“Ampun pangan diri enti kita bisi enda nyamai ati ngagai pangan diri.”​—KOLOSI 3:13.

Semua kitai ngaga penyalah. Kitai ulih ngemediska ati orang, tauka orang ulih ngemediska ati kitai. Enda ngira nama penyadi iya, semua kitai patut ngampun sereta diampunka. Lebuh kitai ngampun, kitai enda patut nyimpan dendam ngagai orang ke ngemediska ati kitai. Kitai enggai “malas penyai ngena penyai,” sereta enda patut ingat, tauka ngingatka penyalah orang bukai. (Rome 12:17) Tang baka ni enti ati kitai balat amat telih sereta enggai ngetu berundingka utai ke nyadi? Nyadi kitai patut berandau enggau orang nya enggau chara ti bebasa sereta enda ditemu orang. Tuju kitai ka ngemansangka pemaik, ukai ka meda sapa ke betul tauka sapa ke salah.—Rome 12:18.

“Enggau ati ti baruh, seruran ngumbai orang bukai pama agi ari kita.”​—PILIPI 2:3.

Enti kitai orang ke baruh ati sereta bebasaka orang bukai, orang pan rindu begulai enggau kitai. Orang ulih ngasaika pemanah ati lalu ulih meda kitai berundingka orang bukai. Pia mega, kitai enda sengaja ngemediska ati sida. Enti kitai ngumbai  diri pama agi ari orang bukai, suah iya kitai ke deka amat bekelikuh enggau orang bukai, lalu ngasuh orang enda nyamai asai. Orang tusah deka semak kitai, lalu kitai engka nadai kaban.

‘Petara endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.’​—SURAT KEREJA RASUL 10:34, 35.

Petara enda kala milih orang ketegal menua tauka bansa, bansa jaku, tikas sosial tauka kala kulit. “Iya udah ngaga semua bansa ari siku orang.” (Surat Kereja Rasul 17:26) Nyadi reti iya, semua mensia nya semadi. Lebuh kitai enda bepilih mata ngagai semua orang, kitai ngasuh sida gaga ati. Kitai empu mega lebih agi gaga ati lalu kitai ngelantangka Petara.

“Rasukka . . . penelap.”​—KOLOSI 3:12.

Enti kitai nelap, kitai ngasuh orang bukai berasai nyamai. Sida berasai nyamai agi berandau enggau kitai, indah deka ngelalau kitai, laban sida nemu kitai enda jampat ringat. Lebuh bisi seseiku orang ringat ngagai kitai, tang ketegal penelap kitai, sida ulih tendur ari pengeringat. “Saut ti nelap ngasuh orang badu agi ringat, tang jaku ti kasar ngasuh orang ringat,” ku Jaku Dalam 15:1.

“Beberekat agi orang ke meri, ari orang ke nerima.”​—SURAT KEREJA RASUL 20:35.

Kemayaharitu, mayuh orang amu sereta berundingka diri empu. Tang pengaga ati ti bendar nya enti kitai ngayanka pengerah jari. (Luke 6:38) Orang ke gerah jari ulih gaga ati laban sida sayau agi ke mensia ari pemisi. Pengerindu tu mega meransang sida beterima kasih lebuh orang bukai ngayanka pengerah jari. (Kolosi 3:15) Tanya diri empu, ‘Aku ka agi begulai enggau orang ke luke sereta enda nemu beterima kasih, tauka orang ke gerah jari sereta nemu beterima kasih?’ Reti iya, nyadi meh orang baka ke dikedekaka nuan.—Matthew 7:12.