1, 2. Nama utai ke ngasuh orang nembiak ke nyembah Jehovah kekadang kakang ati, lalu nama jaku ajar ke diberi Bup Kudus?

SEIKU nembiak ke sekelas enggau seiku menyadi Kristian indu ari menua Britain madahka: “Nuan baka ke chukup penemu, nya alai nuan deka pechayaka Petara.” Seiku menyadi Kristian ari menua Jerman nulis: “Bala cikgu aku ngumbai cherita dalam Bup Kudus pasal utai ti ditempa nya cherita ngapa. Lalu sida enda ibuhka cherita nya laban bala nembiak pechayaka evolusi.” Seiku menyadi Kristian indu ari menua Perancis madahka: “Bala cikgu ba sekula aku alit ati laban agi bisi nembiak ke pechayaka Bup Kudus.”

² Mayuh orang kemaya hari tu enda pechaya, Petara nempa kitai. Enti nuan nya orang nembiak ke nyembah Jehovah tauka benung belajar pasal Iya, nuan kekadang engka berunding baka ni nuan ulih nunjukka Iya endang Penempa kitai. Bup Kudus nulung kitai berunding enggau bejimat pasal utai ti didinga tauka dibacha kitai sereta nerangka utai nya. Bup Kudus madahka: “Pemintar runding . . . deka nyaga nuan.” Baka ni? Iya deka nulung nuan nulak penemu ke enda betul sereta negapka pengarap nuan ngagai Jehovah.—Bacha Jaku-Dalam 2:10-12.

3. Nama deka dikerandauka kitai ba artikel tu?

³ Ngambika bisi pengarap ti tegap ngagai Jehovah, kitai enda tau enda ngelala Iya enggau manah. (1 Tim. 2:4) Nya alai lebuh nuan macha Bup Kudus sereta litaricha kitai, endang amat beguna berundingka pasal utai ti benung dibacha. Uji meretika utai ti benung dibacha nuan. (Mat. 13:23) Enti nuan belajar ngena chara tu, nuan ulih tetemuka mayuh  bukti ke nunjukka Jehovah endang Penempa kitai, lalu Bup Kudus endang ari Iya. (Heb. 11:1) Aram kitai berandauka chara kitai ulih ngereja nya.

4. Baka ni pechayaka evolusi nya sama baka pechayaka utai ti ditempa? Nya alai, nama enda tau enda digaga semua kitai?

⁴ Orang engka madahka ngagai nuan, “Aku pechayaka evolusi laban bala saintis madahka penemu nya amat. Baka ni nuan ulih pechaya ngagai Petara enti orang nadai kala meda Iya?” Mayuh orang berunding baka tu. Amat, nadai seiku ari kitai ke kala meda Petara tauka meda siti-siti utai benung ditempa. (Jhn. 1:18) Tang baka ni enggau orang ti pechayaka evolusi? Sida mega pechayaka siti-siti utai ti enda ulih dipeda sida. Nadai saintis tauka mensia bukai ke kala meda sesebengkah utai idup berubah nyadi utai bukai. Ngambika chunto, nadai seiku orang ke kala meda mayas berubah nyadi mensia. (Jop. 38:1, 4) Nya alai semua kitai enda tau enda beratika fakta nya, berundingka fakta nya enggau bejimat, lalu ngaga pemutus ari utai ti diterangka fakta nya. Mayuh orang udah beratika utai idup ba dunya tu, lalu ‘nemu’ Petara endang bisi. Sida udah ‘meda,’ Iya endang Penempa, bekuasa sereta bisi mayuh kualiti ti badas.—Rom. 1:20.

5. Nama perengka pansik ke ulih nulung kitai belajar mayuh agi pasal utai ti ditempa?

⁵ Lebuh kitai meda utai idup ba dunya tu lalu berunding enggau dalam pasal utai nya, kitai ulih nemu, semua utai digaga enggau chara ti ngalitka ati. “Ulih pengarap, kitai nemu” Penempa endang bisi, taja pan Iya enda ulih dipeda. Kitai nemu, Iya bisi personaliti ti manah sereta penemu-dalam ti tinggi. (Heb. 11:3, 27) Kitai ulih belajar mayuh agi pasal utai ti ditempa Iya enggau macha utai ti udah ditemu bala saintis. Sekeda ari penerang nya ulih ditemu dalam perengka pansik baka video The Wonders of Creation Reveal God’s Glory, brosur Adakah Kehidupan Diciptakan?-ML, enggau Asal Mula Kehidupan—Lima Pertanyaan yang Patut Direnungkan-IN, sereta bup Apakah Ada Pencipta yang Mempedulikan Anda?-IN Dalam majalah Sedarlah!, suah bisi interbiu enggau bala saintis sereta orang bukai ke nerangka kebuah sida diatu pechayaka Petara. Lalu artikel ke bisi ba “Apakah Ini Dirancang?”-IN bisi penerang pasal jelu enggau utai idup bukai ba dunya tu sereta chunto pasal baka ni bala saintis udah nguji niru chara utai idup tu bekereja.

