Penanggul tauka bencana ulih ngachau pengerai kitai enggau mayuh macham chara. Chunto iya:

• Ngasuh stres. Stres ba timpuh ti panjai ulih ngasuh orang senang agi sakit.

• Sepital deka penuh enggau orang ke sakit nyentukka enda ulih ngubat enggau manah. Bekal ubat mega deka kurang.

• Penanggul ba ekonomi. Asil iya, mayuh orang enda ulih meli barang ke diguna ninting hari baka pemakai ti manah ke pengerai tauka ubat.

• Penyakit ti balat sereta tekanan mental ngasuh nuan enda ulih ngaga pemutus enggau manah. Asil iya, nuan engka enda beberatka pengerai diri lalu ngasuh penyakit nuan balat agi.

• Penyakit ke enda diubat engka ulih nyadi balat agi, indah ulih ngachau nyawa nuan.

• Enti pengerai nuan manah, nuan ulih ngaga pemutus ti betul lebuh napi penanggul.

• Enda ngira nuan kaya tauka seranta, nuan ulih nyaga pengerai diri.

Enggau naka ulih, orang ke pintar sereta nemu berunding deka bejimat kena nyeliahka bahaya. Kitai mega ulih ngereja utai ti sama kena nyaga pengerai diri. Kesuah iya, enti kitai nyaga pemeresi, kitai ulih ngurangka risiko kena rampit tauka pemalat kesan penyakit enti dirampit. Ingat meh, manah agi nyeliah ari ke ngubat.

“Enggau nyaga pemeresi diri sereta endur kami diau, kami ulih ngelimat duit kena betemu enggau lutur tauka meli ubat.”—Andreas. a