Pertubuhan Bangsa-Bangsa Bersatu (PBB) benung nekanka konsep, “warganegara global.” Tuju tu kena ngerapatka agi kerejasama entarabansa, bebasaka hak mensia, sereta ngelindung bumi. Nama kebuah? Baka ke diterangka Maher Nasser, ba UN Chronicle, “gaya hari ti berubah, gerempung jenayah, utai ti enda lurus, penanggul ke enda ulih diputarka, penyampau pelarian ke majak mayuh, pengawa pengganas, penyakit berampit, sereta utai ti bahaya ke bukai enda ngira . . . sempadan.”

Sekeda orang indah netapka perintah ba serata dunya patut beserakup, tu nyengkaum Dante (1265-1321), iya nya seiku pakar falsafah, pakar politik, sereta penyair ari Itali, enggau Albert Einstein (1879-1955), iya nya seiku pakar fizik. Dante pechaya, seagi-agi politik ba dunya bepechah-belah, pemaik enda ulih meruan belama iya. Iya nyebut jaku Jesus Kristus ke bebunyi, “Semua perintah ti bepechah-belah lalu beripih ngelaban diri empu, deka rusak.”—Luke 11:17.

Enda lama pengudah Perang Dunya Kedua, ke bekenaka dua iti bom atom, Albert Einstein enggau ngerang nulis surat ngagai Perhimpunan Agung PBB. Ku iya madah, “PBB patut enggau jampat nyerakupka perintah ba serata dunya ngambika pengelikun entarabansa ulih dijapai.”

Tang kati bala pakar politik ke numbuhka penyerakup ba serata dunya tu sigi betanggungjawap, lurus sereta enda makai suap? Tauka kati sida deka nyadi pemerintah ti jai, baka pemerintah ke bukai? Tanya ke baka tu ngingatka kitai pasal jaku Lord Acton, iya nya seiku pakar sejarah Britain. Ku iya madah, “Orang ke bekuasa seruran enda lurus, kelebih agi enti iya ngembuan kuasa ti nadai tatak. Iya sigi deka ngena kuasa nya enggau chara ti salah.”

Ngambika bisi pemaik sereta pengelikun, semua mensia patut beserakup. Tang baka ni utai tu ulih dijapai? Kati tu enda ulih nyadi? Bup Kudus madahka, penyerakup tentu deka dijapai. Tang baka ni chara iya? Ukai ngena perintah mensia ba serata dunya ke dipegai bala politik ti amu, tang nengah perintah ke ditumbuhka Petara. Nengah perintah tu, hak Petara ti deka merintah semua utai ke ditempa Iya deka nyadi nyata. Ba Bup Kudus, perintah tu dikumbai ‘Perintah Petara.’—Luke 4:43.

Lebuh Jesus Kristus ngajar murid iya besampi: “Datai meh Perintah Nuan. Nyadi meh peneka Nuan di dunya.” Perintah ke disebut Jesus tu ditujuka ngagai Perintah Petara (Matthew 6:9, 10) Perintah Petara deka ngamatka peneka Petara ba dunya, ukai peneka mensia ke amu sereta gila kuasa.

Perintah Petara mega dikumbai “Perintah serega.” (Matthew 5:3) Nama kebuah iya dikumbai munyi tu? Laban perintah tu deka bekuasa atas bumi, lalu merintah ari serega. Ketegal Perintah Petara ukai ba bumi, nyadi perintah tu enda begunaka duit, chunto iya ngumpul chukai. Reti iya, Perintah Petara nadai sekali-kali ngenusahka rayat!

Petara udah milih Jesus Kristus nyadi Raja ba Perintah Iya. Bekaul enggau Jesus, Bup Kudus nerangka:

• “Iya deka nyadi raja kitai. . . . Kuasa diraja iya deka majak mansang. Perintah iya deka seruran bisi pemaik.”—Isaiah 9:6, 7.

•   ‘Iya diberi kuasa, basa enggau mulia, ngambika orang ari semua menua, bansa, enggau jaku betuaika iya magang. Kuasa iya deka meruan belama iya, lalu perintah iya enda nemu abis.’—Daniel 7:14.

• ‘Perintah dunya diatu udah nyadi Perintah Petara kitai enggau Perintah Kristus Iya, lalu iya deka merintah belama-lama iya!’—Pemandang 11:15.

Baka ke dipinta dalam sampi Jesus, Perintah Petara deka ngamatka semua peneka Petara ba dunya. Ba baruh Perintah Petara, semua mensia deka belajar chara nyaga bumi, ngambika bumi kitai ke sakit tu ulih digeraika baru sereta penuh enggau utai idup.

Perintah Petara deka ngajar semua rayat Iya nitihka standard ti sama. Semua mensia deka beserakup lalu enda bemunsuh agi. Isaiah 11:9 madahka, ‘Nadai utai ti jai dia, lalu nadai utai ti tau ngasuh bebadi. Dunya deka penuh laban penemu Jehovah baka ai ti ngemenuhka tasik.’

Maya nya, semua orang ke idup ba bumi deka beserakup sereta idup dalam pemaik—tu meh utai ke deka dijapai PBB. Masmur 37:11 madahka, sida “deka bempu menua tu lalu diau lantang ngena pengaya sida.” Enda lama da agi, kitai nadai agi ninga pasal “jenayah,” “menua ti kamah,” “penyeranta” enggau “perang.” Kemaya semua utai tu deka nyadi? Kemaya Perintah Petara deka berengkah merintah dunya? Baka ni Perintah Petara mutarka penanggul? Baka ni nuan ulih ngasaika berekat ke disemayaka? Aram kitai mansik.