ARTIKEL sebedau tu nunjukka bemacham utai ti nyadi ke ngasuh pengidup kitai asaika enda ulih ditatka agi. Lebuh penanggul nuntung, nuan engka berunding sekalika pengidup nuan agi bisi tuju. Nuan mega engka berunding sekalika bisi orang ibuhka nuan tauka nadai. Tang pechaya meh, Petara ibuhka utai ti nyadi ba nuan. Nuan amat berega ba mata Iya.

Seiku penulis Masmur 86 madahka diri amat pechayaka Petara. Ku iya: “Aku ngangauka Nuan lebuh maya tusah, laban Nuan nyaut sampi aku.” (Masmur 86:7) Tang nuan engka berunding, “Baka ni ku Petara nyaut sampi aku ‘lebuh maya tusah’?”

Petara engka enda mutarka penanggul nuan tekala nya, tang Jaku Iya ba Bup Kudus ulih ngelantangka runding nuan ngambika ulih napi penanggul nya. Bup Kudus madahka: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita.’ (Pilipi 4:6, 7) Uji peratika sekeda ayat Bup Kudus ti nunjukka Petara amat ibuhka kitai.

‘Nadai siku burung pipit enda dikingatka Petara. Kita lebih agi berega ari burung pipit!’—Luke 12:6, 7.

UJI PERUNDINGKA: Ba mayuh orang, burung ti mit baka burung pipit engka enda tentu berega. Tang Petara ibuhka semua burung nya. Nadai seiku pan enda dikingatka Petara. Tiap iku burung nya amat berega ba Iya. Ba Petara, mensia jauh lebih berega ari burung pipit. Entara semua utai ti digaga Petara, mensia meh ke pemadu tampak. Mensia digaga nitihka “gamal” Iya, lalu ulih ngayanka teladan Iya ti manah.—Pemungkal 1:26, 27.

‘O Jehovah, Nuan udah meresa lalu nemu aku. Nuan meda semua runding aku. Uji meh ati aku, ngambika Nuan nemu runding aku.’—Masmur 139:1, 2, 23.

UJI PERUNDINGKA: Petara ngelala nuan. Iya nemu asai ati sereta pengirau nuan. Orang bukai engka enda meretika penanggul ke ditapi nuan, tang Petara ibuhka nuan lalu deka nulung nuan. Enggau tu, nuan ulih neruska pengidup nuan.

‘Pendingka sampi aku, O Jehovah, lalu dingaka sabak aku ke minta tulung! Pendingka aku, lalu saut aku enggau jampat, lebuh aku ngangau! Iya deka ningaka bala nembiak Iya.’—Masmur 102:1, 2, 17.

UJI PERUNDINGKA: Kenyau ari pun, Jehovah udah beratika pemayuh ai mata mensia ke labuh ketegal pemerinsa. (Masmur 56:8) Tu mega nyengkaum ai mata nuan. Petara nemu semua penusah enggau pemerinsa nuan laban Iya sayauka nuan.

‘Anang nejuka utai ngenakutka kita! Aku deka ngasuh kita kering lalu nulung kita. Aku tu Jehovah Petara kita madahka ngagai kita, “Anang takut. Aku deka nulung kita.”’—Isaiah 41:10, 13.

UJI PERUNDINGKA: Petara seruran deka nulung nuan. Lebuh nuan lemi semengat, Iya deka ngeringka nuan.

‘Laban Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’—John 3:16.

UJI PERUNDINGKA: Pengidup nuan amat berega nyentukka Petara sanggup nyerahka Anak Iya, Jesus, ke nuan. Pemati Jesus ulih meri nuan pengadang bulih pengidup ti bisi tuju sereta meruan lantang belama iya. *