‘O Jehovah, ni pengelama aku enda tau enda ngangau minta tulung, baru Nuan deka mending, lalu ngelepaska kami ari orang ke mangah tu?’ (Habakuk 1:2, 3) Tu meh serebana Habakuk, seiku lelaki ti dikerinduka Petara. Kati peminta iya nunjukka iya lemi ba pengarap? Enda! Petara meri jamin ngagai Habakuk, Iya udah nentuka maya deka muai pemerinsa.—Habakuk 2:2, 3.

Lebuh nuan tauka orang ke semak enggau nuan merinsa, amat senang ngumbai Petara nya lubah lalu Iya patut mutarka pemerinsa nya enggau lengkas. Tang Bup Kudus madahka: ‘Jehovah ukai lubah ngamatka semaya Iya, munyi ku sekeda orang, tang Iya sabar enggau kita, laban Iya enggai nejuka indah siku kita dirusak, tang semua nesal ati.’—2 Peter 3:9.

Enda lama da agi! Jesus madahka siti rebak deka meda tanda ti nunjukka “pengujung dunya” nyau semak. (Matthew 24:3-42) Utai ke dipadah Jesus benung nyadi ba jeman kitai, lalu tu nunjukka Petara deka muai pemerinsa enda lama da agi. a

Baka ni Petara muai semua pemerinsa? Lebuh Jesus ba dunya, iya mandangka utai ke ulih digaga kuasa Petara kena ngurangka pemerinsa mensia. Peratika sekeda chunto tu.

Pengerusak Alam: Lebuh Jesus enggau bala rasul iya ngelayang Tasik Galili, siti kabut ti besai nyadi nyentukka perau sida nyau ka karam. Tang Jesus nunjukka iya enggau Apai iya bisi kuasa atas kuasa alam. (Kolosi 1:15, 16) Jesus semina nyebut: “Teduh! Diau jenuh!” Asil iya? “Ribut lalu teduh, lalu ai nadai agi beumbak.”—Mark 4:35-39.

Penyakit: Jesus dikelala mayuh orang laban iya ulih ngeraika orang ti buta, orang ti bajung, orang ti sakit gila babi enggau sakit lan sereta bemacham penyakit ke bukai. Iya “ngeraika semua sida ke sakit.”—Matthew 4:23, 24; 8:16; 11:2-5.

Lapar Pungkang: Jesus ngena kuasa ke diberi Apai iya kena nambahka penyampau pemakai ti mimit. Bup Kudus bisi nyebut dua kali pasal pengawa Jesus ke meri pemakai ngagai beribu iku orang.—Matthew 14:14-21; 15:32-38.

Pemati: Bup Kudus nyebut pasal tiga iti pengawa Jesus ti ngangkatka orang mati idup baru. Seiku ari sida udah mati pengelama empat hari! Tu nunjukka Jehovah bisi kuasa mutarka pemati.—Mark 5:35-42; Luke 7:11-16; John 11:3-44.