“Laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. Laban nadai orang kala begedika tubuh diri, tang iya nupi sereta bejimat ngintu tubuh nya.”​—EPESUS 5:28, 29.

Laki kepala ba diri sebilik. (Epesus 5:23) Pia mega, laki ti manah enda kasar tauka mejal bini nitihka chara iya. Bini berega ba mata laki, lalu laki deka nyaga utai ke diguna bini iya, enda ngira ba fisikal tauka emosi. Laki mega bebendar deka ngagaka ati bini, ukai semina mayuh utai dipinta. (Pilipi 2:4) Iya seruran berandau engau bini sereta ningaka bini lebuh iya bejaku. Laki enda patut “kasar” enggau bini iya, enda ngira ba fisikal tauka emosi.—Kolosi 3:19.

“Bini patut masa laki.”​—EPESUS 5:33.

Lebuh bini bebasaka laki, sereta nyukung pemutus laki iya, iya ngemansangka pemaik ba diri sebilik. Lebuh laki ngaga penyalah, bini enda ngemaruhka iya tang tetap ngayanka penelap sereta basa. (1 Peter 3:4) Lebuh iya ngasaika bisi utai ke patut dikerandauka, iya ngiga awak ti chun, lalu bejaku enggau basa ngagai laki.—Pengajar 3:7.

“Lelaki . . . begulai enggau bini iya, lalu seduai iya nyadi siku.”​—PEMUNGKAL 2:24.

Lebuh lelaki enggau indu jadi, seduai iya nyadi seiku, tauka rapat. Nyadi, laki-bini patut suah agi berandau, mansutka asai ati sereta ngereja utai ti manah ngagai pangan diri. Seduai iya patut tetap ati ngagai pangan diri lalu nadai ati deka ngayahka pangan diri. Pengawa butang amat ngemediska. Tu ulih ngasaka ati lalu mutuska kaul diri sebilik.—Hebrew 13:4.

“Ajar anak mit jalai idup, nya baru sida deka ingatka ajar nya seumur idup.”​—JAKU DALAM 22:6.

Ngelatih anak siti tanggungjawap ke diberi Petara ngagai apai indai. Tu nyengkaum ngayanka ulah ti manah ke ulih diteladan sida. (Ulang Adat 6:6, 7) Munyi ku jaku orang, enti anak nuan kelalu manchal, anang meh jampat meletup. Apai indai patut “jampat mending, lubah mansutka jaku, lubah ringat.” (James 1:19) Enti apai indai ngasaika diri patut nganu anak, sida patut ngereja nya enggau chara pengerindu, ukai ngereja nya maya sida benung ringat.

“Kita ke anak, ngasika apai indai kita . . . ‘Bebasaka apai enggau indai.’”​—EPESUS 6:1, 2.

Anak patut ngasika apai indai lalu bebasaka sida. Lebuh anak ngayanka basa ngagai apai indai, sida meri pengaga ati ba diri sebilik, lalu mai pemaik sereta penyerakup. Indah anak ke udah tuai, agi bebasaka apai indai lalu nentuka apai indai sida dijaga. Tu nyengkaum nulung apai indai ngereja sekeda pengawa ke diguna sida, tauka enti nya ulih ba nuan, kitai mega ulih nulung apai indai ba mata duit.—1 Timoti 5:3, 4.