“Nama Kebuah Petara Enda Nulung?”
“AKU SERURAN NANYA: NAMA KEBUAH PETARA ENDA NULUNG?”—Pope Benedict XVI, lebuh ngabas siti endur ba Auschwitz, Poland, alai lebih ari sejuta iku orang dibunuh.
LEBUH PENUSAH NYADI, NUAN ENGKA NANYA, ‘NAMA KEBUAH PETARA ENDA NULUNG?’ TAUKA LEBUH PENUSAH BALAT NYADI BA PENGIDUP NUAN, NUAN ENGKA BERUNDING SEKALIKA PETARA IBUHKA NUAN.
Nuan engka ngasaika baka Sheila, ke diau ba Amerika Serikat. Iya dibesaika ba ruang bilik ti kuat ba pengarap. Ku iya: “Ari mit, aku bisi minat ngagai Petara laban Iya Penempa kitai. Tang aku nadai kala berasai semak enggau Iya. Aku nemu Iya meda aku, tang ari jauh aja. Aku enda ngasaika Iya begedika aku, tang aku mega enda pechaya Iya ibuhka aku.” Nama kebuah Sheila kakang ati? Ku iya nampung: “Kami sebilik enda ngetu-ngetu napi penusah lalu Petara nadai nulung kami.”
Baka Sheila, nuan engka nemu Petara bisi. Tang, nuan engka berunding enti sema Iya amat ibuhka nuan. Jop, seiku orang ti lurus, mega kala berasai kakang ati taja pan iya bisi pengarap ba kuasa sereta penemu-dalam Petara. (Jop 2:3; 9:4) Pengudah Jop enda ngetu-ngetu ditinggang penusah lalu enda nerima tulung, iya nanya Petara: “Nama kebuah Nuan ngelalaika mua Nuan ari aku? Nama kebuah Nuan ngaga aku baka munsuh?”—Jop 13:24.
Nama utai ke dipadah Bup Kudus? Kati kitai patut nyalahka Petara lebuh utai jai nyadi? Kati bisi bukti nunjukka Petara amat ibuhka mensia sereta tiap iku kitai? Kati kitai ulih nemu sekalika Iya meratika kitai, nemu asai ati kitai tauka nulung kitai napi penanggul?
Ba artikel ke nangkanka tu, kitai deka mansik baka ni utai ti digaga Petara nunjukka Iya ibuhka kitai. (Rome 1:20) Kitai mega deka mansik utai ku Bup Kudus ti nunjukka Petara ibuhka kitai. Mayuh agi nuan “nemu Iya” ari utai ti digaga Iya sereta ari Bup Kudus, nuan deka andal agi “Iya ngibun” nuan.—1 John 2:3; 1 Peter 5:7.
