1. Nama nyadi lebuh Jerusalem dirusak?

BA TAUN 607 sebedau Kristus ada, Raja Nebukadnesar II enggau raban soldadu iya ti besai nyerang nengeri Jerusalem. Bup Kudus madahka, raja nya munuh bala orang Judah ke bujang ngena pedang. “Iya nadai kasih mimit ke sida, nemuka sida nya orang ke biak tauka tuai, lelaki tauka indu, sakit tauka bepengerai.” Pengujung iya, “iya nunu Rumah Sembiang, enggau nengeri Jerusalem, nyengkaum semua istana enggau pengaya nengeri nya, lalu ngeruntuhka kuta nengeri.”—2 Ban. 36:17, 19.

2. Nama tangkan ke diberi Jehovah, lalu nama deka nyadi ba orang Judah?

² Orang Judah enda patut tekenyit enggau pengerusak ke ninggang Jerusalem. Betaun-taun Petara udah nganjung bala nabi ngambika nangkan orang Judah. Enti sida majak enda ngasika Iya, sida deka di serang orang Babilon. Mayuh orang Judah deka dibunuh ngena pedang, lalu sida ke selamat deka nyadi orang tangkap ba menua Babilon. (Jer. 15:2) Baka ni gaya pengidup nyadi orang tangkap? Kati utai ti sama kala nyadi ba orang Kristian? Enti kala, kemaya?

3. Baka ni pengidup nyadi orang tangkap ba Babilon enda sebaka ari pengidup nyadi ulun ba menua Ejip?

³ Jehovah udah madah ngagai orang Judah, sida deka ditaban nyadi orang tangkap, sida deka bisi chara pengidup ke baru sereta deka enggau naka ulih neruska pengidup. Iya madahka utai tu nengah Jeremiah: “Dirika rumah lalu ngentapka diri. Tumbuhka kebun lalu empa utai ti ditanam kita dalam kebun nya. Bekereja kita ke penguntung nengeri ti udah alai Aku muai kita. Besampi ngagai Aku ngarika sida, laban enti sida nyadi kaya-raja, kita empu deka mega nyadi kaya-raja.” (Jer. 29:5, 7) Orang Judah ke nitihka iring ari Jehovah neruska pengidup sida baka selama taja pan nyadi orang tangkap. Orang Babilon ngemendarka orang Judah ngatur nyauka semua pekara ba pengidup sida empu, lalu sida ulih mindah dalam menua nya enggau bibas. Maya nya, Babilon nyadi palan bedagang. Dokumen kelia nunjukka lebuh sida nyadi orang tangkap, mayuh orang Judah belajarka pengawa bedagang sereta nyadi tukang ke landik. Sekeda orang Judah indah nyadi kaya. Pengidup nyadi orang tangkap enda entu tusah baka pengidup orang Israel ke nyadi ulun ba menua Ejip beratus taun sebedau tu.—Bacha Pemansut 2:23-25.

4. Sapa mega sama merinsa, kelimpah ari orang Judah ke enda tetap ati, lalu nama kebuah sida enda entu ulih ngereja semua utai ti dikedekaka Adat?

⁴ Sekeda orang Judah ke ditaban nyadi orang tangkap nya nembiak Petara ke tetap ati. Taja pan sida nadai ngereja utai ti salah, sida sama merinsa enggau bansa Judah ke bukai. Orang Judah ngembuan utai ti diguna sida besehari-sehari, tang baka ni sida ulih nyembah Jehovah? Rumah Sembiang enggau alta udah dirusak, lalu bala imam enda ulih gawa enggau chara ti teratur. Tang orang Judah ke tetap ati enggau naka ulih nitihka Adat Petara. Ngambika chunto, Daniel, Sadrak, Mesak, enggau Abednego enggai makai pemakai ke enda tau diempa orang Judah. Lalu Bup Kudus madahka, Daniel enggau tetap besampi ngagai Petara. (Dan. 1:8; 6:10) Tang, ketegal sida agi diperintah bansa ke enda arapka Petara, orang Judah ke tetap ati enda entu ulih ngereja semua utai ti dikedekaka Adat.

