Berita manah pasal Perintah Petara benung ditusui ba serata dunya, baka ke udah dipadah Jesus. (Matthew 24:14) Bup Daniel, siti ari bup mit dalam Bup Kudus madahka perintah tu deka dipegai Petara. Bup Daniel bagi 2 ngembuan jaku ti ditulis bala nabi ke madahka pasal sekeda perintah mensia ti bekuasa, berengkah ari jeman Babilon kelia nyentuk ngagai jeman kitai. Pasal jemah ila, ayat 44 madahka:

‘Petara ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.’

Jaku tu enggau jaku ke bukai ti ditulis bala nabi ba Bup Kudus madahka Perintah Petara deka nganti perintah mensia lalu mai pemaik enggau pengelikun ngagai mensia ba dunya. Baka ni gaya pengidup ba baruh Perintah Petara? Tu sekeda semaya ti ngalitka ati ke deka dikeamatka enda lama da agi.

• NADAI AGI PERANG

  Masmur 46:9: “[Petara] ngasuh perang badu agi nyadi di serata dunya. Iya matahka panah, ngeredakka sangkuh, lalu nunu terabai.”

  Gambarka gaya dunya enti semua duit enggau pengelandik ke dikena ngaga perengka perang kemayaharitu dikena ba pengawa ke ulih mai penguntung ngagai semua orang! Utai tu deka nyadi dibaruh Perintah Petara..

• NADAI AGI SAKIT

  Isaiah 33:24: “Nadai orang ke diau dalam menua kitai deka mutap madahka diri sakit.”

  Gambarka gaya dunya lebuh nadai agi orang ke merinsa ketegal penyakit tungkul ati, riman, kemi manis tauka sakit ke bukai. Kitai nadai agi begunaka sepital tauka ubat. Semua mensia deka bulih pengerai ti sempurna.

• NADAI AGI LAPAR PUNGKANG

  Masmur 72:16: “Awakka gandum seruran mayuh di menua. Awakka bukit penuh laban utai ti ditanam.”

  Dunya deka mansutka pemakai ti chukup ngagai semua orang. Kitai deka bisi pemakai ti chukup sereta bisi pemakai ti manah ke pengerai.

• NADAI AGI PEMEDIS, PENUSAH ATI ENGGAU PEMATI

  Pemandang 21:4: “[Petara] deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”

   Tu reti iya, mensia deka idup meruan enggau sempurna ba dunya paradais! Tu utai ti disemaya Penempa kitai ti penuh enggau pengerindu, iya nya, Petara Jehovah.

Kati semua utai tu amat deka nyadi? Taja pan mayuh orang ngumbai pengidup ke dipadah ba Bup Kudus nya amat manah, tang sekeda orang tusah deka pechaya semua tu deka nyadi. Tu ketegal nadai orang kala ngasaika pengidup ti dipadahka ba Bup Kudus lalu bekunsika peneleba nya.

Mensia udah nyadi ulun dosa enggau pemati lalu dituntung pemedis, pemerinsa enggau penusah pengelama betaun-taun, nyentukka mayuh orang nerima tu baka utai ti biasa ba pengidup. Tang tu ukai tuju Penempa kitai, Petara Jehovah, ke mensia.

Ngambika kitai andal agi ngagai semaya ke digaga Iya, Petara madahka: “Baka nya meh jaku ti pansut ari mulut Aku. Iya tetap deka mujur ngereja utai ti udah diperambu Aku ke iya. Iya deka ngereja utai ti diasuh Aku kereja iya.”—Isaiah 55:11.

Bup Kudus ngambarka Jehovah nya Petara ke “enda kala bula.” (Titus 1:2) Laban Iya udah besemayaka pasal utai ke deka nyadi jemah ila, nya alai amat beguna enti kitai berundingka tanya tu: Kati mensia amat ulih idup belama iya ba dunya Paradais? Nama patut digaga kitai ngambika bulih penguntung ari semaya Petara? Ba artikel ke nangkanka tu, nuan deka tetemuka saut ngagai tanya tu.