6. Baka ni perengka pansik ulih nulung nuan?

⁶ Seiku menyadi Kristian lelaki di menua Amerika Serikat ke beumur 19 taun madahka pasal dua iti brosur ke baru disebut tadi: “Brosur nya amat berega ba aku. Aku udah belajarka brosur nya mayuh kali.” Seiku menyadi Kristian indu ari menua Perancis nulis: “Artikel ‘Apakah Ini Dirancang?’-IN ngalitka ati aku! Artikel nya nunjukka, injinir ke pemadu tebilang ulih niru tang enda ulih telabanka utai idup ti kompleks ke bisi ba dunya tu.” Apai indai ke seiku nembiak indu ti beumur 15 taun ari menua Afrika Selatan madahka: “Utai keterubah ke suah dibacha anak indu kami dalam Sedarlah! iya nya artikel ‘Wawancara.’” Litaricha tu mega ulih nulung nuan meda bukti, Penempa endang bisi, lalu nuan ulih ngelala sereta nulak ajar ti  bula. Pengarap nuan deka tegap agi nyentukka nuan deka nyadi baka sepun kayu ke bisi urat ti dalam lalu deka mengkang tan ari dipangkaka kabut.—Jer. 17:5-8.

7. Nama kebuah Petara dekaka nuan ngelala bida entara utai ti badas enggau utai ti jai?

⁷ Kati nya salah enti nanya baka tu, ‘Nama kebuah aku pechayaka utai ti dipadah Bup Kudus?’ Enda. Jehovah enggai nuan pechayaka siti-siti utai ketegal orang bukai pechayaka utai nya. Iya dekaka nuan “ngelala bida entara utai ti badas enggau utai ti jai” kena ngelala Bup Kudus sereta ngulihka bukti ke amat ari Iya. Mayuh agi utai dalam Bup Kudus ditemu nuan, tegap agi pengarap nuan. (Bacha 1 Timoti 2:4; Hebrew 5:14.) Siti chara kena ngelala Bup Kudus, iya nya enggau belajarka siti-siti topik ti nyemetak ke deka ditemu nuan enggau mayuh agi.

8, 9. (a) Nama topik ke rindu dipelajarka sekeda orang? (b) Baka ni sekeda orang bulih penguntung lebuh sida berundingka enggau dalam pasal utai ti dibacha sida?

⁸ Sekeda orang rindu belajarka semaya ari Petara ke bisi dalam Bup Kudus. Tauka sida engka rindu deka mandingka cherita dalam Bup Kudus enggau utai ti dipadah bala pakar sejarah, bala saintis tauka bala pakar arkeologi. Ngambika chunto, Pemungkal 3:15. Jehovah meri semaya ke beguna amat tu pengudah Adam seduai Hawa ngelaban Iya sereta chara Iya merintah. Tu semaya ti keterubah ari pemayuh semaya Petara ke bisi dalam Bup Kudus. Semaya tu nulung kitai meretika baka ni Perintah Petara deka nunjukka chara Petara merintah nya pemadu badas sereta baka ni Perintah nya deka muai semua pemerinsa. Baka ni chara nuan ulih belajarka Pemungkal 3:15? Nuan ulih nuliska sekeda ayat Bup Kudus ke meri mayuh penerang pasal baka ni semaya ari Petara nya deka dikeamatka. Udah nya, nuan ulih ngiga kemaya semua ayat nya ditulis lalu nusun ayat nya nitihka ripih. Enda lama udah nya nuan deka nemu, bala penulis Bup Kudus diau ba timpuh ti enda sama tang tiap iku sida nulis utai ke ngasuh semaya ari Petara nya majak terang. Tu nulung nuan pechaya, roh kudus Jehovah udah ngiring sida.—2 Pet. 1:21.

⁹ Seiku menyadi Kristian lelaki ari menua Jerman berunding pasal baka ni tiap iti bup mit dalam Bup Kudus bisi penerang pasal Perintah Petara. Ku iya madahka: “Tu endang amat, taja pan kira-kira 40 iku orang nulis Bup Kudus. Lalu mayuh ari sida idup ba timpuh ti enda sama sereta enda ngelala pangan diri.” Seiku menyadi Kristian indu ari menua Australia udah belajarka artikel dalam The Watchtower kena 15 Disember 2013, lalu nemu baka ni pengerami Paska bekaul enggau Pemungkal 3:15 sereta Messiah. Ku iya nulis: “Utai ti dipelajar nya ngasuh aku nemu, Jehovah endang badas. Orang ke ulih berundingka pasal atur tu ke orang Israel lalu ngasuh atur tu dikeamatka dalam Jesus, amat ngalitka ati aku. Aku patut berunding enggau dalam, naka meh pemanah semaya ari Petara ke bekaul enggau pengerami Paska!” Nama kebuah menyadi Kristian indu nya ngasaika baka nya? Iya berunding enggau dalam pasal utai ti dibacha iya sereta meretika utai nya. Tu nulung negapka pengarap iya, lalu mai iya semak agi ngagai Jehovah.—Mat. 13:23.

