PENANGGUL
Kitai Enda Ulih Berasai Likun sereta Selamat
“Generasi kemayaharitu ngembuan teknologi, sains enggau pengaya ti pemadu badas . . . Tang tu engka generasi keterubah ti deka ngerusak semua sistem [politik, ekonomi, enggau alam sekitar] ba dunya tu.”—Riput ari Risiko Global 2018, Forum Ekonomi Dunia.
NAMA KEBUAH MAYUH ORANG IRAU PASAL PENGIDUP MENSIA JEMAH ILA SERETA BUMI? PERATIKA SEKEDA PENANGGUL KE DITAPI KITAI.
-
JENAYAH SIBER: “Nitihka surat khabar The Australian, Internet majak enda likun laban muka peluang ngagai orang ke ngachau anak mit enggau chara seksual, penggodam (hacker), pembuli, enggau troll, iya nya pengawa ke ngayanka mesej ti ulih ngasuh orang ringat tauka laya nyadi. Surat khabar nya mega nyebut, “Ngenchuri pasal maklumat orang bukai, nya siti jenayah ti pemadu tebilang di dunya. . . . Nengah Internet, ulah mensia ti jai majak balat agi nyadi.”
-
BISI ORANG KELALU KAYA LALU BISI ORANG KELALU MISKIN: Empai lama ti udah, nitihka riput Oxfam bisi lapan iku orang ke pemadu kaya ba dunya ngembuan pengaya ke sama penyampau enggau pengaya 3.6 biliun orang ke pemadu miskin ba dunya. Riput nya mega madah, “Ekonomi kitai mayuh penanggul. Sekeda orang ke kaya nyadi majak kaya, tang orang ke miskin nyadi majak miskin, lalu mayuh ari sida nya orang indu.” Sekeda orang irau bida entara orang ke kaya enggau orang ke miskin ulih ngasuh orang bepechah-belah.
-
PERANG, DITEKAN, SERETA DIPERINSA: Riput taun 2018 ari Pertubuhan Bangsa-Bangsa Bersatu pasal Orang Kampar madahka: “Dalam dua sikin aja, seiku orang patut ngerarika diri alai endur sida diau. Tu meh penyampau ke pemadu mayuh ke kala didinga kitai. Ba serata dunya, bisi lebih ari 68 juta iku orang ke ngerarika diri ari endur sida diau, lalu mayuh ari sida nya mansa perang, ditekan sereta diperinsa.
-
ALAM SEKITAR MAJAK KAMAH SERETA MAYUH UTAI PUPUS: Riput Risiko Global 2018 nerangka, “Mayuh utai idup majak pupus enggau jampat. . . . Udara enggau utai ba tasik majak kamah lalu ngachau pengerai mensia.” Kelimpah ari nya, penyampau indu utai ba sekeda menua majak pupus enggau jampat. Entara indu utai nya indu buyah, kesulai, kumbang enggau manyi. Ketegal indu utai tu penting ba proses pendebungaan, pakar sains meri tangkan enti sema indu utai tu majak pupus, alam sekitar ulih rusak. Terumbu karang mega majak pupus. Nitihka pansik, nyauka setengah ari terumbu karang ba bumi udah mati dalam timpuh 30 taun ti udah.
Kati kitai ulih ngubah dunya tu nyadi likun sereta selamat agi? Sekeda orang ngumbai, belajar tinggi ulih nulung. Enti pia, ni bagi pelajar ke diguna kitai? Artikel ke nangkan deka nyaut beberapa tanya tu.