KATI sampi ulih nulung kitai? Bup Kudus meri jamin, nembiak Petara ti tetap ati ulih bulih mayuh penguntung ari sampi. (Luke 22:40; James 5:13) Sampi ulih nulung kitai ba pengarap, emosi enggau fisikal. Nama bukti iya?

Gambarka, nuan meri hadiah ngagai anak nuan. Iya tentu berasai gaga ati. Tang, kati tu udah chukup? Enda. Tentu nuan deka ngajar iya, madahka terima kasih laban tu utai ti amat penting. Maya besampi, kitai mega ulih madahka asai ati sereta pengerindu kitai ngagai Petara nengah leka jaku. Enggau tu, kaul kitai ngagai Iya deka nyadi rapat agi. Aram kitai meda beberapa chunto tu.

Sampi terima kasih. Lebuh kitai beterima kasih ke pemeri Jehovah, kitai deka berasai gaga agi ati. Kitai deka fokus ke mayuh berekat enggau nyadi positif agi.—Pilipi 4:6.

Chunto: Jesus beterima kasih ngagai Apai iya, laban ninga sereta nyaut sampi iya.—John 11:41.

Sampi minta ampun. Lebuh kitai minta pengampun ari Petara, tu ngingatka kitai dosa nya ukai pekara ti mit, lalu tu meransang kitai nesal ati. Nya baru kitai ulih ngetanka ati ti beresi, lalu enda kelalu berasai besalah.

Chunto: Ba sampi David, iya madahka penusah ati diri sereta nesalka dosa iya.—Masmur 51.

Sampi minta iring sereta penemu-dalam. Kitai ulih minta penemu-dalam sereta iring ari Petara ngambika kitai ulih ngaga pemutus ti manah. Tu ngajar kitai terus bepanggai ngagai Iya, nemu tatak diri sereta enda nyadi sumbung.—Jaku Dalam 3:5, 6.

Chunto: Solomon enggau baruh ati besampi minta penemu-dalam ngambika ulih merintah orang Israel.—1 Raja 3:5-12.

Sampi lebuh napi penanggul. Enti kitai napi mayuh pengirau, Petara ulih merindang kitai. Kitai deka belajar, bepanggai ba Jehovah tang ukai ba diri empu.—Masmur 62:8.

Chunto: Raja Asa besampi lebuh belaban enggau munsuh ti kering.—2 Bansa 14:11.

Besampika orang bukai. Kitai ulih ngelaban ulah ti berundingka diri empu, lalu belajar nunjukka pengasih sereta penyinu.

Chunto: Jesus besampika murid iya.—John 17:9-17.

Sampi meri puji. Lebuh kitai muji Jehovah ketegal pemanah enggau pengawa Iya, kitai deka majak agi bebasa sereta rinduka Iya. Kaul kitai enggau Petara mega deka nyadi rapat agi.

Chunto: David muji Petara ketegal nempa utai ti ngalitka ati.—Masmur 8.

Ba dunya ti charut tu, pengelantang ba ati tusah diulih. Tang, nengah sampi kitai bulih ‘pemaik Petara, ti ngelui peragam mensia.’ Asil iya, kitai deka bulih pengerai ti manah agi. (Pilipi 4:7; Jaku Dalam 14:30) Tang, nama agi utai ke patut ditemu kitai pasal sampi? Artikel pengudah tu deka nerangka pekara tu enggau silik agi.