Apai indai nyadi teladan ti manah nitihka utai ke disebut sida empu. Chunto iya, lebuh nuan enggai betemu enggau seseiku orang, lalu ku nuan nyebut, “Padahka iya aku nadai ba rumah.” Nya tentu tusah ba anak deka belajar pasal pengelurus.

“Enti apai indai enda nitihka ajar diri empu, bala anak mega tusah deka nitih. Anak baka kapas lalu deka nginsap semua utai ke disebut enggau digaga kitai. Sida deka ngumbai kitai enda ngereja utai ke disebut kitai. Nya sempama nebang pisang nebang lengki, ngerara orang ngerara diri.”—David.

PRINSIP BUP KUDUS: “Kita ngajar orang, enda nyagi orang ngenchuri, kati kita ngenchuri?”—Rome 2:21.

Anak mit enggau bala nembiak deka nitihka teladan apai indai sida, ukai bala ke serambau sida. Reti iya, nuan meh ke pemadu manah meri iring ti betul ngagai anak, tang nuan patut nitihka utai ke disebut.

“Kitai ulih ngulang sesiti utai beratus kali, tang bedau tentu anak kitai deka ninga. Taja pia, enti kitai enda nitihka prinsip ke diajar, anak kitai deka ngelaban. Sida beratika semua ulah kitai, indah maya kitai ngumbai sida enda meda.”—Nicole.

PRINSIP BUP KUDUS: “Tang penemu-dalam ti datai ari atas nya, . . . enda bepilih mata tauka pura-pura ngapa.”—James 3:17.

Peresa diri empu. Nama jenis pemerindang ke dipeda nuan? Baka ni ulah nuan ngagai bini enggau bala anak? Sapa bala kaban nuan? Kati nuan bisi berundingka orang bukai? Pandakka jaku, kati nuan deka bala anak nyadi baka nuan?

“Aku enggau laki aku enda ngasuh anak nitihka atur ke enda dititihka kami.”—Christine.

Minta ampun ke penyalah nuan empu. Anak nuan endang nemu, nuan enda sempurna. Nya alai, enggau ati ti deka, sebut meh “Minta ampun” ngagai kaling sereta anak nuan. Enggau chara tu, nuan ngajar bala anak ngembuan ulah ti lurus sereta baruh ati.

“Bala anak patut ninga kitai ngaku penyalah sereta minta ampun. Enti enda, sida deka belajar nutup penyalah diri empu aja.”—Robin.