BA tiap iti adat enggau agama, orang selalu besampi sekalika nya kediri aja tauka begulai enggau orang bukai. Bisi ke besampi ba rumah, gerija, kuil, tokong enggau endur bukai. Sida ngena tikai, rosary, bup sampi, menyan, gambar tauka patung maya besampi.

Ketegal ulih besampi, nya meh ke ngasuh mensia unik agi. Amat, taja pan mensia enggau jelu bisi utai ti sama baka, nemu makai, nemu ngirup, sereta sama bela begunaka udara kena neruska pengidup. (Pengajar 3:19) Tang, semina mensia ke ulih besampi. Nama kebuah?

Tu ketegal mensia endang ditempa enggau penau tu. Bup Kudus madah, “Gaga ati meh orang ke nemu diri begunaka Petara.” (Matthew 5:3, NWT) Au, mensia bisi pengingin deka ngelala lalu bepanggai ba kuasa ti kering agi sereta tan belama iya.—Pengajar 3:11.

Tu ulih dipeda nengah perengka kena besampi sereta rumah sembiang ke bisi ba mayuh endur. Orang ke datai ari mayuh chara pengidup, ngiga mayuh awak alai besampi. Lalu bisi ari sida nguji ngemuaska utai ti diguna sida ba rohani, enggau chara bepanggai ba diri empu tauka ngagai orang bukai. Kati chara tu ulih dikena? Kitai semina orang ti lemi sereta kuasa kitai bisi tatak. Nya alai, kitai begunaka seseiku orang ke bepenemu-dalam agi, bekuasa, sereta mengkang belama iya kena nulung kitai.

Ambika chunto, kati nuan kala ngiga saut ngagai tanya pasal pengidup, sereta dini bulih jaku lalau ke ulih dikearapka? Kati nuan deka bulih pengelantang maya napi penanggul, tauka lebuh lenyau orang ke dikesayauka? Kati nuan keran diampunka ketegal udah ngereja dosa ti besai?

Nitihka Bup Kudus, tu meh entara kebuah kitai besampi. Dalam Bup Kudus mayuh ngembuan sampi lelaki enggau indu ke tetap ati. Bisi entara sida ke minta pengelantang, iring, pengampun sereta ngiga saut pasal pengidup.—Masmur 23:3; 71:21; Daniel 9:4, 5, 19; Habakuk 1:3.

Nengah sampi sida, nuan deka beratika siti utai ti sama ke penting. Tu meh kunchi kena nentuka sampi nuan disaut. Aram meda kunchi nya.