Petara meresa runding kitai. (Jeremiah 17:10) Nyadi, kitai ukai semina deka nyeliahka ari nyebut utai tauka ngereja nama-nama utai ke nunjukka ati ti begedi. Tang kitai mega patut enggau lengkas ngetu berundingka utai ke ngasuh kitai begedi. Tu ketegal ati ti begedi berengkah ari ati enggau runding. Enti ati ti begedi dibuai, nya baru kitai ulih “ngubah runding” lalu ngetuka pemenchi.

Peresa meh runding enggau asai ati nuan ngagai orang bukai, kelebih agi orang ari bansa enggau menua bukai. Tanya meh diri empu: ‘Nama runding aku pasal sida? Kati runding ke dikembuan aku tu ketegal aku amat-amat ngelala sida? Tauka ketegal aku bisi runding ti salah?’ Kelimpah ari nya, seliahka media sosial, wayang tauka pemerindang ke meransang pemenchi sereta ganas.

Kekadang kitai nemu nipu diri. Tang Bup Kudus ulih nulung kitai meresa “runding enggau niat ati.” (Hebrew 4:12) Nyadi, terus meh mansik Bup Kudus. Bandingka runding nuan enggau ajar Bup Kudus lalu naka ulih ngemansangka runding ti ngelantangka ati Petara. Jaku Petara amat ulih nulung kitai muai pemenchi ke udah beurat dalam runding enggau ati kitai.—2 Korint 10:4, 5.