Petara Jehovah ngasuh kitai madahka Iya semua utai ke ngachau runding enggau ati kitai. (Masmur 55:22) Nuan ulih besampika semua utai ngagai Iya, enda ngira utai ti mit tauka besai. Enti nuan ngasaika utai nya penting, Jehovah mega ngasaika utai ti sama laban Iya ibuhka kitai. Besampi ulih ngasuh nuan ngasaika pengelantang ba ati enggau runding.—Pilipi 4:6, 7.

Lebuh kitai napi penanggul ba pengerai mental, kitai engka berasai kediri aja. Orang bukai enda seruran faham semua utai ke diasaika kitai. (Jaku-Dalam 14:10) Tang enti kitai madahka Jehovah semua utai ke diasaika kitai nengah sampi, Iya seruran deka ningaka kitai lalu ulih faham asai ati kitai. Jehovah meda kitai, lalu Iya nemu pemerinsa ke benung ditatka kitai. Nya kebuah Iya dekaka kitai besampi ngagai Iya pasal semua utai ke ngasuh kitai irau.—2 Bansa Israel 6:29, 30.

Lebuh kitai besampi ngagai Jehovah, kitai ulih andal Iya ibuhka kitai. Kitai ulih ngasaika utai ti disebut pemasmur dalam sampi iya: “Nuan udah meda pemerinsa aku. Nuan nemu penusah aku.” (Masmur 31:7) Lebuh kitai nemu Jehovah bisi meda penusah ke benung ditapi kitai, nya ulih nulung kitai terus ngelaban penusah nya. Tang Iya ukai semina meda aja. Lebih ari semua orang bukai, Iya ulih faham utai ke benung ditapi kitai lalu nulung kitai bulih pengelantang enggau peransang nengah Bup Kudus.