Taja pia, sekeda orang ngasaika bala nembiak ke ngena mayuh awak ba perengka teknologi senang agi . . .

• gian ngena perengka elektronik.

• nyadi mansa buli siber.

• tepedaka pornografi, nemu ke sengaja tauka enda.

GIAN

Sekeda pengawa ba Internet, chunto iya online game, digaga ngambika orang jampat gian. Bup Reclaiming Conversation madahka, “Aplikasi ke dalam talipun endang digaga ngambika kitai nyinuk tauka syok meda talipun.” Mayuh agi awak ke dikena kitai meda iklan ba aplikasi, mayuh agi penguntung ke diulih kompeni iklan.

PIKIRKA: Kati anak nuan berasai tusah deka ngelengkaka perengka eletronik sida? Baka ni nuan ulih nulung sida ngena awak enggau manah agi?—EPESUS 5:15, 16.

BULI SIBER

Lebuh ngena Internet, sekeda orang nyadi kasar agi, enda mereti, sereta enda berundingka orang bukai. Orang ke baka tu engka nyadi pembuli siber.

Sekeda orang salah guna ba media sosial laban deka ditemu tauka nyadi tebilang. Bisi mega ngasaika diri dibuli ketegal nemu diri enda dibai ngagai parti.

PIKIRKA: Kati bala anak nuan ngayanka ulah ti manah lebuh betalipun? (Epesus 4:31) Baka ni gaya sida enti orang bukai enda mai sida?

PORNOGRAFI

Gambar ti kamah senang dipeda ba Internet. Apai indai patut nemu, taja pan bisi penapis (filter) ulih nulung, tang aplikasi tu enda meri jamin bala anak likun ari pornografi.

Sexting—siti chara nganjung tauka nerima gambar kamah diri empu tauka orang bukai. Kesuah iya nengah talipun. Ba sekeda menua, sexting dikumbai jenayah. Bepanggai ba undang-undang tauka umur orang ke ngereja pengawa tu. Orang ke ngereja sexting, ulih didawa ngerembaika pornografi ngagai bala anak mit.

PIKIRKA: Baka ni nuan ulih nulung anak nuan ngelaban penguji deka meda tauka nganjung gambar ti kamah nengah Internet?—EPESUS 5:3, 4.

NGELATIH ANAK NUAN

Taja pan bala anak pandai ngena perengka elektronik, sida begunaka iring ari apai indai. Bup Indistractable madahka, meri anak talipun tauka perengka eletronik sebedau sida nemu chara ngena enggau betul, tu baka “pengawa ti enda betanggungjawap, sempama nejuka sida terejun ngagai sungai sebedau sida nemu nyemerai.”

Tandaka chara ke deka dikena nuan, tauka tuliska idea nuan empu.

• Padahka ngagai anak nuan, anang ngayanka ulah ti enda mereti lebuh ngena Internet

• Nulung anak aku enda kelalu asa ati enti iya enda dibai ngagai pengawa orang bukai

• Naka ulih nyekat laman web ke enda menuku

• Enti anak aku bisi talipun, aku patut meresa nama laman web tauka utai ke suah dilawa iya ba Internet

• Tetapka tatak alai anak aku meda talipun tiap hari

• Nagang anak aku mai perengka elektronik ngagai endur ti sunyi kediri aja, sereta bilik tinduk sida

• Tetapka atur, anang bepegaika tauka bebaika perengka elektronik lebuh makai begulai