BALA NEMBIAK
10: Ulih Dikeandalka
RETI IYA
Orang ke ulih dikeandalka, deka nitihka atur, enda bula ke semaya, sereta enda bula bejaku. Nya kebuah apai indai, kaban, sereta bos tauka tuke andalka sida.
NAMA KEBUAH TU PENTING
Kesuah iya, orang ke tau dikeandalka, bibas agi.
“Chara ti pemadu manah ngambika apai inda andal iya nya, tunjukka nuan nya orang ke nemu berunding sereta betanggungjawap, ukai semina lebuh nuan begulai enggau sida, tang mega maya sida nadai semak nuan.”—Sarahi.
PRINSIP BUP KUDUS: “Peresa diri empu, kena nentuka kita amat idup ngena pengarap tauka enda. Uji diri empu.”—2 Korint 13:5.
CHARA-CHARA
Enti nuan deka dikeandalka tauka ulih dikearapka baru, uji meh chara-chara tu:
Lurus. Siti kebuah orang enda pechayaka kitai, enti kitai selalu bula. Tang enti nuan lurus, kelebih agi maya nuan ngaga salah tauka ilap, orang deka pechaya agi ke nuan.
“Endang senang deka lurus enti nadai penanggul. Tang enti nuan lurus taja pan nuan engka malu, nuan ngasuh orang andal agi ke nuan.”—Caiman.
PRINSIP BUP KUDUS: “Kami . . . deka ngereja utai ti badas berari.”—Hebrew 13:18.
Nyadi orang ke ulih dikeandalka. Nitihka siti pansik ba Amerika Serikat, 78 peratus pakar sumber mensia madahka, ulah ke ulih dikeandalka nya siti ari tiga ulah ke pemadu diperatika lebuh kompeni ngambi pekereja. Enti nuan belajar diatu nyadi orang ke tau dikearapka, nuan deka ngetau asil iya lebuh nuan besai ila.
“Apai indai aku nemu, aku enda ibuh dikingatka mayuh kali lebuh ngereja pengawa ba rumah. Suah agi aku ngayanka ulah tu, pechaya agi sida ke aku.”—Sarah.
PRINSIP BUP KUDUS: “Aku nemu nuan deka ngereja lebih agi ari ti dipinta aku.”—Pilimon 21.
Sabar. Pemansang ba tubuh ulih dipeda, tang pemansang ba runding enggau emosi begunaka awak alai diperatika.
“Nuan enda ulih terus dipechaya apai indai enggau orang bukai ketegal siti pengawa aja. Sida deka belubah-lubah pechayaka nuan, enti nuan seruran betanggungjawap.”—Brandon.
PRINSIP BUP KUDUS: “Rasukka . . . ati ti liat.”—Kolosi 3:12.