Begigaka Chara Kena Ngemanjaika Umur
“Aku udah meda pengawa ke diberi Petara ngagai mensia ngambika sida seruran kisuk. Iya udah ngaga semua utai enggau manah ba maya ti ngena. Iya udah ngengkahka timpuh ti nadai pengujung ba dalam ati mensia.”—Pengajar 3:10, 11, NW.
JAKU Raja Solomon tu ngayanka asai ati mensia pasal pengidup sida. Pengelama beribu taun, mayuh orang bisi pengingin deka idup lama. Tu nyadi engka ketegal umur kitai pandak lalu kitai enda ulih nyeliahka pemati. Ari kelia, bisi mayuh cherita pasal orang ke begigaka chara kena ngemanjaika umur.
Ambika chunto, seiku raja Sumer ke benama Gilgamesh. Mayuh ensera nusui pasal cherita pengidup iya. Siti ari ensera nya dikumbai Epic of Gilgamesh. Ba cherita nya, Gilgamesh nempuh pejalai ti mar kena begigaka chara kena nyeliahka pemati. Tang pengujung iya, iya enda mujur.
Seiku pakar kimia ba dalam makmal iya (urung taun 500 M. ngagai 1500 M.)
Ba abad ke-4 S.M., bala pakar kimia ba China nguji ngaga ai ke ulih ngemanjaika umur mensia. Sida ngaga ai ke dichampur mimit enggau merkuri sereta arsenik. Tang ai tu mega dipelabaka udah nabanka nyawa beberapa iku raja ba China. Ba Eropah, entara taun 500 M. enggau 1500 M., sekeda pakar kimia nguji ngubah emas ngambika ulih diempa mensia. Ketegal emas tan belama iya, sida ngumbai tu ulih ngasuh mensia idup lama.
Kemayaharitu, sekeda pakar biologi enggau pakar genetik nguji mansik nama utai ke ngasuh mensia nyadi tuai. Tu nunjukka jeman diatu mega mensia agi ngarapka sida ulih tetemuka chara kena nyeliahka diri ari mansang tuai lalu mati. Tang nama asil ari pansik nya?
PETARA UDAH “NGENGKAHKA TIMPUH TI NADAI PENGUJUNG BA DALAM ATI MENSIA.”—PENGAJAR 3:10, 11, NW
MANSIK KEBUAH MENSIA NYADI TUAI
Bala saintis ke mansik pasal sel mensia, bulih lebih ari 300 iti teori kena nerangka kebuah kitai nyadi tuai lalu mati. Baru-baru tu, pakar biologi molekul udah mujur ngasuh sel jelu enggau sel mensia idup lama. Ketegal tu, sekeda orang ke kaya melanja ungkus saintis mansik kebuah ti ngasuh mensia mati. Nama asil iya?
Nguji ngemanjaika pengidup mensia. Sekeda pakar biologi pechaya kitai nyadi tuai ketegal utai ke nyadi ba ujung kromosom kitai ke dikumbai telomer. Telomer ulih nyaga penerang genetik ke bisi ba sel kitai lebuh sel kitai bebagi nyadi mayuh agi. Tang tiap kali sel kitai bebagi, telomer nyadi pandak-sepandak. Nyau kelama, sel kitai badu bebagi,
lalu nya meh maya kitai berengkah nyadi tuai.Seiku pemenang prais Nobel 2009, Elizabeth Blackburn, enggau raban iya udah tetemuka siti enzim ti ulih ngasuh telomer lubah agi nyadi pandak, lalu tu mega ulih ngasuh sel lubah nyadi tuai. Tang ba riput sida, sida ngaku telomer enda ulih ngasuh mensia idup lama.
Sel diprogram baru. Tu siti agi chara kena mutarka penanggul ketegal nyadi tuai. Lebuh sel kitai nyadi kelalu tuai, sel nya tusah deka ngasilka sel ti baru. Ketegal tu, sel nya engka meri penerang ti salah ngagai sel ke ngelaban penyakit, lalu tu ngasuh isi kitai kembai, berasai pedis, lalu senang kena penyakit. Baru-baru tu, bala saintis ba Perancis ngambi sel ari orang tuai, lalu sekeda ari orang tuai nya beumur lebih ari 100 taun. Sel nya mujur diprogram baru. Ketuai raban pemansik, Profesor Jean-Marc Lemaître, madahka asil ari pengawa sida nunjukka sel nya ulih nyadi biak baru.
ULIH PENEMU SAINS NGEMANJAIKA PENGIDUP KITAI?
Taja pan diatu bisi mayuh chara ke ulih ngasuh mensia lubah tuai, tang sekeda saintis pechaya mensia bedau ulih ngemanjaika umur sida. Endang amat, kenyau ari abad ke-19 mensia ulih idup lama agi. Tang tu ketegal sida nyaga pemeresi diri, lalu bisi ubat kena nagang tauka ngelaban penyakit. Sekeda pakar genetik pechaya umur mensia udah datai ba taka ti pemadu panjai.
Kekira 3,500 taun kelia, seiku penulis Bup Kudus ke benama Moses madahka, “Umur kami semina 70 taun aja, lapan puluh taun, enti kami regas; tang umur kami semina mai pemerinsa enggau ati ti tusah. Umur jampat abis, lalu kami nadai agi.” (Masmur 90:10) Taja pan mayuh orang bebendar deka ngemanjaika pengidup mensia, tang asil iya tetap sama baka ke dipadahka Moses.
Taja pia, utai ke ba tasik baka red sea urchin tauka siti ari spesis lukan quahog, ulih idup lebih ari 200 taun, lalu pun kayu baka giant sequoia ulih idup beribu-ribu taun. Lebuh kitai mandingka tu enggau umur kitai, kitai engka berunding, ‘Kati kitai semina ulih idup 70 tauka 80 taun aja?’