Kati nuan pechaya, mensia ulih mutarka semua penanggul ke ngasuh kitai berasai takut sereta irau pasal jemah ila? Kitai patut nemu pun penanggul, ngambika kitai ulih mutarka nya.

Perundingka chunto tu: Seiku pesakit ke benama Tom udah nadai. Nama kebuah iya tau mati? Seiku lutur ke ngubat Tom sebedau iya mati nulis, “Lebuh tanda penyakit iya berengkah pansut, nadai orang teperunding deka mansik pasal penyakit nya.” Reti iya, lutur ke sebedau tu semina meri Tom ubat kena ngurangka pemedis iya.

Kati mensia mega ngena chara ti sama maya mutarka penanggul ba dunya? Chunto iya, ngambi ulih ngurangka kes jenayah, perintah netapka undang-undang, masang CCTV, sereta nambahka penyampau pegawai polis. Taja tu chara ti manah, tang pun penanggul nya tetap enda ulih diputarka. Tu ketegal ulah mensia bisi kaul enggau sifat, asai ati, sereta pengingin sida.

Daniel, diau ba siti menua Amerika Selatan alai ekonomi nya majak jai. Ku iya madah, “Suba, kami enda ibuh takutka perumpak. Tang diatu, pasar tauka kampung nadai agi pengelikun. Maya penanggul ekonomi nyadi, kitai ulih meda ulah seseiku orang ke bendar. Sida amu sereta enda bebasaka nyawa, tauka reta orang bukai.

Seiku lelaki ari Timur Tengah udah ngerarika diri ari pemerinsa ke nyadi ba menua iya, lalu udah nya belajarka Bup Kudus. Ku iya madah, “Mayuh ari nembiak lelaki ari kampung aku diperansang diri sebilik, tuai pengarap, sereta ahli politik ngambika enggau orang beperang lalu nyadi terabai menua. Pia mega, nembiak lelaki ari piak munsuh mega diberi jaku peransang ti sama! Semua utai tu ngasuh aku sedar, enti kitai pechayaka mensia kitai deka asa ati.”

Bup Kudus nerangka:

• “Kenyau ari sida agi biak, runding sida endang jai.”—Pemungkal 8:21.

• “Sapa nemu ati mensia? Nadai utai ti nemu agi ngakal ari ati mensia.”—Jeremiah 17:9.

• “Laban ari ati pansut runding ti jai, munuh orang, butang, bambai, ngenchuri, besaksi bula, enggau bejakuka orang.”—Matthew 15:19.

Mensia enda ulih muai ulah ti jai ke udah lama dalam sida iya empu. Taja pan menua kitai bisi mayuh penerang, sereta perengka elektronik ti majak canggih, tang ulah mensia ti jai tetap majak balat, baka ke disebut ba artikel sebedau tu. (2 Timoti 3:1-5) Nama kebuah kitai enda ulih nyadika dunya tu alai ti likun sereta selamat? Kati juluk ati tu kelalu tinggi dijapai kitai? Kati kitai gerenti enda ulih ngereja tu?

Semaka jaku, taja pan kitai ulih muai ulah mensia ti jai, dunya tu tetap enda ulih likun sereta selamat. Nama kebuah? Laban penau kitai bisi tatak.

Tu ketegal, “nadai siku kami bisi kuasa ngatur pengidup diri.” (Jeremiah 10:23) Amat, kitai enda  digaga merintah diri empu. Baka kitai ke enda digaga idup ba dalam ai tauka ba langit luar, baka nya mega kitai enda digaga nguasa orang bukai.

Perundingka: Suah iya, kati mensia rindu orang bukai madahka sida chara pengidup tauka prinsip moral ke patut dititihka sida? Kati mensia rindu orang bukai ngajar sida pasal runding ti betul bekaul enggau bebuaika anak, seks, tauka chara disiplin anak? Selalu iya, topik ke baka tu ulih ngasuh laya nyadi lalu bepechah-belah. Nyadi taja pan tusah diterima, tang utai ti dipadah ba Bup Kudus endang amat. Kitai enda ulih sereta nadai hak merintah mensia bukai. Enti pia, sapa ke ulih nulung kitai?

Saut ke tanya tu iya nya, Penempa kitai. Sekeda orang engka ngumbai, Petara enda ingatka kitai. Tang nya enda amat. Nengah lalau ti manah ke bisi dalam Bup Kudus, nunjukka Iya ibuhka kitai. Enti kitai bisi penemu pasal Bup Kudus, kitai nemu tatak diri empu sereta nemu kebuah mensia napi mayuh pemerinsa. Kitai mega deka meda kebuah seiku pakar falsafah Jerman nulis, “Mensia enggau pemerintah enda kala belajar ari sejarah. Sida mega enda kala pedulika utai ti patut dipelajarka sida.”

Jesus kala madah, “Penemu-dalam nyata dipeda ari asil iya.” (Luke 7:35, NWT) Siti ari lalau Bup Kudus ti manah bisi ba Isaiah 2:22, “Anang agi ngarapka mensia.” Lalau tu ulih ngelindung kitai ari ngarapka utai ti enda ulih dijapai. Kenneth diau ba bandar Amerika Utara ke penuh enggau pengganas. Ku iya madah: “Semua orang ba politik besemaya deka mutarka penanggul, tang suah iya sida enda mujur. Tu ngingatka aku, lalau Bup Kudus endang amat manah.”

Daniel, ke disebut tadi nulis: “Ninting hari aku majak andal, mensia enda ulih merintah enggau manah. . . . Duit simpan ba bank tauka duit pinchin enda nyamin pengidup ti lantang. Mayuh orang balat asa ati laban ngarapka utai tu.”

Bup Kudus ukai semina ngelindung kitai ari pengadang ke enda ulih dijapai, tang iya meri kitai pengadang ke ulih nyadi, baka ke deka dipeda kitai legi.