TAJA PAN apai indai kitai ti keterubah, Adam seduai Hawa, enda ngasika Petara lalu mai dosa enggau pemati ngagai semua mensia, tang tu enda ngubah tuju asal Petara ke mensia. Ba Bup Kudus, ari pun nyentukka ujung, Petara suah madahka tuju asal Iya enda kala berubah.

• “Orang ke lurus deka bempu menua tu [“dunya,” NW] lalu diau ditu belama iya.”—Masmur 37:29.

• ‘Jehovah ti Pemadu Tinggi deka ngerusak pemati belama iya! Iya deka ngendas ai mata ari mata semua orang.’—Isaiah 25:8.

• “Munsuh ti pemadu dudi dirusak nya pemati.”—1 Korint 15:26.

• “Pemati nadai agi, nadai agi ngulit, nadai agi nyabak, nadai agi pedis.”—Pemandang 21:4.

Baka ni Petara deka “ngerusak pemati” tauka ngasuh pemati “nadai agi”? Baka ke dipadah ba Bup Kudus, ‘orang ke lurus deka idup belama iya.’ Tang Bup Kudus mega madahka, “Nadai orang di dunya tu ti nadai kala ngereja utai ti salah.” (Pengajar 7:20) Enti Petara deka ngasuh pemati nadai agi, kati tu reti iya Petara deka nyakal jaku Iya Empu? Enda! Petara nadai sekali-kali deka ngereja utai baka nya laban ‘Petara enda kala bula.’ (Titus 1:2) Nya alai, baka ni ku Petara deka ngamatka tuju asal Iya ke mensia?

Petara Jehovah amat rinduka mensia. Nya alai, Iya udah mayar tebus kena ngelepaska mensia ari pemati. Tebus tu reti iya rega ti sama ke dikena mayar utai ke rusak tauka kena ngemetulka utai ti enda lurus. Ketegal dosa semua mensia nerima ukum mati. Lalu Bup Kudus madahka: “Kitai sigi enda ulih nebus orang bukai. Kitai enda ulih mayar rega nyawa iya ngagai Petara, laban bayar nyawa mensia kelalu besai. Utai ti dibayar kitai, sigi nadai kala chukup.”—Masmur 49:7, 8, NW.

Lebuh mensia ti enda sempurna mati, iya semina dilepaska ari dosa iya empu. Tang iya enda ulih mayar rega nyawa iya empu, lalu iya mega enda ulih mayar rega nyawa orang bukai. (Rome 6:7) Kitai begunaka orang ke sempurna sereta nadai dosa. Iya patut nyerahka pengidup iya ukai ketegal dosa iya empu, tang ketegal dosa kitai.—Hebrew 10:1-4.

Nya meh utai ke udah digaga Petara. Iya ngirumka Anak Iya, Jesus, ari serega ke dunya, lalu diadaka nyadi mensia ti sempurna. (1 Peter 2:22) Jesus madahka iya datai ketegal deka ‘nyerahka nyawa diri kena nebus orang mayuh.’ (Mark 10:45) Jesus nyerahka nyawa diri ngambika pemati nadai agi lalu kitai deka bulih pengidup ti meruan belama iya.—John 3:16.

Kemayaharitu, dunya kitai bisi “mayuh macham penusah,” munyi ti udah dipadahka Bup Kudus. Tu nunjukka kitai benung idup ba “hari ti penudi” ba dunya ti jai tu. (2 Timoti 3:1) Hari ti penudi tu deka abis maya ‘Hari Pechara lebuh orang ke enda nangika Petara diakim lalu dirusak.’ (2 Peter 3:3, 7) Tang sida ke rinduka Petara deka selamat, lalu diberekat enggau “pengidup ti meruan belama iya.”—Matthew 25:46.

Bejuta iku orang ke udah mati deka bulih peluang idup belama iya lebuh sida diidupka baru.  Lebuh Jesus ngagai nengeri Nain, iya kala ngangkatka orang ari mati. Lebuh anak tunggal seiku indu balu udah nadai, Jesus berasai “sinu ati” lalu ngidupka anak iya baru. (Luke 7:11-15) Rasul Paul madahka: “Aku bisi siti pengadang . . . iya nya semua orang ke lurus enggau ke enda lurus deka diangkatka ari mati.” Pengadang ti deka dikeamatka tu ngayanka pengerindu Petara ti besai ke mensia.—Kereja Rasul 24:15.

Bebiliun iku orang deka bulih peluang idup belama iya. Bup Kudus madahka: “Orang ke lurus deka bempu menua tu [“dunya,” NW] lalu diau ditu belama iya.” (Masmur 37:29) Maya nya sida deka berasai gaga ati sereta lantang laban jaku Paul ke ditulis urung 2,000 taun kelia udah dikeamatka: “O pemati, dini alai pemenang nuan? O pemati, dini alai penyengat nuan?” (1 Korint 15:55) Maya nya munsuh mensia ti pemadu besai iya nya pemati, udah nadai!