Baka Ni Teknologi Nekul Runding Nuan?
Mensia patut seruran belajar, nemu ke kena sekula, kereja, tauka utai bukai. Teknologi ngenyenangka chara belajar. Ketegal teknologi, kitai ulih ngiga mayuh penerang enggau enda ibuh nginsit ari rumah tauka indah ari penuduk kitai.
Tang, orang ke ngena kelalu mayuh awak ba teknologi ngasaika sida . . .
-
tusah fokus lebuh macha.
-
tusah fokus ngagai siti pengawa ba maya ti sama.
-
jampat berasai leju maya kediri aja.
UTAI KE PATUT DITEMU NUAN
MACHA
Orang ke ngena mayuh awak ba perengka elektronik, suah iya enda sabar macha semua artikel tauka bup. Nyadi, sida semina macha ngelansa aja.
Macha enggau ngelansa beguna lebuh nuan patut ngiga saut ba maya ti pandak. Tang, chara tu enda ulih nulung lebuh nuan deka faham pasal siti topik.
PIKIRKA: Ni pengelama nuan ulih macha teks ti panjai enggau silik? Nama kebuah utai tu ulih ngemanahka pengelandik nuan belajar?—JAKU DALAM 18:15.
FOKUS
Sekeda orang ngumbai, teknologi deka nulung sida ngereja dua pekara ba maya ti sama. Chunto iya, nganjung mesej ngagai kaban seraya nuan belajar. Tang, ketegal fokus sida udah bebagi dua, sida enda ulih ngereja dua iti pengawa enggau manah.
Kitai endang patut disiplin diri empu ngambi ulih fokus. Pengawa tu enda rugi. Seiku nembiak ke benama Grace madahka, “Penyalah enggau stres kitai deka kurang. Aku udah belajar, manah agi fokus ke siti utai ba siti maya, lalu enda nejuka diri limpang ke bukai.”
PIKIRKA: Kati teknologi ngurangka pengelandik nuan deka faham lalu ngingatka utai ke udah dipelajarka nuan?—JAKU DALAM 17:24.
MAYA KEDIRI AJA
Sekeda orang enda ulih tan enti sida kediri aja. Nya alai, sida ngena teknologi ngambika enda sunyi. Seiku indu ke benama Olivia madah, “Enti aku duduk diau pengelama 15 minit, nadai meda talipun, tablet, tauka TV, aku berasai boring.”
Iya ke amat, maya kediri aja siti peluang ti manah alai belemati sereta belajar. Pekara tu beguna nemu ke ngagai orang ke biak tauka orang ke besai tuai.
PIKIRKA: Kati nuan ulih ngena awak kediri aja kena ngaga sesiti utai ke beguna?—1 TIMOTI 4:15.
UJI PERESA
CHARA NUAN NGENA TEKNOLOGI
Baka ni nuan ulih ngena teknologi kena ngemanahka chara nuan berunding? Baka ni teknologi ulih nagang nuan ari fokus enggau belajar?
PRINSIP BUP KUDUS: “Bepegai erat ba penemu-dalam enggau ba penalam runding nuan.”—JAKU DALAM 3:21.
Nuan Engka Rindu Meda Tu
TANYA ARI BALA NEMBIAK
Baka Ni Chara Aku Belajar Fokus?
Peratika, tiga chara perengka elektronik ulih ngachau fokus nuan, lalu baka ni chara nuan belajar fokus.
TANYA ARI BALA NEMBIAK
Kati Aku Patut Ngereja Beberapa Pengawa ba Maya ti Sama?
Kati nuan amat ulih fokus enti ngereja mayuh pengawa ba maya ti sama?
