Nama Kebuah Ati ti Begedi Tau Bisi?
Nama kebuah asai ati ti begedi tau bisi ba dunya tu? Kena nemu saut iya, kitai patut nemu reti begedi, kebuah iya, sereta baka ni iya tau ngerampit orang.
Nama Reti Begedi?
Orang ke ngembuan ati ti begedi deka bemunsuh, tauka enda rinduka seseiku orang tauka sesiti raban. Asai ati tu deka majak balat ba timpuh ti lama.
KEBUAH ORANG BEGEDI
Bisi mayuh kebuah orang begedi. Suah iya, seseiku orang begedi ke orang bukai ukai ketegal utai ke dikereja sida, tang ketegal sapa sida. Iya engka ngumbai orang ke dipegedika iya nya jai, bisi ati ti enda manah, tauka enda ulih berubah nyadi orang ke manah agi. Kelimpah ari nya, iya engka ngemaruhka orang nya, ngumbai orang nya bahaya, tauka orang ke selalu mai penusah. Biasa iya, orang bisi asai ati ti baka tu ngagai orang bukai, laban iya engka kala nyadi mansa utai ti enda lurus tauka bisi pengalaman ti enda manah.
CHARA TU BERAMPIT
Taja pan bedau kala betemu, tang seseiku orang ulih begedika orang bukai. Ngambika chunto, enti diri sebilik tauka kaban iya begedika seseiku orang, iya pan engka tetitihka runding sida. Ari tu kitai nemu, ati ti begedi ulih ngerampit orang enggau senang. Pandakka jaku, enti beberapa iku orang dalam siti raban begedika raban bukai, nyau kelama asai ati ti begedi nya ulih ngerampit semua orang dalam raban nya.
Ketegal ati ti begedi ulih berampit enggau senang, nyadi kitai enda tekenyit enti penanggul tu majak balat kemayaharitu. Tang, ari ni penatai ati ti begedi tu? Bup Kudus bisi saut tanya tu.
BUP KUDUS NERANGKA PENATAI ATI TI BEGEDI
ATI TI BEGEDI UKAI DATAI ARI MENSIA. Ati ti begedi berengkah lebuh seiku melikat ba serega ngelaban Petara, lalu naburka pemula pasal Petara. Udah nya, melikat tu dikumbai Antu Sitan. Sitan endang “pemunuh kenyau ari pun.” Ketegal iya ‘endang pemula enggau apai pemula,’ iya meransang ati ti begedi sereta ngasuh orang nyadi ganas. (John 8:44; 1 John 3:11, 12) Bup Kudus nerang, Sitan nya roh ti jai, ganas sereta seruran ringat.—Jop 2:7; Pemandang 12:9, 12, 17.
MENSIA TI ENDA SEMPURNA SENANG NGAYANKA ATI TI BEGEDI. Adam iya nya mensia ti keterubah, nitihka Sitan. Asil iya, semua mensia bedosa enggau enda sempurna. (Rome 5:12) Chunto iya Kain, iya nya anak tuai Adam begedika madi iya Abel, lalu munuh iya. (1 John 3:12) Amat, bisi mayuh orang ngembuan asai ati ti kasih sereta sinu. Tang, ketegal dosa ari Adam mayuh orang ngembuan ulah ti berundingka diri empu, chemburu sereta sumbung. Nyadi, ulah ke baka tu ngadaka ati ti begedi.—2 Timoti 3:1-5.
ULAH TI ENDA PEDULIKA ORANG BUKAI MERANSANG ATI TI BEGEDI. “Semua dunya di baruh kuasa Sitan.” Nya kebuah, dunya kitai diatu meransang orang ngembuan ulah enggau pengawa ti jai. Nyadi enda iran, enti ulah ti enda peduli, salah sangka, bejai orang, buli, sereta ngerusak reta tengkira majak balat.—1 John 5:19.
Bup Kudus ukai semina madahka penatai ati ti begedi aja, tang mega nerangka baka ni penanggul ati ti begedi tu ulih diputarka.
Nuan Engka Rindu Meda Tu
SAUT NGAGAI TANYA PASAL BUP KUDUS
Kati Antu Sitan nya Digaga Petara?
Ari ni asal Antu Sitan? Nama kebuah Jesus madahka ba John 8:44, Sitan ‘[enda bepegai teguh, NWT] enggau pemendar?’
SAUT NGAGAI TANYA PASAL BUP KUDUS
Ari Ni Penatai Dosa?
Ketegal Adam enggau Awa bedosa, semua peturun tauka purih iya mega sama bedosa. Tu sempama penyakit ke datai ari peturun.
