PERATIKA siti sempama. Jeman kelia, kuta dikelinggi kubu ti tegap. Enti munsuh ngerusak mimit aja ari kubu nya, semua nengeri nya enda likun agi. Nyadi, tubuh nuan sempama kuta nya, lalu kubu nya ngambarka sistem imun nuan. Chara nuan nyaga diri nentuka pemanah pengerai nuan. Perundingka lima chara penyakit ulih ngerampit, enggau chara nuan nyeliahka nya.

CHARA NGERAMPIT: Kuman ulih tama ngagai tubuh nengah ai ti kamah.

CHARA NYELIAH: Kitai patut nyaga pemeresi ai. Enti nuan nemu tauka ngasaika ai nya kamah, nuan patut meresi nya. a Simpan ai irup ba kontainer, jak, tauka kitil ke bisi penutup. Tentuka gayung ke dikena nuan nyauk beresi. Anang nepuka jari dalam ai ti udah beresi. Enti ulih, anang ngaga jamban semak paip ai kena nuan ngulihka ai irup.

CHARA NGERAMPIT: Kuman ulih ditemu ba pemakai.

CHARA NYELIAH: Pemakai ti bisi kuman engka manah dipeda. Tang tentuka nuan nuchi semua buah enggau sayur. Pia mega, jaga meh pemeresi ba dapur, perengka dapur, enggau jari nuan maya nyediaka pemakai. Sekeda pemakai patut dipanduk enggau pengangat ti tinggi, ngambika bakteria nya ulih mati. Bejimat enggau pemakai ke udah betukar warna, tauka bisi asai ti nyelai, laban engka nya nunjukka pemakai nya udah jai. Enti bisi teda pemakai, tepu meh nya dalam peti ais enggau lengkas. Anang nyediaka pemakai maya nuan sakit. b

CHARA NGERAMPIT: Bisi indu utai ulih ngerambaika kuman ke ngachau pengerai tubuh.

CHARA NYELIAH: Enti nuan nemu ni maya nyamuk denggi nyadi aktif, anang meh pansut ari rumah maya nya, tauka kena meh baju panjai sereta tanchut panjai kena nyaga diri. Maya tinduk, kena meh kibung tauka ubat nyamuk. Anang nejuka ai betakung ba sesiti endur, enggaika nyamuk betelu dia. c

CHARA NGERAMPIT: Kuman ke idup ba tubuh jelu ulih ngachau pengerai kitai. Enti nuan diketup, dikeramak tauka teteguka tai jelu, pengerai nuan ulih dikachau.

CHARA NYELIAH: Sekeda orang nagang jelu tama ke rumah ngambi ulih nyeliahka penyakit. Pengudah main enggau jelu tupi, tuchi meh jari nuan. Anang negu jelu ke nadai orang ngibun. Enti nuan diketup, tauka dikeramak, tuchi meh abi telih nya nyentukka beresi, lalu betemu enggau lutur. d

CHARA NGERAMPIT: Bakteria ke dipansutka ari batuk enggau engkasi ulih tama ngagai tubuh kitai. Bakteria nya mega ulih ngerampit enti kitai beberap tauka betabi jari. Kuman ari orang bukai ulih lekat ba pemegai pintu, lalau, talipun, remote control, tauka komputer sereta keyboard.

CHARA NYELIAH: Anang bekunsika penyukur, berus ngeli tauka kain mandi enggau orang bukai. Seliahka diri ari negu utai ke dikeluarka tubuh jelu tauka mensia baka peluh, dak, nyengkaum darah sereta begian darah ke bukai. Kingatka, tuchi meh jari nuan enggau silik. Tu engka chara ti pemadu manah kena ngetuka penyakit berampit.

Enti nuan sakit, diau meh ba rumah. Opis Pengerai ba Amerika Serikat madahka, maya nuan batuk tauka engkasi, tutup meh mulut nuan ngena tisu tauka lengan baju, ukai ngena jari.

Siti lalau ti manah madah: “Orang ke nemu berunding deka meda penusah datai, lalu belalai.” (Jaku Dalam 22:3) Tu siti pengingat ti manah, kelebih agi dunya kitai diatu bisi penyakit ti ulih ngachau nyawa. Nya alai, giga meh penerang pasal pemakai lalu nyaga diri enggau chara nyaga pemeresi. Tanka meh imun tubuh nuan, lalu kurangka penyakit berampit!