Lebuh bisi lawatan sekula, beberapa iku nembiak lelaki dituduh ngachau seiku nembiak lelaki ke bukai enggau chara ti kamah. Semua sida tu pemelajar ba sekula swasta ti tebilang di Kanada. Pengudah utai nya nyadi, Leonard Stern nulis dalam surat khabar Ottawa Citizen, “Pangkat ti tinggi, pemandai sereta sekula tinggi enda ulih nagang bala nembiak ari ngereja ulah ti enda bemoral.”

Stern mega nulis, “Kitai engka ngumbai tuju apai indai deka ngajar anak sida ba moral. Tang, mayuh apai indai deka agi anak sida bulih peresa ti manah tauka gaji ti besai jemah ila.”

Pelajar endang penting, tang pelajar ti pemadu manah pan enda ulih nulung seseiku orang ngelaban ulah ti jai. Nya alai, dini kitai ulih tetemuka chara mutarka penanggul nya?

Bup Kudus ulih disemaka baka cheremin. Lebuh kitai nijau diri ngena Bup Kudus, kitai deka nemu agi pasal pengelemi sereta tatak diri empu. (James 1:23-25) Ukai nya aja, Bup Kudus ulih ngubah sereta nulung kitai ngemansangka ulah ke bisi pemaik sereta penyerakup. Chunto iya, baka pemadas, pengeliat ati, pemanah ati, ulih nagang diri sereta pengerindu. Pengerindu mega ulih “ngempung semua utai nyadi siti.” Reti iya, pengerindu ulih nyerakupka semua orang enggau sempurna. (Kolosi 3:14) Nama kebuah pengerindu amat spesial? Peratika utai ti dipadah dalam Bup Kudus.

• “Pengerindu nya liat ati, nelap, enda kepapas, enda temegah tauka sumbung, tauka jai jaku enggau orang. Pengerindu enda berundingka diri empu, enda jampat ringat tauka bedendam. Pengerindu enda gaga ati ke penyalah, tang gaga ati ke utai ti bendar. Pengerindu natka semua utai, . . . tan dalam semua utai. Pengerindu enda nemu abis.”—1 Korint 13:4-8.

• “Pengerindu enda ngemediska orang.”—Rome 13:10.

• “Iya ke lebih agi, seruran rinduka pangan diri, laban pengerindu muai mayuh macham dosa.”—1 Peter 4:8.

Nama asai ati nuan lebuh berimbai enggau orang ke sayauka nuan? Kati nuan berasai likun, selamat enggau tenang? Nuan tentu berasai baka nya, laban nuan nemu iya beberatka pengelikun nuan sereta enggai ngemediska nuan.

Pengerindu ulih ngasuh orang enda berundingka diri empu, tauka sanggup ngubah chara pengidup ngambika semua orang bulih penguntung.  Chunto iya, seiku lelaki ke baru nyadi aki amat keran deka begulai enggau uchu iya. Tang, iya balat nginsap, lalu menantu lelaki iya enggai ngemendarka iya nginsap semak anak mit nya. Nya alai, iya pan ngetu nginsap taja pan iya udah ngembuan tebiat nya pengelama 50 taun. Endaka utai tu nunjukka kuasa pengerindu?

Kitai patut belajar ngemansangka pengerindu. Apai indai bisi tanggung pengawa ti penting, iya nya ngajar anak sida pasal pengerindu. Sida nyaga, ngelindung sereta nulung anak sida kelebih agi lebuh anak sida sakit tauka pedis. Apai indai ti manah deka berandau sereta ngajar anak sida. Apai indai mega disiplin anak sida sereta nulung sida belajarka prinsip pasal utai ti betul enggau utai ti salah. Kelimpah ari nya, apai indai mega patut nyadi teladan ti manah ke anak sida.

Sayau amat, sekeda apai indai enda bejalaika tanggung pengawa sida enggau manah. Tang, kati tu reti iya anak sida deka nyadi orang ke enda menyana? Enda! Mayuh orang nyengkaum sida ke dibesaika dalam ruang bilik ti bepenanggul, udah ngaga ubah ti besai lalu nyadi orang ti lurus sereta bepengerindu. Artikel ke nangkan ngembuan cherita pengidup sekeda orang ke mujur ngubah pengidup, taja pan sebedau tu sida dikumbai enda ulih berubah.