Enti pemerinsa ukai ari Petara, nama kebuah lapar pungkang, penyeranta, perang, penyakit enggau penusah ti ngenyit nyadi? Jaku Petara, Bup Kudus, madahka tiga iti batang kebuah mensia merinsa:

1. Pengawa Berundingka Diri Empu, Pengamu enggau Pemenchi. “Sekeda orang ke bisi kuasa diau, alai orang bukai ke natka diri merinsa dipegai sida.” (Pengajar 8:9) Mayuh orang merinsa ketegal ulah orang ke berundingka diri empu, amu tauka jai.

2. Enda Nemu Maya Deka Ditinggang Penusah. Siti agi kebuah mensia ditinggang pemerinsa iya nya laban sida ‘nadai nemu maya diri deka ditinggang penusah.’ (Pengajar 9:12) Utai jai nyadi ketegal sida ba endur enggau ba maya ti salah tauka bisi orang bukai ke enda bejimat.

3. Penguasa Dunya ti Jai. Bup Kudus enggau terang madahka pun penatai pemerinsa mensia. “Semua dunya di baruh kuasa Sitan.” (1 John 5:19) Seiku melikat ti ditempa Petara nyadi Antu Sitan laban iya “nadai kaul enggau pemendar.” (John 8:44) Melikat ke bukai nitih Sitan ngelaban Petara ngambika ulih ngereja utai ti dikinginka sida. Nya alai, sida dikumbai antu. (Pemungkal 6:1-5) Pengawa Sitan enggau bala antu iya ke ngelaban ngasuh dunya tu majak jai, kelebih agi ba jeman kitai. Diatu, Sitan amat ringat lalu “nipu semua dunya,” lalu tu ngenataika mayuh penusah ba dunya. (Pemandang 12:9, 12) Sitan endang pemerintah ti jai. Iya berasai puas lebuh meda mensia merinsa. Nya alai, pemerinsa nyadi ketegal Sitan, ukai Petara.

PERUNDINGKA: Semina orang ke jai sereta nadai penyinu sanggup merinsaka orang ti nadai bepenyalah. Tang Bup Kudus madahka: ‘Petara endang pengerindu.’ (1 John 4:8) Sejalai enggau kualiti pengerindu Iya, ‘Petara ti Pemadu Bekuasa enda ngereja penyai.’—Jop 34:12.

Taja pia, nuan engka berunding, ‘Berapa lama Petara ti Pemadu Bekuasa deka nejuka Sitan merintah dunya tu?’ Baka ke udah dipelajar kitai, Petara balat begedika penyai lalu pemerinsa kitai ngasuh Iya tusah ati. Nambahka nya, Bup Kudus meransang kitai: “Serahka semua pengirau kita ngagai Iya, laban Iya ngibun kita.” (1 Peter 5:7) Ketegal Petara rinduka kitai sereta bisi kuasa, Iya deka muai semua pemerinsa enggau pengawa ti enda lurus enda lama da agi. Tu deka diterangka agi ba artikel ti nangkanka tu. *