Nama kebuah mensia bisi pengingin deka idup belama iya? Bup Kudus madahka Petara udah ngengkahka pengingin nya ba dalam ati kitai. (Pengajar 3:11) Bup Kudus mega madahka ‘Petara endang pengerindu.’ (1 John 4:8) Kati patut Petara ti bisi pengerindu nyimpan pengingin deka idup belama iya ba dalam ati kitai, enti kitai enda ulih idup lama?

Nadai seiku orang deka mati. Bup Kudus madahka pemati disempamaka baka “munsuh” kitai. (1 Korint 15:26) Sekeda orang mati maya agi biak, lalu sekeda orang mati maya udah tuai. Enda ngira tuai tauka biak, pengujung iya semua orang mati. Mayuh orang takut deka berundingka pasal pemati. Kati munsuh tu ulih dialahka?

Petara nadai bisi runding dekaka mensia mati. Dalam Bup Kudus, Bup Pemungkal bisi bukti ti nunjukka Petara deka mensia idup belama iya ba dunya. Petara enggau pengerindu udah nyediaka dunya tu alai mensia idup enggau lantang ati. Iya ngaga mensia ti keterubah, Adam, lalu ngengkahka iya ba paradais, siti kebun ti manah ba Eden. Udah nya, ‘Petara meda semua utai ti udah digaga Iya manah magang.’—Pemungkal 1:26, 31.

 Petara ngaga Adam sempurna. (Ulang Adat 32:4) Bini Adam iya nya Hawa mega nadai penimpang. Hawa bisi runding enggau tubuh ti sempurna. Jehovah madah ngagai seduai iya: “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”—Pemungkal 1:28.

Adam enggau Hawa tentu begunaka awak enti seduai iya deka ngemenuhka dunya. Hawa patut beranak, lalu bulih peturun nyentukka dunya penuh, baka ke dikedekaka Petara. (Isaiah 45:18) Kati patut Petara Jehovah * ngasuh Adam seduai Hawa ngereja utai nya enti seduai iya semina ulih idup nyentukka anak enggau uchu seduai iya aja?

Perundingka mega pesan Petara ti ngasuh Adam seduai Hawa merintah bala jelu. Tu begunaka awak ti panjai. (Pemungkal 2:19) Enti deka ngereja nya, Adam seduai Hawa patut belajar pasal bala jelu sereta nemu baka ni seduai iya patut nyaga sida. Enti pia, tu tentu begunaka mayuh agi awak.

Nyadi, pesan Petara ke ngasuh Adam seduai Hawa ngemenuhka dunya sereta merintah bala jelu nunjukka seduai iya endang digaga ngambika ulih idup ba timpuh ti panjai. Kebendar iya, Adam mega idup lama sebedau iya mati.

Bup Kudus nunjukka umur mensia suba jauh panjai agi ari umur kitai kemayaharitu. Bup Kudus madahka Adam “mati umur 930 taun.” Udah nya, Bup Kudus ngerintaika enam iku lelaki ke idup lebih ari 900 taun! Nama sida nya, Set, Enos, Kenan, Jaret, Metuselah enggau Noah. Semua sida idup sebedau Bah Besai nyadi maya jeman Noah. Maya Bah Besai datai, Noah udah idup pengelama 600 taun. (Pemungkal 5:5-27; 7:6; 9:29) Nama kebuah sida ulih idup ngelama nya?

Semua sida idup semak enggau maya Adam seduai Hawa agi sempurna. Engka ketegal tu meh sida ulih idup lama. Tang nama kaul pengidup ti sempurna enggau umur ti panjai? Lalu baka ni pemati ulih dipunaska belama iya? Kena nemu saut tu, keterubah kitai patut nemu nama kebuah kitai mansang tuai lalu mati.