5. Nama pengadang ke diberi Jehovah ngagai nembiak Iya, lalu nama kebuah semaya tu ngerinduka ati?

⁵ Kati orang Israel agi ulih nyembah Petara enggau chara ti diterima Iya? Maya nya, baka ke enda entu ulih laban Babilon enda kala ngelepaska orang tangkap. Tang Petara Jehovah udah besemaya, nembiak Iya deka dilepaska, lalu sida amat dilepaska. Semaya Petara seruran dikeamatka!—Isa. 55:11.

6, 7. Nama kebuah kitai patut ngemetulka penemu kitai?

⁶ Kala orang Kristian napi utai ke ditapi orang tangkap ba Babilon? Betaun-taun, The Watchtower madahka orang Kristian ke tetap ati nyadi orang tangkap di Babilon ba taun 1918, lalu dilepaska ari Babilon ba taun 1919. Taja pia, ba artikel tu enggau artikel pengudah tu, kitai deka belajarka kebuah kitai patut ngemetulka penemu kitai.

⁷ Pikirka pasal tu: Babilon ti Besai nya penguasa pengarap pelesu di serata dunya. Lalu nembiak Petara enda nyadi ulun pengarap pelesu ba taun 1918. Endang amat, maya nya orang ke diiri ngena roh kudus bisi kena perinsa. Tang kemayuh agi, pemerinsa ke ditapi sida datai ari bala perintah, ukai datai ari pengarap pelesu. Lama sebedau Perang Dunya I, iya ke amat, nembiak Petara ke diiri ngena roh kudus benung  nyeraraka diri ari pengarap pelesu. Reti nya, nembiak Jehovah enda nyadi orang tangkap ke ditaban ngagai Babilon ti Besai ba taun 1918.

8. Nama nyadi pengudah bala rasul mati? (Peda gambar ba pun artikel.)

⁸ Kena Pentikos ba taun 33, beribu iku orang Kristian ke baru diiri ngena roh kudus. Sida nyadi ‘bansa ti dipilih, bala imam diraja, bansa ti kudus, nembiak Petara.’ (Bacha 1 Peter 2:9, 10.) Bala rasul bejimat ngemataka gempuru seagi-agi sida idup. Taja pia, pengudah bala rasul mati, sekeda orang ba gempuru berengkah ngajar utai ti bula sereta deka narit bala murid ari pemendar. Sida tu rinduka penemu mensia ke dibai Aristotle enggau Plato, lalu sida berengkah ngajar penemu ari seduai iya, ukai ngajar penemu ari Jaku Petara. (SKR. 20:30; 2 Tes. 2:6-8) Mayuh ari sida nya orang ke tebilang nama sereta bala tuai ke ngemataka gempuru. Nya alai, taja pan Jesus udah madah ngagai bala murid iya, “Semua kita tu diri menyadi magang,” tang seraban bala tuai pengarap berengkah ditumbuhka.—Mat. 23:8.

