Jaku lalau Bup Kudus: “Anang angkunka duit. Kita patut nemu puas ati ke utai ti dikemisi kita.”—Hebrew 13:5.

Kemayaharitu, dunya mandangka mayuh utai ti ngasuh orang ngasaika sida patut ngembuan semua utai nya. Tang Bup Kudus madahka kitai ulih ‘puas ati ke utai ti dikemisi kitai.’ Baka ni?

“Anang angkunka duit.” Ketegal “angkunka duit,” orang sanggup enda nyaga pengerai diri, enda ibuhka diri sebilik enggau bala kaban, ngereja utai ti enda manah, indah sanggup ngemaluka diri empu. (1 Timoti 6:10) Semua tu ngerugika diri empu laban orang ke angkunka pengaya sigi “enda nemu puas ati.”—Pengajar 5:10.

Orang berega agi ari utai bukai. Reta tengkira bisi guna, tang reta nya enda ulih ngayanka pengerindu ngagai kitai tauka beterima kasih ke kitai. Semina mensia aja ulih ngereja nya. Enti kitai bisi pangan ti bendar, kitai ulih puas ati.—Jaku Dalam 17:17.

Jaku lalau Bup Kudus: “Ati ti selalu lantang ngasuh nuan bepengerai.”—Jaku Dalam 17:22.

“Ati ti lantang” sempama ubat ti ulih nulung kitai betan napi penyakit. Tang baka ni kitai ulih gaga ati lebuh kitai benung sakit?

Seruran beterima kasih. Enti kitai suah berundingka penanggul kitai, kitai deka ngasaika diri “seruran merinsa.” (Jaku Dalam 15:15) Nya alai Bup Kudus meransang kitai “seruran beterima kasih.” (Kolosi 3:15) Kitai ulih belajar ngayanka terima kasih indah ba utai ti mit. Ambika chunto, pemanah mata panas ke deka padam, puput angin, tauka tuchum ari orang bukai ulih ngelantangka ati kitai.

Nulung orang bukai. Taja pan pengerai kitai enda manah, Bup Kudus madahka “beberekat agi orang ke meri, ari orang ke nerima.” (Kereja Rasul 20:35) Lebuh orang meri terima kasih ketegal utai ke digaga kitai, kitai berasai gaga ati. Tu nulung kitai enda kelalu berundingka penanggul kitai. Nya alai, enti kitai nulung orang bukai, pengidup kitai mega lantang agi.

Jaku lalau Bup Kudus: “Nemu milih utai ti pemadu badas.”—Pilipi 1:10.

Laki bini ke jarang ngereja utai begulai engka tau ngasuh kaul seduai iya rusak. Nya alai, tikah seduai iya siti ari utai ti patut dikemeratka.

Ngereja utai begulai. Ari ke ngereja utai kediri, laki bini ulih ngatur ngambika seduai iya ulih ngereja utai begulai. Bup Kudus madahka “dua iku manah agi ari siku.” (Pengajar 4:9) Laki bini ulih begulai manduk utai, sesais, ngirup kupi, tauka main begulai.

Ayanka pengerindu nuan. Bup Kudus meransang laki bini ngayanka pengerindu sereta bebasaka pangan diri. (Epesus 5:28, 33) Seduai iya ulih tuchum, ngayanka penyayau, tauka meri pemeri ti mit ngagai pangan diri. Tu ulih neguhka tikah seduai iya. Endang amat, laki bini semina tau ngayanka pengingin seks ngagai pangan diri aja.—Hebrew 13:4.