Sebagi ari bumi kitai dipenuhka enggau ai. Tang, nitihka Pertubuhan Meteorologi Dunia, “semina 0.5 peratus ari ai ba bumi nya, ai tawar ke ulih dikena.” Taja pan penyampau tu berupai mimit aja tang sepatut iya, nya udah chukup ke diguna semua utai idup ba bumi. Sinu amat, mayuh ari ai nya udah kamah tauka enda ulih diguna laban iklim balat berubah sereta mayuh orang begunaka ai. Nitihka pakar, dalam timpuh 30 taun, lima biliun iku orang engka enda bulih ai tawar ti chukup.

Bumi bisi proses semula jadi ngambika ulih terus nyediaka ai tawar enggau chukup. Kelimpah ari nya, tanah, utai idup dalam ai, sereta mata panas bekerejasama kena meresi ai. Peratika sekeda chunto ke nunjukka bumi endang digaga ngambika ulih terus nyediaka ai tawar.

• Tanah ulih muai mayuh utai kamah ke bisi dalam ai. Sekeda utai tumbuh ba endur bepaya mega ulih muai nitrogen, fosforus, enggau rachun ke ulih ngamahka ai.

• Bala pakar sains udah tetemuka sekeda proses fizikal enggau biologi ke ulih meresi ai ti ngembuan sisa-sisa semula jadi ti kamah. Sisa-sisa tu deka lela tauka cair ba ai ke benung mengalir, udah nya dipechahka mikroorganisma.

• Kerang enggau kupang ai tawar ulih napis bahan kimia ke bahaya ti bisi dalam ai dalam beberapa hari aja. Tu engka bekesan agi ari loji ke dikena meresi ai.

• Bumi ngena kitaran hidrologi sereta proses semula jadi ke bukai kena nentuka ai ba bumi enda majak bekurang tauka tersejat niki ke angkasa lepas.

Bala pakar meransang kitai ngena ai enggau chara ti betul. Ngambika sumber ai ulih kurang agi kamah, sida meransang kitai ngambika ngaduka kerita ke bocor minyak, anang muai ubat ke dalam jamban, sereta anang muai bahan toksik ke dalam parit.

Bala jurutera udah nyediaka teknologi ti canggih iya nya proses desalinasi (proses mansutka garam ari ai masin). Sida ngarapka chara tu ulih nambahka agi sumbar ai tawar.

Tang nya agi enda chukup. Teknologi desalinasi tusah dikena ba projek ti besai, laban iya begunaka mayuh tenaga eletrik sereta ungkus ti tinggi. Kena taun 2021, siti riput ari Pertubuhan Bangsa-Bangsa Bersatu madahka, pengawa tu patut digaga enggau belipat kali ganda agi ba serata dunya.

‘[Petara] ngambi ai ari dalam tanah lalu ngaga ai nya nyadi leka ujan. Iya ngasuh ujan labuh ari mua hari ti bekeberai ninggang semua mensia.’​—Jop 36:26-28.

Petara udah ngaga kitaran semula jadi kena nyaga ai ba bumi.​—Pengajar 1:7.

Pikirka: Enti Petara udah ngaga beberapa iti proses kena meresi ai ba bumi, Iya tentu ulih sereta keran mutarka penanggul ai ke kamah ketegal mensia. Peda begian artikel, “Petara Besemaya Bumi Kitai deka Diselamatka,” ba lambar 15.