Nama Kebuah Orang Majak Enda Bebasaka Diri Sebilik?
KEBUAH NUAN PATUT BEBASAKA DIRI SEBILIK
Lebuh diri sebilik ngayanka basa ngagai pangan diri, nya ulih mai pengelantang ngagai ruang bilik sida.
-
Bup The Seven Principles for Making Marriage Work madahka, lebuh kaling pengidup ngayanka basa, sida nunjukka pengerindu ngagai pangan diri “ninting hari ukai semina ba pekara ti besai aja tang pia mega ba pekara ti mit.”
-
Nitihka pansik, bala anak ke belajar bebasaka orang bukai ulih berasai lebih agi yakin diri, ngembuan kaul ti manah enggau apai indai, sereta kurang agi penanggul ba mental enggau emosi.
UTAI KE ULIH DIGAGA NUAN
Bekerejasama ngaga pelan begulai enggau diri sebilik nuan. Keterubah, tentuka semua orang dalam diri sebilik faham reti ngayanka “basa.” Kedua, tuliska utai ke deka nuan kereja diri sebilik sereta utai ke enda patut dikereja sida. Ketiga, kerandauka pelan ke udah digaga kita sebilik, ngambika semua orang nemu utai ke patut digaga sida kena ngayanka basa.
Nyadi teladan. Kati nuan nyalahka diri sebilik ketegal penyalah sida, ngeleseka penemu sida, tauka enda peduli tauka nyelepak lebuh sida benung bejaku ngagai nuan?
Tip: Ayanka basa ngagai kaling pengidup sereta bala anak enda ngira sekalika nuan ngumbai sida layak tauka enda layak nerima basa.
Tetap bebasa taja pan enda setuju. Lebuh mantaika asai ati, seliahka jaku ke madah, “nuan seruran” tauka “nuan nadai kala.” Jaku ke baka tu ulih ngemediska ati sereta ngasuh diri sebilik nuan enda nyamai ati lalu ngujungka laya tu nyadi balat agi.
CHARA SAKSI-SAKSI JEHOVAH NGAYANKA BASA NGAGAI DIRI SEBILIK
Saksi-Saksi Jehovah meransang diri sebilik ngelayan pangan diri enggau basa. Pekara tu suah disebut dalam artikel, bup, brosur, enggau video ke dikeluarka kami. Semua utai tu ulih diambi enggau pechuma.
KE LAKI BINI: Siri artikel Tulung ke Diri Sebilik ulih nulung laki bini . . .
-
nyadi peninga ti manah
-
ngetuka ulah ke enggai bejaku enggau pangan diri
-
ngetuka laya
(Giga “Tulung ke Diri Sebilik” ba jw.org/iba)
KE APAI INDAI: Siri artikel Tulung ke Diri Sebilik ulih nulung apai indai ngelatih anak sida . . .
-
ngasi
-
nulung berintuka pengawa ba rumah
-
nyebut jaku “tulung” enggau “terima kasih”
(Giga “Ngemesaika Anak” enggau “Ngemesaika Bala Nembiak” ba jw.org/iba)
Peda mega appendiks, “Pertanyaan Orang Tua,” ba bup Pertanyaan Kaum Muda—Jawaban yang Praktis—Jilid 1, dalam jaku Indonesia. (Giga “Pertanyaan Orang Tua” ba jw.org/id)
KE BALA NEMBIAK: Begian Bala Nembiak ba jw.org/iba bisi artikel, video sereta keretas kereja ke ulih nulung sida ke biak . . .
-
begulai manah enggau apai indai sereta diri semadi
-
bejaku enggau bebasa ngagai apaí indai pasal atur ke udah ditetapka
-
ulih dipechayaka apaí indai
(Giga “Bala Nembiak” ba jw.org/iba)
Laman web jw.org nya nadai bebayar. Ba laman web tu mega, nuan enda ibuh subscribe tauka nyadi member, pia mega enda ibuh madahka penerang diri.
