Enda lama da agi, Perintah Petara deka ngenataika pemaik enggau pengelikun ba serata dunya. Maya nya mensia deka “ngasaika mayuh pemaik” baka ke disemayaka ba Masmur 72:7, NWT. Kemaya Perintah Petara deka berengkah merintah dunya? Baka ni Perintah Petara mutarka penanggul? Baka ni nuan ulih ngasaika berekat ke disemayaka?

Bup Kudus madahka, sebedau Perintah Petara datai, dunya deka bisi perang, lapar pungkang, sereta penyakit berampit. Kelimpah ari nya, tanah berenyang deka suah nyadi lalu penyai deka majak betambah. Semua utai ke nyadi tu, “tanda” Perintah Petara deka merintah enda lama da agi.—Matthew 24:3, 7, 12; Luke 21:11; Pemandang 6:2-8.

Bup Kudus mega nerangka, ‘Ba hari ti penudi mayuh macham penusah deka nyadi. Laban orang deka semina berundingka diri empu aja, angkunka duit, . . . enda ngasika apai indai, enda nemu meri terima kasih, enda kudus, kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas, . . . sumbung, semina deka ngelantangka diri lalu enda rinduka Petara.’ (2 Timoti 3:1-4) Ulah ke baka tu endang udah bisi ba sekeda orang kenyau ari kelia. Tang kemayaharitu, ulah tu majak balat dikembuan mayuh orang.

Utai ke dipadah ba Bup Kudus tu berengkah nyadi ba taun 1914. Mayuh pakar sejarah, pakar merintah enggau penulis udah nyebut pasal ubah ba dunya ke nyadi pengudah taun nya. Chunto iya, Peter Munch seiku pakar sejarah ari Denmark nulis, “Perang ke nyadi ba taun 1914 nya siti ubah ti besai dalam sejarah mensia. Sebedau tu, kitai baka ke majak maju, . . . tang iya ke amat kitai benung tama ngagai jeman ke penuh enggau pengerusak alam, utai ti ngenakutka, pemenchi enggau bahaya.”

Ke bendar iya, utai jai ke nyadi tu nyadika tanda utai ti manah deka nyadi. Enda lama da agi, Perintah Petara deka merintah serata dunya. Lebuh nyebut pasal tanda pengujung dunya, Jesus mega madahka, ‘Lalu Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—Matthew 24:14.

Nya kebuah Saksi-Saksi Jehovah naka ulih nusui Berita Manah nya. Nyentukka tema litaricha sida mega betajuk Menara Jaga—Meritaka Perintah Jehovah. Dia selalu nerangka utai manah ke deka digaga Perintah Petara ngagai bumi sereta mensia.

Bisi empat fakta ti penting:

1. Pemerintah politik ba dunya tu enda ngarika Perintah Petara.

2. Pemerintah politik ba dunya enggai ngelepaska kuasa sida, lalu deka ngelaban Perintah Petara.—Masmur 2:2-9.

3. Perintah Petara patut munaska perintah dunya ke keran deka nguasa mensia. (Daniel 2:44; Pemandang 19:17-21) Perang ke penudi ti deka nyadi nya dikumbai Armagedon.—Pemandang 16:14, 16.

4.   Semua orang ke tetap ati ngagai Perintah Petara deka diselamatka maya Armagedon. Bup Kudus madahka, bisi “mayuh amat orang” ke engka bejuta iku deka tama ngagai dunya baru ti penuh enggau pemaik.—Pemandang 7:9, 10, 13, 14.

Enti deka nyadi rayat ba Perintah Petara, utai keterubah ke patut dikereja kitai nya, belajar. Ba sampi Jesus nyebut, ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’—John 17:3.

Orang ke ngelala Petara Jehovah sereta nyadi pangan Iya deka bulih mayuh penguntung. Perundingka dua iti penguntung nya: Kesatu, sida ngembuan pengarap ti tegap ngagai Petara pengudah sida mansik bukti ke udah disediaka. Pengarap nya ngasuh sida andal, Perintah Petara endang amat bisi lalu deka merintah enda lama da agi. (Hebrew 11:1) Kedua, sida majak rinduka Petara sereta orang bukai. Pengerindu ke Petara meransang sida ngasika Iya ari ati, ukai ketegal dipejal. Lalu pengerindu ke orang bukai meransang sida ngasika pesan Jesus ti madah, “Kereja ngagai orang baka ke dikedekaka kita kereja sida ngagai kita.”—Luke 6:31.

Apai kitai ti ba serega dekaka utai ti pemadu manah ke kitai. Iya dekaka kitai ngembuan “pengidup ti bendar.” (1 Timoti 6:19) Pengidup kitai kemayaharitu, ukai “pengidup ti bendar.” Bejuta iku orang idup tusah sereta patut bebendar neruska pengidup. Baka ni asai “pengidup ti bendar”? Peda meh sekeda penguntung ke deka diasaika rayat Perintah Petara.