“Anang irau pasal pagila, laban pagila bisi pengirau bukai.”—MATTHEW 6:34.

Reti iya: Pengirau pasal utai ba sehari-hari nya biasa ba pengidup. Tang anang meh nambahka pengirau ke seharitu enggau berundingka pengirau ke pagila. Uji meh idup sehari ngagai sehari.

• Stress ulih ngujungka pengirau. Nya alai, uji meh dua iti chara tu: Kesatu, kingatka, semua kitai enda ulih rari ari stress. Enti nuan majak irau pasal utai ke enda ulih diseliahka, stress nuan majak nambah. Kedua, kitai patut ingat, kesuah iya utai ke ngasuh kitai irau enda nyadi baka ke disangka kitai.

“Penemu-dalam ke datai ari serega . . . bisi runding ti masuk akal.”—JAMES 3:17.

Reti iya: Anang ngarapka semua utai sempurna. Anang ngarapka diri tauka orang bukai sempurna.

• Baruh ati, bisi runding ti masuk akal, sereta nemu tatak diri enggau orang bukai. Enti nuan ngereja tu, nuan ulih ngurangka stress, sereta bulih asil ti manah. Lebuh bisi penanggul nyadi anang kelalu serius. Ketawa ulih ngurangka stress sereta ngasuh mood nuan nyadi manah agi.

“Orang ke enda bemunyi nya orang ke bepenemu-dalam.”—JAKU-DALAM 17:27.

Reti iya: Emosi ti negatif ulih ngachau runding, nya kebuah kitai patut tenang.

• Kelala utai ke ngasuh nuan stress, lalu peratika nama reaksi nuan lebuh napi nya. Chunto iya, lebuh nuan stress tuliska runding, asai ati enggau perangai nuan. Enggau chara tu, nuan nemu nama reaksi nuan lebuh nuan stress, lalu ulih napi nya enggau manah agi ba maya bukai. Pia mega, pikirka chara ke ulih nulung nuan muai utai ke ngasuh nuan stress. Enti nuan enda ulih muai utai ke ngasuh nuan stress, giga meh chara ke ulih ngurangka kesan nya. Chunto iya, gaga meh jadual ngambika nuan ulih ngatur masa lalu ngaga pengawa nuan enggau manah agi.

• Ubah meh chara nuan meda sesiti utai. Ukai reti iya, utai ke ngasuh nuan stress mega ngasuh orang bukai stress. Tu bepanggai ngagai chara nuan meda sesiti utai. Peratika tiga iti chara tu:

  1. Anang jampat ngumbai orang bukai bisi tuju ti jai. Sema ke jaku, enti bisi siku orang mutung barisan nuan, lalu enggau jampat nuan nyimpulka iya sengaja ngereja nya, nuan tentu ringat. Ari ke baka nya, enda ke manah agi enti nuan ngembuan runding ti manah pasal orang nya. Runding nuan nya engka betul agi!

  2. Ngembuan runding ti positif. Enti nuan patut nganti lama ba klinik tauka ba padang bilun, kena meh peluang nya macha sesiti utai tauka ngaga pengawa ti meri penguntung.

  3. Berunding enggau dalam. Tanya diri empu, ‘Kati penanggul tu agi ngachau aku pagila tauka minggu dudi?’ Bidaka entara penanggul ti mit enggau penanggul ti besai.

“Awakka semua utai dipejalaika enggau manah sereta teratur.”—1 KORINT 14:40.

Reti iya: Naka ulih, tentuka pengidup nuan ninting hari teratur.

• Kitai rinduka pengidup ti teratur, tang ukai ga kelalu terit. Tang bisi siti utai ke ngasuh pengidup kitai charut sereta stress iya nya, ulah ti rindu nangguh pengawa. Ulah tu ulih ngasuh kereja kitai betimbun. Nuan ulih nguji dua iti chara tu:

  1. Sediaka jadual ti ulih dititihka, lalu titihka meh jadual nya.

  2. Kelala lalu ngemetulka ulah ti rindu nangguh pengawa.

“Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.”—BUP PENGAJAR 4:6.

Reti iya: Orang ke gila kereja, engka enda bulih penguntung ari pengawa sida ke “seruran bebendar gawa.” Sida engka nadai awak tauka pengering ngasaika asil kereja diri empu.

• Ngembuan runding ti seimbang ngagai kereja sereta duit. Ngembuan mayuh duit ukai reti iya deka ngembuan mayuh agi pengelantang sereta ngurangka stress. Iya ke amat, munyi ku Bup Pengajar 5:12 madahka, “Tang orang ke kaya sigi amat mayuh reta, datai ke sida nyau enda ulih tinduk laban sida irau ati.” Nya alai, anang meh ngena duit lebih ari ke dikemisi nuan.

