Ati ti irau ketegal penanggul ba dunya ulih ngachau pengerai ba fizikal sereta emosi. Mayuh orang ngasaika, penanggul ba dunya enda nemu ngetu. Baka ni runding tu ulih ngachau sida?

• Bisi orang enggai berunding pasal utai ke jemah ila.

• Bisi ke salah guna dadah tauka makai dadah ngambi enda ibuh berundingka penanggul sida.

• Bisi sekeda indah berunding deka mati aja. Sida engka ngumbai, “Nama guna terus idup?”

• Sekeda penanggul ke ditapi nuan semina sementara aja lalu ulih nyadi manah agi.

• Taja pan situasi nuan enda berubah, nuan agi bisi sekeda chara kena napi nya.

• Bup Kudus madahka kitai semaya ti bendar, iya nya chara mutarka penanggul belama iya.

Ajar Bup Kudus: “Nya alai, anang irauka pasal pagila, laban pagila chukup pengirau ke diri empu. Penusah ke sehari tu chukup ke sehari tu.”—Matthew 6:34.

Anang kelalu irauka utai ti dudi hari, nyentukka nuan enda ulih bejalaika tanggungjawap ninting hari. Tapi meh penguji ba pengidup ari sehari ke sehari.

Pengirau ke pekara ti negatif engka semina nambahka stres nuan, lalu ngasuh nuan lemi nganti utai ke dianti nuan.

Seiku penulis masmur ba jeman kelia kala nyebut tu dalam sampi, “Leka jaku Nuan nyadika lampu tenggau aku nyadika tenggau jalai aku.” (Masmur 119:105) Aram kitai beratika, baka ni Bup Kudus ulih dikumbai lampu tenggau kitai:

Ba malam ti pentang, lampu tenggau ulih nenggau jalai kitai. Sama mega, Bup Kudus ngembuan lalau ti ulih ngiring kitai ngaga pemutus ti betul.

Lampu ulih nenggau jalai kitai, ngambika kitai ulih meda jauh ke mua. Sama mega, Bup Kudus nulung kitai meda, kitai benung nganti utai ti manah jemah ila.