9. Terangka baka ni pengarap Kristian ke limpang berengkah sama bekereja enggau perintah Rome. Nama asil iya?

⁹ Ba taun 313 pengudah Kristus ada, Raja Besai Constantine megai Perintah Rome ke enda arapka Petara, lalu ngaga pengarap Kristian ke limpang nyadi jalai pengarap ti dikemendarka undang-undang. Udah nya, Gerija nya berengkah sama bekereja enggau perintah Rome. Ngambika chunto, Constantine ngatur aum enggau bala tuai pengarap ke dikumbai Kunsil Nicaea. Pengudah aum nya, raja besai nangkap seiku paderi ke benama Arius laban iya enggai ngaku Jesus nya Petara. Udah nya, Theodosius nyadi raja besai Rome, lalu Gerija Katolik nyadi jalai pengarap rasmi Perintah Rome. Pakar sejarah madahka, menua Rome ke enda arapka Petara nyadi “Kristian” maya jeman Raja Besai Theodosius. Tang ke bendar, maya nya orang Kristian ke limpang udah nerima ajar ari orang ke enda arapka Petara, nya alai sida udah nyadi sebegian ari Babilon ti Besai. Taja pia, agi bisi sekeda orang Kristian ti diiri ngena roh kudus ke tetap ati. Sida baka gandum ke dipadahka Jesus. Sida ke tetap ati tu enggau naka ulih nyembah Petara, tang mimit aja orang ke mendingka utai ti dipadah sida. (Bacha Matthew 13:24, 25, 37-39.) Sida amat nyadi orang tangkap ba Babilon!

10. Nama kebuah orang berengkah kakang ati enggau gerija?

¹⁰ Beberapa ratus taun ti keterubah pengudah Kristus ada, mayuh orang agi ulih macha Bup Kudus dalam jaku Gerika tauka Latin. Sida ulih mandingka ajar ari Bup Kudus enggau ajar ari gerija. Lebuh sekeda orang nemu ajar ari gerija nya bula, sida nulak ajar nya. Tang sida enda ulih madahka utai ti ditemu sida nya ngagai orang bukai, lalu enti sida madahka nya, sida deka dibunuh.

11. Baka ni gerija ulih bekuasa atas Bup Kudus?

¹¹ Nyau kelama, mimit aja orang ke bejaku ngena jaku Gerika tauka Latin. Lalu bala tuai pengarap gerija enda ngemendarka Bup Kudus disalin ngagai jaku ke suah dikena orang. Ketegal tu, semina bala paderi enggau sekeda orang tepelajar ke ulih macha Bup Kudus kediri empu, lalu sekeda ari bala paderi nya enda entu nemu macha tauka nulis. Barang sapa ke enda setuju enggau utai ti diajar gerija deka diukum enggau berat. Nya alai, orang Kristian ti diiri ngena roh kudus ke tetap ati belalai begempuru enggau pangan diri dalam raban ti mit, lalu sekeda ari sida endang enda ulih begempuru.  Sama baka orang Judah ke ditaban nyadi orang tangkap ba Babilon, “bala imam diraja” ke diiri ngena roh kudus enda ulih nyembah Jehovah enggau chara ti teratur. Babilon ti Besai balat bekuasa atas orang!

12, 13. Nama dua iti kebuah ke ngasuh orang Kristian ti bendar tau arapka bisi pengelepas? Terangka.

¹² Kati ulih orang Kristian ti bendar nyembah Petara enggau bibas sereta dikemendarka? Ulih! Ketegal bisi dua iti kebuah ti berat. Kebuah kesatu nya, mesin chelak ke ulih dipindah kin kitu udah digaga. Sebedau mesin nya digaga kira-kira ba taun 1450, Bup Kudus dikupi ngena jari, lalu pengawa tu enda senang. Orang ke landik ngupi begunaka sepuluh bulan kena ngupi siti Bup Kudus! Bala orang ke ngupi nya nulis ba perengka tulis ke digaga ari kulit jelu. Ketegal tu, semina mimit aja Bup Kudus ke ulih diasilka, lalu rega iya mar amat. Taja pia, ngena mesin chelak enggau keretas, orang ke landik ulih nyelak lebih ari 1,300 lambar tiap hari!

