Enti kitai kelalu berundingka bida entara kitai enggau orang bukai, kitai nyadika nya kedalih kitai bisi runding ti bepilih mata. Lalu pia mega, runding ke baka tu ngasuh kitai ngumbai diri pama agi ari orang bukai. Tang iya ke amat, kitai semina bebida ba sekeda utai aja. Enti kitai nejuka runding ti enda manah tu, kitai deka bepilih mata lalu tusah ngayanka penyiru.

“Rami gaga enggau orang ke rami gaga, nyabak enggau orang ke nyabak.”—ROME 12:15.

Nama dipelajar kitai ari ayat tu? Ayat tu ngajar kitai ngayanka penyiru. Penyiru, reti iya ngasaika utai ti diasaika orang bukai.

Enti kitai bisi penyiru ngagai seseiku orang, kitai ulih ngasaika diri nadai mayuh bida enggau orang nya. Kitai engka nemu iya bisi asai ati ti sama enggau kitai. Penyiru nulung kitai meda, enda ngira ari ni penatai seseiku orang, semua kitai nya sama aja. Enti kitai enda kelalu betatika bida entara kitai, kitai ulih ngubah runding ti enda manah pasal orang bukai.

Penyiru meransang kitai bebasaka orang bukai. Anne-Marie ke datai ari Senegal, kala ngemaruhka orang ke datai ari tikas sosial ke baruh agi ari iya. Iya nerangka baka ni penyiru nulung iya: “Lebuh aku meda pemerinsa ke diasaika orang ke datai ari tikas sosial ke baruh agi, aku nguji ngambarka diri ba penuduk sida. Nyadi aku meresa diri lalu nemu, nadai utai ngasuh aku pama agi ari sida.” Enti kitai nguji meretika pemerinsa orang bukai, kitai tentu berasai siruka sida lalu nyeliahka runding ti enda manah pasal sida.

Enti nuan bisi runding ti enda manah pasal seraban orang, uji perundingka nama utai ke sebaka ba entara nuan enggau sida. Ngambika chunto, uji gambarka asai ati sida lebuh:

• makai begulai enggau diri sebilik

• pulai gawa

• begulai enggau bala kaban

• ningaka musik ti dikerinduka sida

Udah nya, uji gambarka nuan ba penuduk sida. Tanya diri empu:

• ‘Kati asai ati aku enti orang bukai ngumbai aku enda beguna?’

• ‘Kati asai ati aku enti orang ngakim sebedau sida nemu sapa aku?’

• ‘Enti aku datai ari raban orang ke enda dikerinduka aku, baka ni aku ngarapka orang bukai begulai enggau aku?’