Kati alam semesta enggau utai idup ditempa Petara tauka nyadi kediri empu aja? Runding dua iku pakar fizik ke disebut tadi amat bebida ari penemu Bup Kudus. Kedua-dua penemu nya sama bisi orang nyukung, lalu majak disebut ba mayuh bup ti tebilang sereta program TV. Taja pia, agi mayuh orang enda nemu ni bagi penemu ti betul.

Bala cikgu ba sekula nuan engka ngajar alam semesta enggau utai idup ulih nyadi pia aja, sereta nadai Penempa. Tang, kati sida ulih nunjukka nuan bukti Penempa nya amat nadai? Nuan mega engka kala ninga, tuai pengarap ngajar Penempa nya amat bisi. Tang, kati sida ulih nunjukka bukti nya ngagai nuan? Tauka, kati sida semina ngasuh nuan nerima ajar nya, lalu enda ibuh mansik bukti iya?

Tentu nuan kala berundingka tanya ke baka tu, lalu nuan engka ngasaika nadai orang nemu sekalika Penempa nya amat bisi tauka enda? Nuan mega engka teperundingka siti agi tanya: Kati saut ke tanya tu penting?

Majalah tu deka berandauka beberapa iti bukti ke udah ngasuh mayuh orang andal, Penempa nya amat bisi. Pia mega, kitai deka meda nama kebuah nemu pasal asal usul utai idup ba bumi nya penting.