• Giga awak alai relax. Nuan ulih ngurangka stress enti nuan ngaga pengawa ke dikerinduka nuan. Taja pia, ba sekeda pemerindang, chunto iya meda TV, ukai chara ti amat bekesan alai relax.

• Anang nejuka teknologi nyadi utama ba pengidup nuan. Seliahka diri ari selalu meda email, mesej tauka media sosial. Enti nya enda patut, anang meh macha email kereja pengudah abis jam kereja.

“Enti orang ngelatih tubuh, nya deka mai mimit penguntung ngagai iya.”—1 TIMOTI 4:8.

Reti iya: Sesais enggau tetap ulih ngemanahka pengerai.

• Kemansangka tebiat ti manah ke pengerai. Pengawa ba jasmani ulih ngemanahka mood nuan, lalu ngasuh nuan senang agi napi stress. Empa meh pemakai ti manah ke pengerai, lalu anang enda ingat makai. Tentuka nuan bisi chukup belelak.

• Seliahka diri ari “chara mutar” ti ulih ngemediska diri empu. Chunto iya nginsap, salah guna dadah tauka balat ngirup alkohol. Ba timpuh ti panjai, “chara mutar” tu ulih ngerusak pengerai nuan, masau duit nuan indah ngasuh nuan stress agi.

• Enti nuan kelalu balat stress, betemu meh enggau lutur. Kitai enda patut malu minta tulung ari bala lutur ba senentang tu.

“Nemu ni bagi utai ke beguna agi.”—PILIPI 1:10.

Reti iya: Berunding enggau bejimat, ni bagi utai ke penting agi ba nuan.

• Gaga meh lis pengawa nuan nitihka ripih ti penting. Enggau chara tu, nuan ulih fokus ngagai pengawa ke penting agi, lalu nemu ni bagi pengawa ke ulih diberi ngagai orang bukai, pengawa ke ulih dikereja legi tauka pengawa ke enda ibuh dikereja.

• Dalam timpuh seminggu, tuliska chara nuan ngena awak. Udah nya, pikirka chara ngena awak nya enggau manah agi. Enti nuan nemu agi ngena awak enggau chara ti manah, stress nuan ulih dikurangka.

• Gaga meh jadual alai nuan belelak. Indah, taja nuan belelak sekejap aja, tu ulih ngasuh nuan berasai nyamai lalu ngurangka stress.

“Pengirau ati nuan ulih muai pengelantang, tang jaku ti siru deka ngelantangka ati nuan.”—JAKU-DALAM 12:25.

Reti iya: Jaku ti nelap sereta meransang ulih ngasuh nuan berasai nyamai.

• Berandau enggau orang ke ulih dipechayaka nuan. Iya engka ulih nulung nuan meda situasi nya enggau chara ti bebida, lalu engka ulih meri nuan penemu ke manah ti enda kala diperundingka nuan. Pengudah nuan mansutka asai ati, nuan deka berasai nyamai agi.

• Pinta meh tulung. Nuan ulih nyerahka tauka magi pengawa enggau orang bukai.

• Enti orang ke sama enggau nuan gawa ngasuh nuan tetekan, uji meh ngemanahka agi situasi nya. Chunto iya, enggau chara ti nelap sereta bejimat, padahka meh asai ati nuan pasal utai ke disebut enggau digaga iya ngagai nuan. (Jaku-Dalam 17:27) Enti chara tu enda mujur, uji kurangka agi awak nuan begulai enggau iya.

“Gaga ati meh sida ke nemu diri begunaka iring ari Petara.”—MATTHEW 5:3.

Reti iya: Ketegal kitai mensia, kitai ukai semina begunaka pemakai, gari sereta endur diau. Ngambika ulih lantang ati, kitai patut nemu nama utai ke diguna kitai ba pengarap lalu bebendar ngulihka nya.

• Sampi siti ari tulung ti amat penting. Petara minta nuan ‘muai semua pengirau nuan ngagai Petara laban Iya ibuhka nuan.’ (1 Peter 5:7) Lebuh kitai besampi lalu berundingka utai ti manah, kitai ulih ngasaika ati ti tenang.—Pilipi 4:6, 7.

• Bacha meh utai ke ngasuh nuan semak ngagai Petara. Prinsip ke dikerandauka ba majalah tu diambi ari Bup Kudus, iya nya siti bup ke ulih meri kitai utai ke diguna ba pengarap. Tu ngasuh kitai ‘bepenemu-dalam enggau dalam agi berunding.’ (Jaku-Dalam 3:21) Nya alai, jadika meh macha Bup Kudus nya siti juluk ati. Nuan ulih berengkah macha bup Jaku-Dalam.