Kitai engka berasai nadai daya lebuh kaban kitai merinsa ketegal penanggul ba pengerai mental. Tang kitai ulih nunjukka diri ibuhka sida enggau nulung sida napi penanggul nya. Baka ni?

“Jampat ninga.”—JAMES 1:19.

Siti chara ti pemadu manah kena nulung kaban nuan iya nya, sanggup ninga semua asai ati iya. Tunjukka nuan amat ningaka iya sereta ibuhka iya. Pia mega, uji meh faham asai ati iya, lalu anang ngakim iya. Kingatka, iya engka ulih nyebut utai ke ngasuh iya nesal dudi hari, tang nya ukai niat ati iya.—Jop 6:2, 3.

“Nyebut jaku ti ngelantangka ati.”—1 TESALONIKA 5:14.

Kaban nuan engka berasai irau tauka iya engka ngasaika diri nadai guna. Enti nuan nunjukka diri ibuhka iya, nuan ulih ngelantangka ati iya taja nuan engka enda nemu nama patut disebut nuan.

“Pangan endang seruran ngayanka pengerindu sida.”—JAKU-DALAM 17:17.

Beri meh bantu ti ngena. Ari ke ngumbai diri nemu chara ti pemadu manah kena nulung, tanya meh nama utai ke ulih ditulung nuan. Enti kaban nuan tusah madahka utai ke diguna iya, uji meh meri sekeda cadangan ti ngena ke ulih digaga seduai begulai. Chunto iya,  sama begulai bejalai. Tauka nuan mega ulih madahka diri deka nulung iya bebelika barang, meresi tauka ngereja sekeda pengawa bukai.—Galatia 6:2.

“Sabar.”—1 TESALONIKA 5:14.

Kaban nuan engka enda seruran sedia deka berandau. Padahka diri gaga ati deka ningaka iya sebarang maya iya deka berandau. Ketegal penyakit iya, kaban nuan engka nyebut tauka ngereja utai ke ulih ngemediska ati nuan. Iya engka nginsil janji enggau nuan tauka iya enda memukai bad mood. Sabar meh sereta uji faham seraya nuan nulung iya.—Jaku-Dalam 18:24.

“Aku nentuka diri ulih nyadi siku kaban ke dikearapka iya. Taja pan aku nadai daya mutarka penanggul iya, tang aku seruran nguji mendingka utai ke disebut iya. Kekadang, iya semina begunaka orang ningaka asai ati iya. Nya baru iya ulih berasai nyamai.”—Farrah, a kaban siku orang ke bisi penyakit penanggul ba chara makai, balat irau sereta kemurungan.

“Siku ari kaban aku amat manah ati sereta selalu meransang. Iya mai aku ngagai rumah iya makai begulai. Ketegal aku selesa enggau iya, senang agi alai aku mansutka asai ati ngagai iya. Tu amat meransang aku!”—Ha-eun, ke bisi penyakit kemurungan.

“Sabar amat penting. Lebuh bini aku ngereja utai ke ngasuh aku tusah ati, aku ngingatka diri, tu ketegal penyakit iya, tang ukai ketegal iya ka baka nya. Tu nulung aku nyeliahka diri ari nyadi ringat, sereta enda kelalu berundingka diri empu.”—Jacob, ngembuan siku bini ke bisi penyakit kemurungan.

“Bini aku mayuh nyukung sereta ngelantangka ati aku. Lebuh aku berasai balat irau, iya nadai kala mejal aku ngereja utai ke enggai dikereja aku. Ketegal tu, kekadang bini aku enda ulih ngereja utai ke dikerinduka iya empu. Iya amat berega ba aku laban iya amat gerah jari sereta enda berundingka diri empu.”—Enrico, ke bisi penyakit balat irau tauka anxiety.