Nama Kebuah Orang Majak Enda Bebasaka Nyawa?

TEBAH

KEBUAH NUAN PATUT BEBASAKA NYAWA

Lebuh nuan ngereja utai ke ulih ngachau pengerai diri empu tauka orang bukai, tu nunjukka nuan enda bebasaka nyawa diri empu tauka orang bukai.

Nginsap ukai semina ngasuh sesiku orang bulih penyakit kanser tang mega ngasuh tubuh sida tusah ngelaban penyakit nya. Kira-kira 90 peratus pesakit kanser paru-paru mati ketegal sida nginsap tauka ketegal sida dikelingi orang ke nginsap.
Ninting taun mayuh orang trauma ba emosi ketegal kes betimbak ba endur orang mayuh. Riput ari Stanford Universiti madahka, “Taja nadai utai ke nyadi secara fizikal ngagai sida ke mujur ngerarika diri ari kes betimbak tu [betimbak ba sekula], tang sida bisi penanggul ba mental enggau emosi ke ulih ngachau pengidup sida betaun-taun.”
Lebuh orang mabuk tauka orang ke makai dadah deriba, tu ulih mai penusah ngagai orang bukai ba jalai indah orang ke ba tisi jalai. Orang ke enda bebasaka nyawa ulih ngasuh orang ke enda besalah nyadi mansa.

UTAI KE ULIH DIGAGA NUAN

Jaga pengerai nuan. Nuan agi ulih berubah lalu muai tebiat ke enda manah baka nginsap, vaping, mabuk, tauka makai dadah. Tebiat ke baka tu ulih mai penusah ngagai pengidup nuan sereta enda bebasaka nyawa orang bukai ke ngelingi nuan, nyengkaum diri sebilik nuan.

“Aram meh kitai nuchi diri ari semua pekara ke ngamahka tubuh.”—2 Korint 7:1.

Jaga pengelikun. Tentuka rumah nuan dalam keadaan ti likun, ngambika penusah ke enda dijangka ulih diseliahka. Deriba enggau bejimat lalu tentuka kerita nuan selamat dikena. Anang nejuka orang bukai nekan nuan ngereja pengawa ke ulih ngujungka nuan balat bakal tauka mati.

“Lebuh kita ngaga rumah, kita patut masang pagar ngelingi perabung rumah nya, ngambika kita sebilik enda berutang darah enti bisi orang labuh ari endur nya.”—Ulang Adat 22:8. a

Manah enggau orang bukai. Enti kitai bebasaka nyawa, kitai manah enggau semua orang enda ngira bansa, asal menua, sekalika sida kaya tauka miskin, bepelajar tauka enda. Ulah ti bepilih mata enggau begedika pangan diri pun ulah ti ganas sereta perang ke nyadi ba serata dunya.

“Buai semua macham dendam, ati ti pedis, sereta ati ti ngeransi. Anang merak pangan diri. Buai mega jaku ti kasar sereta semua utai ti ngasuh pedis. Tang kita patut manah ati sereta siru enggau pangan diri.”—Epesus 4:31, 32.

CHARA SAKSI-SAKSI JEHOVAH NGAYANKA BASA NGAGAI NYAWA

Saksi-Saksi Jehovah ngajar orang bukai chara pengidup ti manah. Pengawa belajarka Bup Kudus udah nulung orang mujur muai tebiat ti enda manah sereta ulih ngemedis.

Kami nitihka standard pengelikun ti tinggi maya ba projek nirika bengunan. Bala sukarela ke nulung nirika endur kami begempuru sereta bengunan bukai ke nyukung pengawa ngajar Bup Kudus, udah dilatih ngambika nyeliahka diri ari bakal. Semua bengunan kami diperesa enggau tetap ngambika sida nitihka etika pengelikun ba menua nya.

Kami nulung sida ke kena bencana. Dalam 12 bulan baru-baru tu, kami udah nulung 200 iti kes bencana ti balat ke nyadi ba serata dunya, sereta udah ngena nyauka 12 juta dolar duit pemeri kena mantu sida ke ditinggang bencana.

Maya penyakit Ebola nyadi ba Afrika barat kena 2014 enggau ba Republik Demokratik Congo kena 2018, kami ngajar penduduk ba menua nya chara mutarka penyakit berampit ari ngelekai. Kami nganjung beberapa iku pengari meri cheramah ngagai sida pasal topik, “Obedience Saves Lives.” Kami nyediaka endur nuchi jari ba tiap iti pintu penama alai kami begempuru, lalu nekanka pemesai guna nuchi jari sereta chara-chara ti ngena ngambika nagang penyakit ari berampit.

Ba Sierra Leone, bisi jaku gerah nengah radio ke muji Saksi-Saksi Jehovah laban sida nulung bala Saksi, sereta orang ke ukai Saksi ba endur sida kena nyeliahka virus Ebola ari berampit.

Endur nuchi jari ba Palan Gempuru maya penyakit Ebola benung ngelekai di Liberia kena 2014

a Ba Timur Tengah kelia, atur ke bepenemu-dalam tu ngayanka diri ibuh pasal pengelikun diri sebilik enggau orang bukai.

PERATIKA!