Petara madah ngagai Adam, “Lebuh nuan makai [buah ari pun kayu] nya, nuan deka mati.” (Pemungkal 2:17) Enti Petara ngaga Adam ngambika mansang tuai lalu mati, tentu Iya nadai kebuah meri Adam pesan nya. Adam nemu enti iya enda makai buah ari pun kayu nya, iya deka terus idup.

Adam seduai Hawa enda ibuh makai buah ari pun kayu nya enti seduai iya deka terus idup, laban ba kebun nya bisi mayuh pun kayu bukai ti mansutka buah. (Pemungkal 2:9) Enti seduai iya enda makai buah ari pun kayu nya, tu nunjukka seduai iya ngasika Petara ti udah meri seduai iya pengidup. Tu mega nunjukka seduai iya ngaku semina Petara ke ulih ngiring pengidup seduai iya.

Kena meretika nama kebuah Adam seduai Hawa mati, kitai patut beratika siti randau ke bisi empas ti besai ba pengidup semua kitai. Sitan ngena seiku ular nyebut utai ti bula. Bup Kudus madahka: ‘Nyadi ular nya jelu ti pintar agi ari semua jelu bukai ti udah digaga Petara Jehovah. Ular nya lalu bejaku ngagai indu nya, “Kati amat Petara enda nyagi seduai makai buah ari semua kayu ti dalam kebun tu?”’—Pemungkal 3:1.

Hawa nyaut: ‘Kami duai tau makai buah ari sebarang kayu dalam kebun tu, tang Petara madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.’ Tang ku ular nya nyaut iya, ‘Enda seduai mati, laban Petara nemu, lebuh seduai makai buah nya, seduai deka nyadi sebaka enggau Petara, nemu ngelala bida entara utai ti manah enggau utai ti jai.’ Ari ayat tu kitai nemu, Sitan nuduh Jehovah nya pemula laban udah ngelalaika utai ti manah ari Adam seduai Hawa.—Pemungkal 3:2-5.

Hawa pechayaka jaku Sitan. Iya meda pun kayu nya manah dipeda sereta narit ati! Udah nya Hawa ngambi sekeda buah nya lalu makai iya. Bup Kudus madahka: “Iya mega meri sekeda buah nya ngagai laki iya, ke bisi enggau iya, lalu laki iya mega makai buah nya.”—Pemungkal 3:6.

Naka meh penusah ati Petara lebuh meda anak ti dikesayauka Iya sengaja enda ngasika Iya! Nama digaga Petara? Iya madah ngagai Adam: “Nuan deka . . . pulai baru ngagai tanah, laban  nuan endang ditempa ari tanah.” (Pemungkal 3:17-19) Ketegal tu, Adam “mati umur 930 taun.” (Pemungkal 5:5) Adam nadai ngagai serega tauka ngagai menua sebayan, tauka kini-kini. Sebedau Jehovah ngaga Iya ngena tanah, Adam bedau idup. Nyadi lebuh iya mati, iya badu agi idup lalu tubuh iya nyadi tanah baru. Sayau amat pengidup iya lenyau pia aja!

Ketegal Adam seduai Hawa sengaja enda ngasika Petara, seduai iya bedosa lalu nyadi enda sempurna. Nya alai, seduai iya lenyau peluang idup belama iya. Tang ukai seduai iya aja ke napi penusah nya. Tu mega ngelekai ngagai peturun seduai iya. Rome 5:12 madahka: “Baka dosa ti datai ngagai dunya nengah orang siku [Adam], lalu pemati datai laban dosa, nya alai pemati ngelekai ngagai semua mensia, laban semua bela udah bedosa.”

Bup Kudus madahka dosa enggau pemati sempama “kain ti malut semua orang sereta penutup ti mungkur semua bansa.” (Isaiah 25:7, NW) Kain ti malut semua mensia nya baka asap ti berachun, lalu nadai orang ulih ngerarika diri. Endang amat, “semua mensia mati dibai Adam.” (1 Korint 15:22) Nya alai, rasul Paul nanya: “Sapa deka ngelepaska aku ari tubuh tu ti mai aku ngagai pemati?” Kati ulih sapa-sapa ngelepaska kitai ari pemati?—Rome 7:24.