1 Kati Pemerinsa Kitai Datai ari Petara?

TEBAH

Kebuah tu Penting

Mayuh orang enggai nyembah Petara, laban sida ngumbai pemerinsa nya datai ari Petara.

Pikirka

Enda ngira nya nyemetak tauka enda, mayuh pengarap ngajar pemerinsa kitai datai ari Petara. Ambika chunto, sekeda tuai pengarap madah:

Bencana alam nya ukum ari Petara.
Anak mit mati laban Petara begunaka mayuh melikat ba serega.
Petara nyukung sekeda piak ba perang—ti ngujungka mayuh pemerinsa.

Tang, kati ajar bala tuai pengarap nya betul? Kati ajar sida diterima Petara?

PENERANG KE BUKAI

Peda video Nama Kebuah Belajar Bup Kudus? ba jw.org/iba.

Saut ari Bup Kudus

Pemerinsa ukai datai ari Petara.

Pekara tu enda sejalai enggau pemanah Iya ke ditulis dalam Bup Kudus. Chunto iya:

‘Semua jalai Petara endang lurus magang. Iya ngereja utai ti ngena sereta lurus.’—ULANG ADAT 32:4.

‘Kati Petara ti Pemadu Bekuasa deka ngereja utai ti salah?’—JOP 34:10.

‘Petara ti Pemadu Bekuasa enda kala meri atur ti enda lurus.’—JOP 34:12.

Petara enda nerima pengarap ke ngajar utai ti salah pasal Iya.

Petara enda nerima pengarap ke ngumbai, Iya ke ngasuh kitai merinsa. Iya mega enda nerima pengarap ke besangkut-paut enggau perang sereta ganas.

“Bala sida nabi nya madahka utai ti bula dalam nama Aku. Aku nadai ngirumka sida, lalu Aku pen nadai mega meri atur ngagai sida, tauka bejaku ngagai sida. Genera ti dipadahka sida nya ukai datai ari Aku. Jaku tujum ti disebut sida nya nadai guna, semina jaku ti ditempaka sida ngapa.”—JEREMIAH 14:14.

Jesus ngutuk tuai pengarap ke pepura ngapa.

“Ukai semua orang ke ngangauka aku, ‘Tuan, Tuan,’ deka tama ngagai Perintah serega. Tang semina orang ke ngereja peneka Apai aku ti ba serega, ke deka tama. Ba hari nya, mayuh orang deka madah ngagai aku: ‘Tuan, Tuan, endaka kami udah benabi ngena nama nuan, muru melikat ti jai ngena nama nuan, lalu ngereja mayuh kereja ajih ngena nama nuan?’ Udah nya aku deka nyaut sida: ‘Aku enda ngelala kita! Rari ari aku, kita ke ngereja penyai!’”—MATTHEW 7:21-23.