GAMBARKA nuan benung meda siti cherita pasal pemain musik ti tebilang ke dikerinduka nuan. Ba cherita nya nuan ulih meda maya iya agi mit, maya iya belajar pasal musik, sereta pengeransing iya belatih. Udah nya, nuan meda iya main musik ba konsert, bejalai ngagai mayuh bengkah menua, lalu nyadi tebilang ba serata dunya. Tang udah nya, nuan ulih meda maya iya udah tuai, lalu ba pengujung cherita nya, iya mati.

Cherita tu ukai cherita ngapa, tang ngayanka utai ti amat nyadi. Enda ngira iya seiku pemain musik, seiku saintis, seiku atlit, tauka orang ti tebilang, jalai cherita iya sama magang. Seseiku orang ulih bulih mayuh utai, tang kala nuan berundingka ni pemayuh utai ke deka diulih iya enti sema iya enda mansang tuai lalu mati?

Kitai tentu berasai sinu lebuh berunding pasal tu. Tang tu meh utai ke deka nyadi ngagai semua kitai. (Pengajar 9:5) Enda ngira nama ke digaga kitai, kitai enda ulih nyeliahka diri ari mansang tuai lalu mati. Kelimpah ari nya, penusah ngenyit tauka penyakit ti raya ulih nabanka nyawa kitai. Baka ke dipadah ba Bup Kudus, kitai sempama “ambun ti pegari sekejap aja, lalu udah nya lesap.”—James 4:14.

Ketegal pemati ulih ninggang kitai barang maya, sekeda orang enda peduli agi lalu berunding, “Aram kitai makai ngirup, laban pagila kitai mati.” (1 Korint 15:32) Tang kebendar iya, orang berunding baka tu laban sida nemu pemati ulih ninggang sida barang maya lalu sida nadai pengadang ti manah ke jemah ila. Kekadang, lebuh balat napi pemerinsa, nuan engka berunding, ‘Kati pengidup kitai naka tu aja?’ Ba dini kitai ulih tetemuka saut ke tanya tu?

Kemayaharitu, mayuh orang bepanggai ba sains. Pemansang ba sains enggau chara berubat ulih nulung mensia idup lama agi. Sekeda saintis bebendar gawa ngambika ulih ngemanjaika pengidup mensia. Tang enda ngira nama ke digaga sida, orang agi berundingka tanya tu: Nama kebuah kitai mansang tuai lalu mati? Kati pemati deka nadai agi jemah ila? Artikel pengudah tu deka nerangka pasal topik tu lalu nyaut tanya: Kati pengidup kitai naka tu aja?