaku Jesus ba Matthew 19:26: ‘Ba Petara semua utai ulih magang.’ Rose nemu bisi chara bukai kena belajar. Ketegal iya tusah deka macha lebuh iya ngasaika pemedis, iya berengkah ninga audio Bup Kudus enggau litaricha ke dirikut. * Ku iya, “Enti nadai semua perengka tu, aku enda nemu baka ni aku ulih negapka kaul aku enggau Petara.”

Lebuh Rose tusah ati ketegal enda ulih ngereja utai baka ke kala dikereja iya ngelama tu, iya tetemuka pengelantang ba 2 Korint 8:12: “Laban enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita.” Jaku tu ngingatka Rose, Petara lantang ati meda utai ke dikereja iya laban iya ngereja nya nitihka naka ulih iya.

Delphine ngenang baru: “Pengudah anak indu aku ke beumur 18 taun nadai, pemerinsa aku majak balat nyentukka aku enda pechaya aku agi ulih neruska pengidup. Pengidup aku enda baka selama.” Iya tetemuka pengelantang, ari jaku ba Masmur 94:19, pemasmur madahka ngagai Petara: “Lebuh ati aku mayuh pengirau, Nuan merindang aku, lalu ngasuh ati aku gaga.” Ku iya madah, “Aku besampi ngagai Jehovah ngambika nulung aku ngiga utai ke ulih ngelantangka aku.”

Iya ngena awak iya kisuk enggau pengawa sukarela. Nyau kelama, iya mandingka diri enggau krayon—taja pan krayon nya patah tang agi beguna kena nyura. Sama mega, taja pan iya ngasaika diri balat merinsa, tang iya agi beguna kena mantu orang bukai. Iya madah: “Diatu aku nemu lebuh aku ngena prinsip enggau ajar Bup Kudus pasal pemati kena ngelantangka pemelajar Bup Kudus aku, nya siti chara Jehovah ngelantangka aku.” Iya ngaga lis nama orang ke disebut ba Bup Kudus ke napi pemerinsa ti sama. Ku iya, “Endang amat, sida orang ke suah besampi.” Delphine mega belajar “nuan enda ulih tetemuka saut enti nuan enda muka Bup Kudus.”

Ari belajarka Bup Kudus, Delphine bulih penemu ke bukai iya nya nguingka runding ngagai utai ti deka nyadi dudi hari, ukai utai ti udah nyadi. Pengadang ke disebut ba Kereja Rasul 24:15 ngelantangka iya: “Semua orang ke lurus enggau ke enda lurus deka diangkatka ari mati.” Ni pemesai pengandal Delphine ngagai Jehovah ke deka ngidupka baru anak indu iya? Ku Delphine: “Aku meda anak aku ba dunya baru. Maya kami ‘betemu’ udah diatur lalu tu bisi ba kelinda Jehovah. Aku meda kami duai begulai ba kebun bungai kami, lalu tu nyata baka aku ke meda sereta sayauka iya ba hari iya ada.”