10. Baka ni pengawa lurus orang ke nulis Bup Kudus ngeringka pengarap kitai ngagai Bup Kudus?

¹⁰ Perundingka mega pasal pengawa lurus orang ke nulis Bup Kudus. Sida seruran madahka pemendar lalu enda takut ngereja nya. Bala penulis maya nya, kesuah agi semina nulis utai ti manah pasal bansa enggau raja sida. Tang bala nabi Jehovah ukai semina nulis pasal utai ti manah, tang sida mega nulis pasal utai ti enda manah ke dikereja orang Israel  enggau bala raja sida. (2 Ban. 16:9, 10; 24:18-22) Sida indah nyebut pasal penyalah diri sereta nembiak Petara ke bukai. (2 Sam. 12:1-14; Mrk. 14:50) Ku seiku menyadi Kristian lelaki ke biak ari menua Britain madahka: “Pengawa ti lurus baka tu jarang nyadi. Tu nambahka pengandal kitai, Bup Kudus endang amat ari Jehovah.”

11. Baka ni iring ke ditemu kitai dalam Bup Kudus ngasuh kitai pechaya Bup Kudus endang ari Petara?

¹¹ Lebuh orang ngawakka Bup Kudus ngiring chara sida idup, sida ulih meda asil iya ti manah. Tu ngasuh sida pechaya, Bup Kudus endang ari Petara. (Bacha Masmur 19:7-11.) Seiku menyadi Kristian indu ari menua Jepun nulis: “Enggau nitihka ajar Bup Kudus, kami sebilik amat lantang ati. Kami ngasaika pemaik, penyerakup enggau pengerindu.” Bup Kudus udah nulung mayuh orang nemu, sekeda utai ti dipechaya sida nya enda amat. (Mas. 115:3-8) Iya ngiring orang bepanggai ba Jehovah, Petara ti pemadu bekuasa, lalu besemayaka utai ti manah agi ke jemah ila. Tang, sekeda orang ke ngumbai nadai Petara, iya ke amat sida ngaga utai ba dunya tu nyadika petara. Sida ke bukai madahka, mensia ulih nyediaka utai ti manah agi ke jemah ila, tang lebuh kitai meda utai ti udah digaga sida nyentuk ke diatu, sida enda ulih mutarka penanggul ba dunya.—Mas. 146:3, 4.

12, 13. Baka ni kitai ulih berandau enggau orang bukai pasal utai ti ditempa ba dunya tauka pasal Bup Kudus?

¹² Lebuh nuan berandau pasal utai ti ditempa ba dunya tauka pasal Bup Kudus enggau orang bukai, keterubah iya giga nama utai ti amat dipechayaka sida. Kingatka, sekeda orang ke pechayaka evolusi mega pechayaka Petara amat bisi. Sida madahka, Iya ngena evolusi nempa semua utai idup. Sekeda ke bukai pechaya, evolusi endang amat laban iya diajar ba sekula. Lalu sekeda orang badu pechayaka Petara laban sida asa ati enggau jalai pengarap. Nya alai, tanya dulu nama utai ti dipechayaka orang nya sereta kebuah iya pechayaka utai nya. Udah nya dingaka utai ti disebut iya enggau bejimat. Enti nuan ngereja nya, iya deka agi mendingka nuan.—Tit. 3:2.

¹³ Enti orang ngumbai nuan beli laban pechayaka Penempa amat bisi, baka ni nuan deka nyaut? Enggau bebasa minta orang nya nerangka ngagai nuan, nama penemu iya pasal baka ni utai idup berengkah. Nuan ulih nerangka, enti utai idup ulih berubah nyadi utai bukai, utai idup ti keterubah tentu ulih ngasilka siti agi utai bukai ari iya empu. Iya ke amat, seiku profesor kimia madahka, utai idup nya begunaka, (1) utai ke baka kulit kena nyaga iya, (2) penau kena ngulihka sereta ngena tenaga, (3) penerang kena nentuka gamal enggau pemesai, sereta (4) penau ulih nyalin penerang nya baru. Ku iya nambahka: “Orang balat alit ati indah enggau utai idup ti enda kompleks.”

