Aku ada ba sebuah genturung pendiau di Saxony, ke dikumbai Republik Demokrasi Jerman (RDJ) suba. Kami sebilik ngembuan pengerindu, lalu apai indai ngajar aku pasal ulah ti menyana. RDJ nya menua Komunis, nya alai mayuh orang di Saxony enda ngumbai jalai pengarap nya utai ti patut dikemeratka. Lalu aku enda pechaya Petara bisi. Bisi dua bengkah penemu ke balat nguingka pengidup aku pengelama 18 taun ti keterubah: enda pechaya Petara bisi sereta penemu pasal Komunis.

Nama kebuah penemu pasal Komunis narit ati aku? Laban aku rinduka penemu ke madahka semua mensia bela magang. Nambahka nya, aku pechaya semua reta tengkira patut dibagi bela, laban tu ulih mutarka penanggul ba pengaya sereta penyeranta. Nya alai aku kisuk enggau gerempung Komunis ke orang biak. Lebuh umur aku 14 taun, aku ngena mayuh jam gawa enggau projek alam ke ngaga keretas ti enda diguna nyadi baru. Orang di Aue amat beterima kasihka pengawa ti udah digaga aku nyentukka piak ke bekuasa dia meri aku setipikit nyadi peranak menua nya. Taja pan agi biak, aku ngelala sekeda orang politik ke tinggi pangkat di RDJ. Aku ngasaika diri ngembuan juluk ati ti betul lalu bisi peluang ti manah dudi hari.

Udah nya pengidup aku berubah. Ba taun 1989, Dinding Berlin diruntuhka lalu pia mega enggau blok Komunis di Eropah Timur. Penusah siti nangkanka penusah siti agi. Enda lama udah nya, aku nyau sedar pengawa ke enda lurus nya utai ke suah nyadi di RDJ. Ambika chunto, orang ke enda nyukung perintah Komunis deka dikumbai rayat kelas kedua. Baka ni nya tau nyadi? Endaka kami ke nyukung Komunis pechaya semua orang nya bela magang? Kati perintah Komunis nya udah puntan? Tu ngasuh aku irau.

Nya alai aku ngubah utai ti patut dikenuluka lalu beberatka muzik enggau seni. Ketegal aku ulih belajar ba sekula tinggi ke ngajar muzik—enggau ngarapka diri ulih ke universiti—aku berunding deka nyadi pemuzik sereta pengelukis. Nambahka nya, aku ninggalka ulah ti menyana ke udah dipelajarka aku lebuh agi mit. Utai ti beguna diatu iya nya ngelantangka diri, tu nyengkaum bedating enggau beberapa iku indu serentak. Tang muzik, seni enggau pengidup ti bibas enda ngurangka pengirau ba ati aku. Indah sida gambar ke dichura aku mandangka pengirau ba ati. Nama deka nyadi jemah ila? Lalu nama tuju pengidup?

 Lebuh aku nyau tetemuka saut ke digiga aku, aku berasai tekenyit. Bisi sekali maya lemai hari ba sekula tinggi, aku duduk enggau seraban pemelajar berandau pasal jemah ila. Mandy * nya seiku pemelajar sereta mega Saksi Jehovah. Lemai nya iya meri jaku ajar ti manah. Ku iya: “Andreas, enti nuan deka bulih saut ngagai tanya pasal pengidup sereta jemah ila, peratika saut iya ba Bup Kudus.”

Aku enda entu pechaya, tang aku berunding deka ngiga saut ari Bup Kudus. Mandy ngasuh aku meda Daniel bab 2, lalu utai ke dibacha ngasuh ati aku tekenyit. Jaku ti benabi madah pasal sekeda kuasa dunya tauka perintah ke meri empas ti besai nyentuk ngagai kitai kemaya hari tu. Mandy ngayanka jaku ti benabi ke bukai ari Bup Kudus ke bekaul enggau pengidup kitai jemah ila. Pengujung iya aku tetemuka saut ngagai tanya diri! Tang sapa ke nulis jaku ti benabi nya, lalu sapa ke ulih nerang pasal jemah ila enggau betul? Kati Petara amat bisi?

Mandy ngasuh aku betemu enggau Horst seduai Angelika, sepasang melaki-bini ke Saksi ke nulung aku meretika Jaku Petara enggau manah agi. Lalu aku nemu, semina gerempung pengarap Saksi-Saksi Jehovah aja ke suah ngena lalu ngemeratka nama Petara, Jehovah. (Masmur 83:18: Matthew 6:9) Aku nyau nemu, Petara Jehovah meri mensia pengadang idup belama iya ba dunya paradais. Masmur 37:9 madahka: ‘Tang orang ke nganti Jehovah, deka bempu menua tu.’ Pengadang tu ngerinduka ati aku laban iya diberi ngagai semua orang ke keran nitihka standard ulah ke dipadahka Petara ba Bup Kudus.

Taja pia, aku tusah deka ngubah chara pengidup ngambika sejalai enggau Bup Kudus. Pemujur nyadi pemuzik sereta pengelukis ngasuh aku temegah, nya alai aku patut belajar baruh ati dulu. Kelimpah ari nya, aku tusah deka ninggalka chara pengidup ti kamah. Aku amat beterima kasih ngagai Jehovah ke mandangka ati ti liat, kasih, sereta pemereti ngagai orang ke enggau naka ulih nguji nitihka utai ti diajar Bup Kudus!

Penemu pasal Komunis sereta enda pechaya Petara bisi udah nguingka pengidup aku pengelama 18 taun ti keterubah. Tang udah nya Bup Kudus ngubah pengidup aku. Utai ti dipelajar aku ngasuh aku badu irau pasal jemah ila lalu meri aku tuju ba pengidup. Ba taun 1993, aku dibaptisa nyadi Saksi Jehovah, lalu ba taun 2000, aku jadi enggau Tabitha, seiku menyadi Kristian indu ke ransing nyembah Jehovah. Kami duai enggau naka ulih ngena awak nulung orang bukai belajarka Bup Kudus. Mayuh orang ke ditemu kami duai ngembuan chara pengidup ti sebaka enggau enggi aku, iya nya dikuingka penemu pasal Komunis sereta enda pechaya Petara bisi. Aku berasai puas ati lebuh aku ulih nulung sida ngelala Jehovah.

Lebuh aku keterubah iya begulai enggau Saksi-Saksi Jehovah, apai indai aku berasai irau amat. Taja pia, kenyau ari hari nya sida beratika utai ti manah ke nyadi ba pengidup aku ketegal begulai enggau bala Saksi. Aku berasai gaga laban diatu seduai iya macha Bup Kudus sereta ngulu gempuru Kristian Saksi-Saksi Jehovah.

Kami duai Tabitha ngasaika pengelantang ba rumah tangga laban kami duai nguji nitihka jaku ajar ari Bup Kudus ke orang ti jadi melaki-bini. Ambika chunto, nitihka jaku lalau pasal tetap ati ngagai kaling pengidup majak negapka rumah tangga kami duai.—Hebrew 13:4.

Aku enda agi irau pasal pengidup sereta jemah ila. Aku ngasaika diri sebagi ari ruang bilik bala penyembah Jehovah di serata dunya, ke ngembuan pemaik sereta penyerakup ti bendar. Orang dalam ruang bilik tu enda bechiping enggau pangan diri. Tu utai ti dipechaya aku sereta deka dijapai aku ba pengidup.