Perundingka siti kaul ti pemadu rapat ba mensia—iya nya kaul entara sapit ti sebaka gamal. Nancy Segal, pengarah Twin Studies Center ke bisi sapit madahka, kaul sapit ti sebaka gamal amat rapat nyentukka sapit nya senang meretika jaku enggau asai ati pangan diri. Ku seiku indu ke bisi sapit ti sebaka gamal enggau iya: “Kami nemu semua utai pasal pangan diri.”

Nama kebuah utai tu ulih nyadi? Pansik nunjukka tu nyadi ketegal utai ti ngelingi sida tauka chara apai indai ngemesaika sida. Tang kebuah ti berat agi, iya nya ketegal genetik ke dikembuan sapit ti sebaka gamal.

PERUNDINGKA: Penempa ke ngaga genetik kitai tentu nemu kitai lebih agi ari orang bukai. Pemasmur David madahka: “Nuan udah nempa semua perengka tubuh aku; lalu bejantilka aku dalam kandung indai aku. Lebuh tulang aku benung ditempa, dipejantilka bejimat jimat dalam kandung indai aku, . . . Nuan endang udah meda aku sebedau aku ada.” (Masmur 139:13, 15, 16) Petara ukai semina nemu genetik kitai, tang Iya mega nemu semua utai ke nyadi ba pengidup kitai lalu baka ni semua tu meri empas ngagai personaliti kitai. Ketegal penemu tu, kitai pechaya Iya nemu kitai enggau silik.

David besampi: ‘O Jehovah, Nuan udah meresa lalu nemu aku. Nuan nemu semua utai ti dikereja aku; Ari jauh Nuan meda semua runding aku. Indah sebedau aku bejaku deh Nuan endang udah nemu semua utai ti deka disebut aku.’ (Masmur 139:1, 2, 4) Pia mega, Jehovah nemu utai ba dalam ati kitai nyengkaum “semua runding enggau pengingin kitai.” (1 Bansa Israel 28:9; 1 Samuel 16:6, 7) Nama utai ke dipelajarka kitai pasal Petara ari ayat tu?

Taja pan kitai engka enda ulih nyebut semua runding sereta asai ati kitai dalam sampi, Penempa kitai ukai semina meda nama utai ke digaga kitai tang Iya mega nemu kebuah kitai ngereja nya. Iya indah nemu utai manah ke deka dikereja kitai taja pan kitai engka berasai tusah deka ngereja nya ketegal pengurang diri. Petara meri kitai penau ngayanka pengerindu, nya alai Iya keran deka meda baka ni kitai ngayanka pengerindu ari runding enggau tuju ati kitai.—1 John 4:7-10.

 Ayat Bup Kudus madahka

• ‘Laban mata Jehovah merening ngagai orang ke lurus lalu pending Iya ninga sampi sida.’—1 PETER 3:12.

• Ku Jehovah bejaku, “Aku deka nunjukka jalai ti patut ditengah nuan. Aku deka ngajar sereta meri nuan jaku lalau.”—MASMUR 32:8.

Enti sema kitai nemu Petara meretika penusah sereta asai ati kitai maya nya, kati nya ulih nulung kitai betan? Perundingka utai ti nyadi ba Anna, ari Nigeria. Ku iya, “Aku berunding sekalika aku patut idup ketegal utai ti ditapi aku. Aku seiku balu lalu patut nyaga anak indu aku ke ditan ba sepital ketegal sakit hydrocephalus (kelalu mayuh ai dalam untak). Tang ba maya ti sama, aku bisi kanser tusu lalu patut beputung, ngaga kemoterapi enggau radioterapi. Aku ngasaika amat tusah maya nya laban patut ditan ba sepital ba maya ti sama enggau anak aku.”

Nama nulung Anna napi penusah tu? “Aku belematika ayat Bup Kudus baka Pilipi 4:6, 7, ke madah ‘pemaik Petara, ti ngelui peragam mensia, deka nyaga ati enggau runding kita.’ Lebuh aku ingatka jaku tu, aku ngasaika bisi kaul ti rapat enggau Jehovah. Iya nemu aku lebih agi ari aku empu. Aku mega bulih mayuh peransang ari bala menyadi Kristian ba eklisia.

“Taja pan aku agi ngelaban penyakit aku, tang gaya pengidup aku enggau anak aku nyau berinsur manah. Ketegal Jehovah bisi enggau kami, kami belajar enda berundingka utai ti enda manah lebuh napi penusah tu. Ku James 5:11: ‘Kitai ngumbai sida ke ngayanka ati ti tan nya beberekat. Kita udah ninga pasal Jop ke tan ati, lalu kita udah meda juluk ati Jehovah, pasal Jehovah ke penuh laban penyiru enggau pengasih.’” Jehovah meretika utai ke ditapi Jop enggau silik. Nya alai, kitai ulih pechaya Iya mega meretika penusah ke ditapi kitai.