Nama Kebuah Orang Majak Enda Bebasaka Pangan Diri?
KEBUAH NUAN PATUT BEBASAKA PANGAN DIRI
Enti kitai bebasaka orang bukai, kitai ulih nagang situasi ke enda manah ari nyadi balat agi.
-
Bup Kudus madah: “Saut ti nelap ngasuh orang badu agi ringat, tang jaku ti kasar ngasuh orang ringat.” (Jaku-Dalam 15:1) Baka minyak ke ngasuh api mau, jaku enggau ulah ti enda bebasa suah iya mai asil ti ngenusahka.
-
Jesus madah: “Utai ti disebut orang datai ari ati.” (Matthew 12:34) Jaku ti enda bebasa nunjukka asai ati kitai ti amat pasal sesiti bansa, adat, menua, tauka latar belakang ke bebida ari kitai.
Nitihka pansik baru-baru tu, lebih ari 32,000 iku orang ari 28 iti menua, bisi 65 peratus ari sida madahka, sida nadai kala meda pengawa ke enda bebasa ngemalat tu.
UTAI KE ULIH DIGAGA NUAN
Enda ngira nya ba sekula tauka ba endur gawa, bebasa meh ngagai orang bukai indah maya nuan enda sepenemu enggau sida. Giga meh utai ke ulih ngasuh nuan sepenemu enggau sida. Tu nulung nuan nyeliahka diri ari ngakim orang bukai.
Layan orang bukai baka nuan deka dilayan. Enti nuan manah enggau enda bechiping, sida mega deka ngelayan nuan enggau chara ti sama.
Ngampun. Pechaya meh, orang nya nadai ngembuan niat ati ti enda manah. Enggau nya, anang ngambi ati enggau jaku sereta ulah iya ke enda manah.
CHARA SAKSI-SAKSI JEHOVAH NGAYANKA BASA NGAGAI PANGAN DIRI
Ba endur sida diau enggau kereja, Saksi-Saksi Jehovah ngayanka basa ngagai orang bukai.
Kami bisi pengawa belajarka Bup Kudus enggau pechuma. Nya alai, kami ngelaluka semua orang belajarka Bup Kudus, tang kami enda mejal orang nitihka utai ke dipechaya tauka penemu kami. Kami nguji nitihka jaku ajar Bup Kudus lalu bekunsika pesan nya “enggau nelap sereta penuh enggau basa.”—1 Peter 3:15; 2 Timoti 2:24.
Kami enda bepilih mata lalu nerima penatai semua orang ke deka belajarka ajar Bup Kudus ngagai gempuru kami. Kami enggau naka ulih nerima semua orang enggau bebasa ke “semua macham orang.”—1 Peter 2:17.
Kami bebasaka piak ti bekuasa ba endur kami diau. (Rome 13:1) Kami ngasika undang-undang enggau mayar chukai. Taja pan kami enda masuk champur ba politik, tang kami bebasaka hak orang bukai ke ngaga pemutus sida empu bekaul enggau politik.
