MAYUH pengarap amat beberatka endur sembiang ti lawa, sereta meransang penyembah sida besampi dia. Bisi sekeda pengarap mega deka penyembah sida besampi ba maya ti ditetapka. Nama ajar Bup Kudus?

Bup Kudus endang nyebut, bisi maya ti ngena alai besampi. Chunto iya, sebedau Jesus makai begulai enggau bala murid iya, iya beterima kasih ngagai Petara. (Luke 22:17) Bala murid iya mega begulai maya begempuru sereta besampi. Kenyau ari suba, orang Judah besampi ba rumah sembiang sereta Rumah Petara ba Jerusalem. Jehovah deka rumah Iya nyadi, “rumah sembiang ke semua bansa.”—Mark 11:17.

Lebuh penyembah Petara begulai sereta beserakup, sampi sida mega deka ngagaka ati Iya. Bisi maya, sampi ke baka tu engka meransang Petara ngarika sida. (Hebrew 13:18, 19) Gempuru Saksi-Saksi Jehovah berengkah sereta ditutup enggau sampi. Kala nuan datai ngagai gempuru Saksi-Saksi Jehovah?

Bup Kudus nunjukka bala nembiak Petara ke suba ulih besampi ba barang maya sereta barang alai. Jesus kala madah, “Lebuh kita besampi, tama ke bilik, tikupka pintu, lalu besampi ngagai Apai kita ti enda dipeda. Lalu Apai kita ti meda utai ti dikereja kita belalai, deka ngupah kita.”—Matthew 6:6.

Gambarka nuan ulih besampi ngagai Pemerintah alam semesta ba barang maya! Iya mega besemaya deka ningaka sampi nuan. Jesus nemu, iya ulih mansutka asai ati ngagai Apai iya. Iya seruran ngiga peluang kediri aja, lalu besampi. Lebuh iya patut ngaga pemutus ti amat penting, iya mega besampi ngagai Apai iya sepemanjai malam.—Luke 6:12, 13.

Nembiak Petara dulu kelia pan selalu besampi lebuh sida napi penanggul, tauka maya sida patut ngaga pemutus ti penting. Bisi nya besampi dalam ati, bisi nya mansutka leka jaku, beraban, tauka kediri empu aja. Utai ke penting nya, sida bagas besampi. Tu sejalai enggau utai ke dipadah dalam Bup Kudus ti madah, “Seruran besampi.” (1 Tesalonika 5:17) Jehovah enda leju ningaka sampi orang ke deka ngereja peneka Iya.

Tang, mayuh orang berunding sampi nya nadai reti. Kati sampi nya amat-amat meri penguntung? Aram kitai meda saut iya.