¹³ Kebuah kedua nya, pengawa nyalin Bup Kudus. Kira-kira ba taun 1500, beberapa iku orang ke berani nyalin Bup Kudus ngagai bansa jaku ke suah dikena orang. Sida ngereja pengawa tu, taja pan sida nemu pengawa tu ulih ngujungka sida dibunuh. Bala tuai pengarap gerija balat irau ati. Nama kebuah? Laban sida irau enti orang ke lelaki tauka indu macha Bup Kudus dalam jaku sida empu, sida deka berengkah nanya utai ke baka tu: ‘Dini ajar Bup Kudus ke nyebut pasal purgatory? Dini ayat Bup Kudus ke bisi nyebut pasal orang ke enda tau enda  mayar paderi ke besembiangka orang ke udah mati? Dini ayat Bup Kudus ke nyebut pasal pope enggau cardinal?’ Mayuh ajar gerija ti bula bepelasarka penemu ari Aristotle enggau Plato, orang ke idup beratus taun sebedau Kristus ada. Bala tuai pengarap gerija pedis ati lebuh orang nanya sida pasal utai ke baka nya. Bala lelaki enggau indu ke nulak ajar sida deka diukum mati. Bala tuai pengarap gerija deka nagang orang macha Bup Kudus sereta mayuh betanya pasal Bup Kudus, lalu kesuah iya, nya meh utai ke nyadi. Tang beberapa iku aja orang ke berani enggai dikuasa Babilon ti Besai. Sida udah tetemuka pemendar ari Bup Kudus, lalu sida deka nemu mayuh agi! Pengelepas ari pengarap pelesu nyau majak semak.

14. (a) Nama digaga orang ke deka belajarka Bup Kudus? (b) Tusui cherita pasal pengawa Menyadi Russell ke ngiga pemendar?

¹⁴ Mayuh orang deka macha, belajarka Bup Kudus sereta berandau pasal utai ti udah dipelajarka sida. Sida enggai bala tuai pengarap gerija madah ngagai sida utai ti patut dipechaya. Nya alai sida rari ngagai menua bukai ke alai sida ulih belajarka Bup Kudus enggau bibas. Siti ari menua nya, Amerika Serikat. Dia, ba taun 1870, Charles Taze Russell sereta sekeda ke bukai udah berengkah belajarka Bup Kudus enggau dalam. Terubah iya, Menyadi Russell deka nemu ni bagi jalai pengarap ke ngajar pasal pemendar. Iya bejimat mandingka ajar ari mayuh jalai pengarap ke ngaku diri Kristian sereta jalai pengarap ke ukai Kristian, enggau utai ke dipadah Bup Kudus. Iya udah nya nemu, nadai siti ari semua jalai pengarap nya amat nitihka Bup Kudus. Bisi sekali, iya bejaku enggau bala tuai pengarap ari beberapa buah gerija. Menyadi Russell ngarapka sida deka nerima sereta ngajar pemendar ke udah ditemu iya enggau raban iya ari Bup Kudus ba gerija sida. Tang bala tuai pengarap enda beminat. Pelajar Bup Kudus udah nya nemu, sida enda ulih nyembah Petara sama enggau orang ke bisi begian dalam pengarap pelesu.—Bacha 2 Korint 6:14.

15. (a) Ni maya orang Kristian ke bendar nyadi orang tangkap ba Babilon? (b) Nama tanya ke deka disaut ba artikel pengudah tu?

¹⁵ Ba artikel tu, kitai udah nemu, orang Kristian ti bendar nyadi orang tangkap ba Babilon enda lama pengudah rasul ke penudi iya mati. Taja pia, kitai agi patut nemu saut ngagai tanya tu: Baka ni kitai nemu orang ke diiri ngena roh kudus benung ngelepaska diri ari Babilon ti Besai ba taun-taun sebedau taun 1914? Kati nya amat, Jehovah enda lantang ati enggau nembiak Iya ketegal sida nyau enda nginjil enggau tetap maya Perang Dunya I? Kati sekeda bala menyadi Kristian kitai ke enda ngetanka pengawa neutral maya nya udah ngasuh Jehovah enda lantang ati enggau sida? Pengujung iya, enti orang Kristian nyadi orang tangkap ba pengarap pelesu pengudah bala rasul mati, ni maya sida ngelepaska diri? Tu tanya ti amat manah, lalu tanya tu deka disaut ba artikel pengudah tu.