KATI BUMI KITAI ULIH DISELAMATKA?
Tasik
TASIK ukai semina ngasilka mayuh pemakai ke kitai, tang pia mega ngembuan mayuh utai ke diguna kena ngaga mayuh bengkah ubat. Lebih ari setengah oksigen ba bumi datai ari tasik, lalu tasik mega ulih nyedut gas karbon ke bahaya. Nambahka nya, tasik pan ulih ngasuh suhu bumi seimbang.
Tasik Kitai Majak Dikachau
Ketegal suhu dunya berubah, tu ngachau utai idup dalam tasik baka terumbu karang, kerang, enggau utai idup dalam tasik ke bukai. Dalam tasik, abis nadai 25 peratus utai idup dalam nya bepanggai ngagai terumbu karang. Tang bala saintis nyangka, nyauka semua terumbu karang dalam tasik engka ulih lenyau dalam timpuh 30 taun.
Nitihka penyampau ke dijangka bala pakar, nyauka 90 peratus burung laut nelan laluh utai ke datai ari bahan plastik. Bejuta iku utai idup ba tasik mati ninting taun ketegal laluh-laluh utai ke datai ari bahan plastik.
Kena taun 2022, Setiausaha Agung PBB, António Guterres madahka, “Kitai enda nyaga tasik enggau manah. Diatu, kitai benung napi penanggul ke ulih dikumbai ‘Tasik dalam Bahaya.’”
Bumi—Digaga ngambika Tasik Mengkang Beresi
Tasik enggau utai idup ba tasik endang digaga ngambika mengkang beresi sereta gerai enti nadai utai ngachau. Bup Regeneration: Ending the Climate Crisis in One Generation nerangka, enti tasik enda dikamahka industri mensia, “tasik ulih meresi sereta nyumanka diri empu enggau manah.” Peratika sekeda chunto tu:
-
Organisma ti amat mit ke dikumbai fitoplankton ulih nyirut sereta nyimpan karbon dioksida, iya nya gas ke dijangka punca utama ke ulih ngasuh suhu bumi amat angat. Karbon dioksida ke disirut fitoplankton nyauka sama enggau karbon dioksida ke disirut pun kayu, rumput, enggau tumbuhan darat ke bukai.
-
Mikrob deka makai laluh utai enggau bangkai ikan ngambika tasik enda kamah. Udah nya, mikrob tu ulih nyadi pemakai ke utai idup ba tasik ke bukai. Nitihka Smithsonian Institution Ocean Portal, kitaran tu ngasuh “tasik mengkang beresi sereta chiru.”
-
Ai tasik ke bisi asid amat bahaya ke terumbu karang, kerang enggau utai idup ba tasik ke bukai. Tang sistem pencernaan mayuh utai idup ba tasik ulih ngubah ai tasik ke asid nyadi alkali.
Mensia Naka Ulih Nyaga Tasik
Enti kitai ngena beg sereta botol ai ke ulih dikena lama, kitai ulih ngurangka sampah ari bahan plastik dibuai ke dalam tasik
Tasik enda ibuh diperesi enti sampah enda dibuai kia. Bala pakar meransang orang mayuh ngena beg, perengka tauka sebarang utai ke ulih dikena lama lebuh nyimpan barang tauka pemakai, ari ke ngena utai ke digaga ari plastik ti semina dikena sekali aja lalu dibuai.
Tang ukai naka nya aja usaha ke patut digaga mensia. Baru-baru tu, dalam timpuh setaun, siti pertubuhan alam sekitar udah ngumpul 9,200 tan sampah ari pantai ba 112 iti menua. Penyampau nya amat-amat mimit ari penyampau sampah ke dibuai ngagai tasik ninting taun.
National Geographic ngeriput, “gaya tasik diatu majak balat enggau asid, lalu nya enda ulih diaduka. Mensia kelalu balat ngena bahan bakar fosil nyentukka utai idup ba tasik enda ulih meresi tasik.”
Nama Kebuah Bumi Agi Bisi Harapan—Bup Kudus madahka:
“Dunya nyau penuh laban utai ti idup ti digaga Nuan. Tasik ti luas sereta besai pen bisi, endur alai utai ti idup diau, ti besai enggau ti mit, ti enda ulih diitung.”—Masmur 104:24, 25.
Petara ngaga tasik sereta ngasuh tasik bisi penau meresi diri. Pikirka: Enti Petara amat nemu pasal tasik sereta semua utai idup dalam nya, enda ke Iya mega ulih ngaduka tasik kitai ti kamah tu? Peratika begian artikel, “Petara Besemaya Bumi Kitai deka Diselamatka,” ba lambar 15.