14. Nama chara nerang ti senang ke ulih dikena nuan lebuh berandauka pasal utai ti ditempa ba dunya?

¹⁴ Lebuh berandau pasal utai ti ditempa ba dunya, nuan ulih ngena chara nerang ti senang baka ke dikena rasul Paul. Iya nulis: ‘Semua rumah endang digaga orang, tang Petara ngaga semua utai.’ (Heb. 3:4) Endang amat, rumah digaga sereta didirika orang. Nya alai, utai idup ke balat agi kompleks ari rumah tentu digaga orang. Nuan mega ulih ngena litaricha kitai. Seiku menyadi Kristian indu berandau enggau seiku lelaki biak ke enda pechayaka Petara amat bisi. Iya meri lelaki nya dua iti brosur ke disebut ba pun tadi, lalu kira-kira seminggu udah nya, ku lelaki nya madahka, “Diatu aku pechayaka Petara.” Lelaki nya berengkah belajarka Bup Kudus,  lalu udah nya nyadi seiku ari menyadi Kristian lelaki kitai.

15, 16. Nama patut digaga kitai sebedau nerangka ngagai orang pasal Bup Kudus ke endang ari Petara? Lalu nama patut dikingatka kitai?

¹⁵ Enti orang enda entu pechayaka Bup Kudus, baka ni nuan ulih nerangka ngagai iya? Baka ke dipadah sebedau tu, tanya dulu nama utai ti dipechaya iya. Pia mega, giga nama utai ti dikerinduka iya. (J-lam. 18:13) Enti iya rinduka sains, beri iya chunto ari Bup Kudus kena nunjukka utai ti dipadah Bup Kudus pasal pekara ti bekaul enggau sains endang seruran betul. Enti iya rinduka sejarah, nuan ulih nyebut pasal siti pekara ke bisi dalam bup sejarah, lalu nunjukka ngagai iya baka ni Bup Kudus udah madahka pasal pekara nya betaun-taun sebedau iya dikeamatka. Sekeda orang deka mendingka nuan enti nuan nunjukka prinsip Bup Kudus ke ulih ngemanahka agi pengidup sida, baka jaku ajar ke bisi dalam Ajar ba Atas Bukit.

¹⁶ Kingatka, kitai enggai bekelikuh enggau orang. Kitai deka sida rindu berandau enggau kitai sereta belajarka Bup Kudus. Nya alai, tanya sida enggau bebasa, udah nya dingaka sida enggau bejimat. Lebuh nuan madahka utai ti dipechaya nuan ngagai orang, padahka nya enggau bebasa, kelebih agi enti orang nya tuai agi ari nuan. Enti nuan bebasaka orang bukai, sida mega deka bebasaka nuan. Lalu sida deka alit ati laban nuan udah berundingka enggau dalam pasal utai ti dipechaya nuan taja pan nuan agi biak. Endang amat, enti orang semina deka bekelikuh tauka ngeleseka nuan, nuan tau enda ibuh nyaut iya.—J-lam. 26:4.

17, 18. (a) Nama ulih nulung nuan negapka pengarap nuan ngagai Bup Kudus? (b) Nama tanya ti deka dikerandauka ba artikel pengudah tu?

¹⁷ Kitai engka nemu batang ajar ari Bup Kudus, tang kitai begunaka lebih agi ari nya ngambika bisi pengarap ti tegap. Kitai patut mansik sereta ngiga pemendar ke dalam agi ba Bup Kudus, baka kitai ke ngiga reta ti dipelalaika. (J-lam. 2:3-6) Siti chara ti pemadu manah kena negapka pengarap nuan iya nya macha semua ayat Bup Kudus. Nuan ulih nguji macha iya dalam kandang setaun. Tu udah nulung seiku tuai ti ngabas semak agi ngagai Jehovah lebuh iya agi biak. Ku iya madahka: “Siti utai ke nulung aku beterima kasih ke Bup Kudus nya endang Jaku ari Petara iya nya enggau macha semua ayat nya. Cherita dalam Bup Kudus ke udah dipelajarka aku lebuh agi mit nyau kelama ulih diterima aku.” Pia mega, kena meh perengka pansik ke dikemisi dalam bansa jaku nuan kena nulung nuan meretika utai ti dibacha nuan. Nuan patut bisi Watchtower ONLINE LIBRARY, enggau Bup Dikena Saksi-Saksi Jehovah Ngiga Pansik.

¹⁸ Lebih agi ari orang bukai, kita ke apai indai patut ngajar bala anak kita pasal Jehovah. Nya alai, baka ni kita ulih nulung sida bisi pengarap ti tegap ngagai Jehovah? Artikel pengudah tu deka berandauka sekeda chara nya.